பெண்கள் உலக ஆக்கி லீக்: இந்திய அணி இறுதிப்போட்டிக்கு முன்னேற்றம்

வான்கோவெர்

பெண்கள் உலக ஆக்கி லீக் (ரவுண்ட் 2) போட்டி கனடாவில் நடந்து வருகிறது. இதில் நேற்று முன்தினம் நடந்த அரைஇறுதியில் இந்திய அணி, பெலாரசை சந்தித்தது. தொடக்கம் முதலே ஆதிக்கம் செலுத்திய இந்தியா 4-0 என்ற கோல் கணக்கில் பெலாரசை வீழ்த்தி இறுதிப்போட்டிக்குள் நுழைந்தது. இந்திய அணியில் கேப்டன் ராணி (20 மற்றும் 40-வது நிமிடம்), குர்ஜித் கவுர் (13, 58-வது நிமிடம்) ஆகியோர் தலா 2 கோல் அடித்தனர். பெலாரசுக்கு 5 பெனால்டி கார்னர் வாய்ப்பு கிடைத்தும் அவற்றை கோட்டை விட்டனர். இந்திய அணியின் தற்காப்பு ஆட்டம் சிறப்பாக இருந்தது. குறிப்பாக இந்திய கோல் கீப்பர் சவிதா எதிரணியின் பல முயற்சிகளை முறியடித்து பிரமாதப்படுத்தினார். மற்றொரு அரைஇறுதியில் சிலி அணி 2-1 என்ற கோல் கணக்கில் உருகுவேயை வீழ்த்தியது. இந்திய நேரப்படி இன்று அதிகாலை 5 மணிக்கு நடக்கும் இறுதி ஆட்டத்தில் இந்தியா-சிலி அணிகள் மோதுகின்றன.

பெண்களுக்கான உலக ஆக்கி லீக்கின் அடுத்த சுற்று (அரைஇறுதி) ஜூன்-ஜூலை மாதம் நடக்கிறது. மேற்கண்ட வெற்றியின் மூலம் இந்த போட்டிக்கு விளையாட இந்தியா தகுதி பெற்றுள்ளது. இது, 2018-ம் ஆண்டு பெண்கள் உலக கோப்பை ஆக்கி போட்டிக்கான தகுதி சுற்று என்பது குறிப்பிடத்தக்கது.