பெண்கள் உலக கோப்பை கிரிக்கெட்: இங்கிலாந்து அணி 377 ரன்கள் குவிப்பு

லீசெஸ்டர்,

8 அணிகள் இடையிலான 11-வது பெண்கள் உலக கோப்பை கிரிக்கெட் போட்டி இங்கிலாந்தில் நடந்து வருகிறது.

இந்த நிலையில் லீசெஸ்டரில் நேற்று நடந்த 5-வது லீக் ஆட்டத்தில் இங்கிலாந்து-பாகிஸ்தான் அணிகள் மோதின. ‘டாஸ்’ ஜெயித்த பாகிஸ்தான் அணி பீல்டிங்கை தேர்வு செய்தது. இதன்படி முதலில் பேட்டிங் செய்த இங்கிலாந்து அணி நிர்ணயிக்கப்பட்ட 50 ஓவர்களில் 7 விக்கெட் இழப்புக்கு 377 ரன்கள் குவித்தது.

பின்னர் 378 ரன்கள் எடுத்தால் வெற்றி என்ற கடினமான இலக்குடன் ஆடிய பாகிஸ்தான் அணி 29.2 ஓவர்களில் 3 விக்கெட் இழப்புக்கு 107 ரன்கள் எடுத்து இருந்த போது மழையால் ஆட்டம் பாதிக்கப்பட்டது. இந்த நிலையில் டக்வொர்த் விதிமுறைப்படி முடிவு அறிவிக்கப்பட்டால் இங்கிலாந்து அணி வெற்றி பெறும்.

இன்று (புதன்கிழமை) நடைபெறும் லீக் ஆட்டத்தில் நியூசிலாந்து-தென் ஆப்பிரிக்கா அணிகள் சந்திக்கின்றன.