ரத்த  ஞாயிறு

பாரத தேசத்தை எப்படி கட்டிக் காக்கவேண்டும் என்கிற அக்கறையுடன் போராடிய சரித்திர மகாபுருஷர்கள் ஏராளம். அவர்களுள் மக்களுக்காகவும், மதத்துக்காகவும், மொழிக்காகவும் போராடியவர்கள் சொற்பமானவர்கள். அவர்களுள் ஒருவர் சத்ரபதி சிவாஜி. இந்த மாவீரரை கதாநாயகனாகக் கொண்டு படைக்கப்பட்டுள்ளது இந்நூல்.

சிவாஜியின் காலத்தில் ஏற்பட்ட நிகழ்ச்சிகள் யாவும், விடுதலைப் போராட்டம் போன்றதே. பின்னாளில் ஆங்கிலேயனை விரட்டுவதற்காக எழுந்த போராட்டத்தின் தொடக்கத்தை சிவாஜிதான் அமைத்துக் கொடுத்தார் என்பதை இந்நூலின் மூலம் அறிய முடிகிறது. அப்சல்கான் கொலை, ஷிஸ்டாகான் விரல் பறிகொடுத்த நிகழ்ச்சி, அவுரங்கசீப்பின் கோட்டைக்குள் புகுந்து சிவாஜி தப்பியது இம்மூன்றும் இந்த வரலாற்று நாவலில் முக்கியமான நிகழ்ச்சிகள். கதாநாயகி பூஜ்யா கற்பனை பாத்திரமாக வந்து கதைக்கு வலுவூட்டுகிறாள்.

சரித்திரப் புதினங்களைப் படைக்க விரும்புவோருக்கு வரலாற்று அறிவும், ஆராய்ச்சித் திறனும், இலக்கியப் புலமையும் இருந்திடல் வேண்டும் என்பைத நிரூபிக்கும் வகையில் எழுத்து நடையில் ஒரு கம்பீரமும், சுவையும், வேகமும் கொண்டு இந்நாவலை படைத்திருக்கிறார், இலக்கிய சாம்ராட் கோவி.மணிசேகரன். (வெளியிட்டோர்: பூம்புகார் பதிப்பகம், 127–63, பிரகாசம் சாலை, பிராட்வே, சென்னை–108; விலை: ரூ.260)

விநாயகர்  கதைகள்

எந்த காரியத்தையும் செய்யும் முன் அந்த காரியம் தடையின்றி நடைபெற விநாயகரை வழிபடுவது நடைமுறை. அத்தகை சிறப்புமிக்க மூல முதல்பொருளான விநாயகரின் திருவிளையாடல்கள், பல கதைகளாக தொகுக்கப்பட்டு நூலாக வெளியாகியுள்ளது.

(ஆசிரியர்: கீர்த்தி; வெளியீடு: சங்கர் பதிப்பகம், 15/21, டீச்சர்ஸ் கில்டு காலனி, 2–வது தெரு, ராஜாஜி நகர் விரிவு, வில்லிவாக்கம், சென்னை–49; விலை: ரூ.50)