மயிலாடுதுறை, கும்பகோணத்தில் பராமரிப்பு பணி: ரெயில் போக்குவரத்து இன்று முதல் மாற்றம்

திருச்சி,

மயிலாடுதுறை, கும்பகோணம் ரெயில் நிலையங்களில் ரெயில்வே என்ஜினீயரிங் பராமரிப்பு பணிகள் நடைபெற உள்ளன. இதையொட்டி அந்த வழித்தடத்தில் இன்று (வியாழக்கிழமை) முதல் அடுத்த மாதம் (மே) 23-ந்தேதி வரை (சனிக்கிழமை மற்றும் ஞாயிற்றுக்கிழமை தவிர) ரெயில் போக்குவரத்தில் சில மாற்றங்கள் செய்யப் பட்டுள்ளன. அதன்படி இன்று முதல் அடுத்த மாதம் 23-ந்தேதி வரை திருச்சி-மயிலாடுதுறை பயணிகள் ரெயில் கும்பகோணம் ரெயில் நிலையத்தில் நிறுத்தப்படும். அந்த ரெயில் பெட்டிகள் கும்பகோணத்தில் இருந்து மயிலாடுதுறைக்கு சிறப்பு எக்ஸ்பிரஸ் ரெயிலாக இயக்கப்படும்.

மைசூர் எக்ஸ்பிரஸ் ரெயில்

இன்று முதல் வருகிற 13-ந்தேதி வரை (சனிக்கிழமை, ஞாயிற்றுக்கிழமை தவிர) மயிலாடுதுறை-நெல்லை பயணிகள் ரெயில் மயிலாடுதுறையில் இருந்து பகல் 11.25 மணிக்கு புறப்படுவதற்கு பதிலாக பகல் 12.20 மணிக்கு புறப்படும். இதேபோல திருச்சி-சென்னை சோழன் எக்ஸ்பிரஸ் ரெயில் கும்பகோணம் ரெயில் நிலையத்தில் 20 நிமிடம் நிறுத்தி வைக்கப்பட்டு இயக்கப்படும்.

வருகிற 14-ந்தேதி முதல் அடுத்த மாதம் 23-ந்தேதி வரை (சனிக்கிழமை, ஞாயிற்றுக்கிழமை தவிர) மயிலாடுதுறை-மைசூர் இடையே இயக்கப்படும் எக்ஸ்பிரஸ் ரெயில் மயிலாடுதுறை-திருச்சி இடையே ரத்து செய்யப்படுகிறது. திருச்சியில் இருந்து மைசூர் எக்ஸ்பிரஸ் ரெயில் புறப்பட்டு செல்லும்.மேற்கண்ட தகவல் திருச்சி கோட்ட ரெயில்வே நிர்வாகம் வெளியிட்டுள்ள செய்திக்குறிப்பில் தெரிவிக்கப்பட்டுள்ளது.