தாமதித்த காரியங்கள் தடையின்றி நடைபெறும் நாள். காலை நேரம் கலகலப்பாக இருக்கும். தொழில் சீராக நடைபெறும். பணி யாளர்களின் தொல்லை அகலும். குடும்பத்தில் சகோதர வழி சச்சரவுகளைச் சமாளிப்பீர்கள்.    

21-06-2019  முதல் 27-06-2019 வரை

செயல்களைச் சிறப்பாகச் செய்யும் மிதுன ராசி அன்பர்களே!

இந்த வாரம் உத்தியோகஸ்தர்கள் இடமாற்றம், பதவி உயர்வு போன்ற நற் பலன்களை அடைவார்கள். உங்கள் விருப்பத்திற்கு மாறானதாக அவை இருக்கக்கூடும். எனினும் மற்ற சலுகைகளும், வருமானமும் திருப்தியளிக்கும். தொழில் செய்பவர்கள் முன்னேற்றமான சூழ்நிலைகளைக் காண்பீர்கள். இதற்கு உங்கள் கூட்டாளிகளின் ஒத்துழைப்பு உதவியாக இருக்கும். குறிப்பாக இயந்திர தொடர்பான தொழில் நன்கு விரிவடையும். கலைஞர்கள் சில வாய்ப்புகளைப் புதிதாகப் பெற முயற்சி செய்யும்போது சகக் கலைஞர்கள் அதைத் தட்டிப்பறிக்க முயற்சி செய்வார்கள். நீங்கள் பொறுத்திருக்க வேண்டும். நடனக் கலைஞர்கள், இசைக் கலைஞர்கள் போன்றோர் ஓரளவு வளர்ச்சி நிலையை எட்டுவீர்கள்.

மாணவர்கள் புதிய சூழ்நிலையில் வேறெந்த பிரச்சினைகளிலும் ஈடுபாடு கொள்ளாமல் படிப்பில் அக்கறை காட்டி வருவது நல்லது. வியாபாரிகள் முழுத் திருப்தி கொள்ளும் வகையில் இல்லாவிட்டாலும் ஓரளவுக்கு லாபகரமாக வியாபாரம் நடைபெறுவதில் தடையேதும் இருக்காது. குடும்ப உறவுகளிடையே இணக்கமான சூழ்நிலையே காணப்படும். காரணமில்லாமல் ஒரு சிலருக்கு மனக்கலக்கம் உண்டாகும். அவ்வப்போது உடல்நலக் குறைவு ஏற்பட்டு மறையும்.

இந்த வாரம் வெள்ளிக்கிழமை துர்க்கைக்கு தீபமேற்றி வணங்கினால் சிரமங்கள் அகலும்.

19-12-2017 முதல் 28-03-2020 வரை

மிருகசீரிஷம் 3, 4 பாதங்கள், திருவாதிரை, புனர்பூசம், 1, 2, 3 பாதங்கள் வரை

(பெயரின் முதல் எழுத்துக்கள்: க, கா, கி, கு, ஞ, ச, கே, கோ உள்ளவர்களுக்கும்)

கண்டகச் சனியின் ஆதிக்கம் கடவுள் அருள்தான் சாதிக்கும்!

சந்தர்ப்பத்திற்கு ஏற்றவாறு தங்கள் இயல்புகளை மாற்றிக் கொள்ளும் மிதுன ராசி நேயர்களே!

அனுபவத்தின் வாயிலாக அனைவரையும் எளிதில் பழக்கம் வைத்துக் கொள்ளும் உங்களுக்கு இதுவரை 6-ல் சஞ்சரித்து வந்த சனி பகவான் இனி 7-ம் இடத்தில் சஞ்சரிக்கப் போகின்றார். இந்த சப்தம ஸ்தான சனியை ‘கண்டகச் சனி’ என்று அழைப்பது வழக்கம்.

கண்டகச் சனி என்றாலே நல்லது நடக்காது என்று முடிவு கட்டி விடக் கூடாது. விதி விலக்குகளும் ஜோதிடத்தில் இருக்கின்றது. கெடுபலன்கள் மாறி நற்பலன்கள் நடைபெற வேண்டு மானால் உங்கள் ராசிநாதனுக்கு சனி நட்பு கிரகமாக இருக்க வேண்டும். அந்த அடிப்படையில் தான் உங்களுக்கு இந்த சனிப்பெயர்ச்சி ஓரளவு நற்பலன்களைக் கொடுக்கும்.

ஏழாமிடத்தில் சனி பகவான் சஞ்சரிக்கும் பொழுது நேரிடையாக உங்கள் ராசியைப் பார்க்கப் போகின்றார். எனவே ஆரோக்கியத்தில் கொஞ்சம் அக்கறை காட்ட வேண்டிய சூழ்நிலைஏற்பட்டாலும், மாற்று மருத்துவத்தால் உடல் நலம் சீராகும். எதைச் செய்தாலும் பதற்றமின்றி நிதானத்துடன் செய்வது நல்லது.

விரயங்கள் அதிகரிக்கும் நேரமிது. பொதுவாக இதுபோன்ற கண்டகச் சனியின் ஆதிக்க காலத்தில் வாக்குறுதி கொடுப்பதைத் தவிர்ப்பது நல்லது. விரோதிகளை வளர்த்துக் கொள்ளாமல் பார்த்துக் கொள்வதும் உங்கள் புத்திசாலித்தனமாகும்.

இனிய பலன்தருமா? ஏழாமிடத்துச் சனி!

சனி பகவான் 4-ம் இடத்திலோ, 7-ம் இடத்திலோ சஞ்சரித்தால் திடீர் திடீரென நட்பு பகையாகும். விரோதிகளின் கூட்டம் பெருகிக் கொண்டே போகும். குடும்பத்திலும் சரி, வெளிவட்டாரத்திலும் சரி தேவையற்ற பிரச்சினைகள், கருத்து வேறுபாடுகள் வரலாம். முன்கோபத்தின் காரணமாக சில நல்ல வாய்ப்புகளைக் கூட நழுவவிடுவீர்கள். அலைச்சல் அதிகரிக்கும்.

மற்றவர்களுக்காகவே உங்கள் வாழ்க்கையைத் தியாகம் செய்துகொள்ளும் சூழ்நிலை உருவாகலாம். வரும் வருமானத்தைக் கணக்கிட்டு அதை எந்தெந்த வழிகளில் செலவு செய்யலாம் என்று யோசித்து முடி வெடுத்து செயலாற்றுங்கள். நிதானத்தைக் கடைப்பிடியுங்கள். குழந்தைகளுக்குரிய கடன், கடமைகளை முறையாகச் செய்வதன் மூலம் மகிழ்ச்சியை வரவழைத்துக் கொள்ளலாம்.

சனி தாக்கும் கிரகமல்ல, அது நம்மைக் காக்கும் கிரகம் என்பதால் ஒவ்வொரு சனிக்கிழமையும் நீங்கள் விரதமிருந்து சனி பகவான் ஆலயத்திற்குச் சென்று எள் தீபம் ஏற்றி வழிபாடு செய்யுங்கள். திருநள்ளாறு சென்று சனீஸ்வரர் வழிபாட்டையும் மேற்கொள்ளலாம். அல்லது விஸ்வரூப ஆஞ்சநேயரை தரிசித்து வரலாம்.

சப்தம ஸ்தானம் தன்னில்

சனி என்னும் கிரகம் வந்தால்

எப்போதும் அதனின் பார்வை

இயல்பாகப் பதியும் அன்றோ!

அப்படிப் பார்க்கும் மந்தன்

அனுதினம் நன்மை செய்ய

ஒப்பில்லா அனுமன் தாளை

உள்ளத்தில் நினைத்துக் கொள்வோம்!

என்று ஜோதிட சாஸ்திரம் சொல்கின்றது.

எனவே, ஏழாமிடத்தில் சனி சஞ்சரிக்கும் பொழுது வழிபாட்டின் மூலமே வளர்ச்சியைக் காண இயலும் என்பதை அறிந்து கொள்ளுங்கள்.

மாபெரும் கிரகம் என்று வர்ணிக்கப்படுபவர் சனி பகவான். அவர் இதுவரை உங்கள் ராசிக்கு 6-ம் இடத்தில் சஞ்சரித்து வந்தார். அப்பொழுது உத்தியோகத்தில் பிரச்சினை, உடல் ஆரோக்கியத்தில் பிரச்சினை, உடனிருப்பவர்களால் பிரச்சினை என்று ஒவ்வொரு நாளும் வந்து கொண்டே இருந்திருக்கும்.

இப்பொழுது சனிப் பெயர்ச்சியாகிவிட்டது, சப்தமச் சனியாக இருந்தாலும் குரு வீட்டில் இருப்பதால் எழுபத்தி ஐந்து சதவீதம் நற் பலன்களையே வழங்கும். ஒரு காரியத்தை ஒரு முறைக்கு இருமுறை செய்யும் சூழ்நிலை உருவாகலாம். உற்சாகக் குறைவும், சலிப்பும் அடிக்கடி உங்களை வந்து அலைமோதலாம்.

உங்கள் ராசிக்கு 8, 9 ஆகிய இடங் களுக்கு அதிபதியானவர் சனி பகவான். அவர் ஏழாமிடத்தில் சஞ்சரிக்கும் பொழுது வாழ்க்கைத் துணையோடு கொஞ்சம் விட்டுக் கொடுத்துச் சொல்வது நல்லது. அதே நேரத்தில் இடமாற்றம், வீடு மாற்றம், ஊர் மாற்றம், உத்தியோக மாற்றம், வாகன மாற்றம் என்று அடிக்கடி மாற்றங்கள் வந்து கொண்டே இருக்கும். தம்பதியர் களில் கணவர் ஓர் ஊரிலும், மனைவி ஓர் ஊரிலும் பணி நிமித்தமாக வசிக்கும் சூழ்நிலை உருவாகலாம்.

மந்தனின் பார்வையால் ஏற்படும் மகத்தான பலன்கள்!

உங்கள் ராசிக்கு 8, 9 இடங்களுக்கு அதிபதியானவர் சனி பகவான். அவர் தற்சமயம் 7-ம் இடத்தில் சஞ்சரித்து 1, 4, 9 ஆகிய இடங்களைப் பார்க் கிறார். எனவே உடல் ஆரோக்கியம், அறிவாற்றல், முன்னேற்றம், உற்சாகம், வாகன யோகம், தாய்வழி ஆதரவு, சுகம், தந்தை வழி உறவு, பூர்வீக சொத்து அனைத்திலும் ஒரு நல்ல மாற்றத்தை வழங்கப் போகின்றது.

குறிப்பாக ராசியைச் சனி பார்ப்பதால் ஆரோக்கியத்தில் சிறுசிறு அச்சுறுத்தல்கள் ஏற்படும். கால், கைவலி, மூட்டுவலி, தோள்பட்டை வலி என்று ஏதாவது ஒரு வலியைக் கொடுத்து சிந்தனையைச் சிதறடிப்பார். நீங்கள் மருத்துவரிடம் சென்று காட்டினால் உடம்பில் எந்த நோயுமில்லை, சோதித்துப் பார்த்ததில் எல்லாமே நன்றாக இருக்கிறது. ஏன் கவலைப்படுகிறீர்கள் என்பார். உங்கள் ஜாதகத்தில் யோக திசை நடந்தால் உங்களுக்கு எந்தப் பாதிப்பும் ஏற்படாது. ஆனால் உங்கள் குடும்பத்தைச் சார்ந்தவர்களுக்கு மருத்துவச் செலவுகள் வரலாம்.

4-ம் இடத்தைச் சனி பார்ப்பதால் கட்டிய வீட்டைப் பழுதுபார்க்கும் சூழ்நிலை உருவாகலாம். புதிதாக வீடு வாங்கும் யோகம் ஒருசிலருக்கு உண்டு. தாய் வழி ஆதரவும், தந்தையின் அரவணைப்பும் கிடைக்கும். வாகன யோகம் உண்டு. தொழிலில் ஏற்பட்ட தொல்லைகள் அகலும். விலகிச் சென்ற சகோதரர்கள் இப்பொழுது பாசம் காட்டுவர். பிள்ளைகளுக்கு வெளிநாட்டு யோகம் அமையும்.

சனியின் பார்வை 9-ம் இடத்தில் பதிவதால் மேலதிகாரிகளின் ஆதரவு கிடைக்கும். பஞ்சாயத்துக்கள் நல்ல முடிவிற்கு வரும். பாகப்பிரிவினைகள் சுமுகமாக முடியும். வெளிநாட்டுப் பயணம் அனுகூலமாக இருக்கும்.

குதூகலம் தரும் குருப்பெயர்ச்சிக் காலம்!

4.10.2018-ல் விருச்சிக ராசியில் குரு சஞ்சரிக்கப் போகின்றார். அதன் பிறகு 28.10.2019-ல் தனுசு ராசிக்கு குரு செல்கின்றார். தனுசு ராசியில் சனி சஞ்சரிக்கும் பொழுது இரண்டுமுறை குருப்பெயர்ச்சி நிகழவிருக்கின்றது. இதன்விளைவாக நல்ல மாற்றங்களும் உங்களுக்கு ஏற்படும்.

சனிப்பெயர்ச்சியின்் தொடக்கத்தில் குரு முழுமையாக உங்களைப் பார்க்கின்றது. அதன்பிறகு விருச்சிகத்தில் சஞ்சரிக்கும் பொழுது உங்கள் ராசிக்கு 2, 10, 12 ஆகிய இடங்களைப் பார்க்கின்றது. எனவே குடும்பப் பிரச்சினைகள் தீரும். கொடுக்கல்-வாங்கல்கள் ஒழுங்காகும். தொழில் சம்பந்தமாக எடுத்த முயற்சியில் புதிய திருப்பங்கள் ஏற்படும். உடல்நலம் மற்றும் மனநலம் சிறப்பாக அமையும். கூட்டுக்குடும்பத்தில் ஏற்பட்ட குழப்பங்கள் அகலும். வரவு திருப்தி தரும்.

தனுசு ராசியில் குரு சஞ்சரிக்கும் பொழுது மீண்டும் அதன் பார்வை உங்கள் ராசியில் பதிகின்றது. சப்தம பார்வையாக குரு பார்ப்பதால் இக்காலம் ஒரு பொற்காலமாகும். எதிர்பார்ப்புகள் நிறைவேறும். உடன்பிறப்புகள் உறுதுணைபுரிவர். தொழில் வளர்ச்சி மேலோங்கும். லாபம் எதிர்பார்த்ததைக் காட்டிலும் கூடுதலாக கிடைக்கும்.

ராகு-கேது பெயர்ச்சிக் காலம்!

13.2.2019-ல் மிதுன ராசியில் ராகுவும், தனுசு ராசியில் கேதுவும் சஞ்சரிக்கப் போகின்றார்கள். உங்கள் ராசியிலேயே ராகு சஞ்சரிக்கின்றார். சப்தம ஸ்தானத்தில் கேது சஞ்சரிக்கின்றார். ஜென்ம ராகு நன்மைகளைச் செய்யுமா என்று நீங்கள் நினைக்க வேண்டாம். ‘கூறுகின்ற கேந்திரத்தில் ராகு-கேது நின்றால் குணவானும், தனவானாய் மாறுவானாம்’ என்று சாஸ்திரம் சொல்கின்றது. அந்த அடிப்படையில் பணப்புழக்கம் அதிகரிக்கும். சிந்தித்து செயல்பட்ட காரியங்களில் வெற்றி கிடைக்கும். வேலை நிமித்தமாக வெளிநாடு செல்லக்கூடிய வாய்ப்பு உருவாகும். சுபச்செலவுகள் அதிகரிக்கும். வாழ்க்கைத் துணையோடு விட்டுக் கொடுத்துச் செல்வது நல்லது. இக்காலத்தில் ஜென்ம ராகு, சப்தம கேது நற்பலன்களைத் தர நாகசாந்தி பரிகாரங்களைச் செய்ய வேண்டியது அவசியமாகும்.

சனியின் வக்ர காலம்!

25.4.2018 முதல் 21.8.2018 வரை மூல நட்சத்திரக் காலில் சனி வக்ரம் பெறுகின்றார். 8.5.2019 முதல் 3.9.2019 வரை மீண்டும் பூராடம் நட்சத்திரக் காலில் சனி வக்ரம் பெறுகின்றார்.

இக்காலத்தில் உங்கள் ராசிக்கு 8, 9 ஆகிய இடங்களுக்கு அதிபதி வக்ரம் பெறுவதால் மிகப்பெரிய முன்னேற்றங்கள் வந்து சேரும். மித மிஞ்சிய பொருளாதாரம் உருவாகும். தந்தை வழி உறவில் ஏற்பட்ட விரிசல் அகலும். உறவினர் பகை மாறும். தொழிலில் ஏற்பட்ட இழப்புகளை ஈடுசெய்வீர்கள்.

9-ம் இடத்திற்கு அதிபதி வக்ரம் பெறுவதால் முன்னோர் சொத்துகள் அல்லது வாங்கிய சொத்துகளை ஒருசிலர் விற்க நேரிடும். வாகன மாற்றம் செய்ய உகந்த நேரமிது.

தொட்ட காரியங்களில் வெற்றி பெற வழிபாடு!

சனிக்கிழமை தோறும் சிவாலயத்திற்குச் சென்று சனி பகவானை வழிபட்டு வாருங்கள். மேலும் வியாழக்கிழமை தட்சிணாமூர்த்தி வழிபாட்டையும் மேற்கொள்ளுங்கள். சிறப்பு வழிபாடாக சிவகங்கை மாவட்டம் திருப்பதூர், கண்டரமாணிக்கம் அருகில் உள்ள பெரிச்சிக் கோவிலுக்குச் சென்று நவபாஷாண வைரவரையும், வன்னிமரத்தடியில் வீற்றிருக்கும் தன ஆகர்ஷன சனியையும் வழிபட்டு வந்தால் வளர்ச்சி அதிகரிக்கும்.

மங்கையருக்கான மகத்தான பலன்கள்!

மிதுன ராசியில் பிறந்த பெண்களுக்கு கண்டகச் சனியின் ஆதிக்கம் இருப்பதால் உடல் நிலையில் கொஞ்சம் கவனம் தேவை. அடிக்கடி கடன் தொல்லைகளால் அவதிப்படலாம். குரு பார்வை இருப்பதால் பணப் புழக்கம் நன்றாக இருக்கும். தாய்வழி ஆதரவு கிடைக்கும். இதுவரை செய்த பரிகாரங்களுக்குப் பலன் கிடைத்து மணவாழ்க்கை அமையும்.

கணவன்- மனைவிக்குள் அன்பும், பாசமும் கூடும். அடகு வைத்த நகைகளை மீட்டுக்கொண்டு வந்து அணிந்து அழகு பார்ப்பீர்கள். உத்தி யோகத்தில் உள்ளவர்களுக்கு தலைமைப் பொறுப்புகள் தானாக வந்து சேரும். கல்வி முன்னேற்றம் கருதி வாய்ப்பைத் தொடர நினைத்த வர்களுக்கு வாய்ப்பு கைகூடும். குழந்தைகள் இசை, நடனம் போன்ற கலைகளில் ஈடுபட்டு புகழையும், செல்வத்தையும் பெற்றுத் தருவர். சர்ப்ப சாந்திப் பரிகாரங்கள் செய்துகொள்வது நல்லது. குரு, தனுசு ராசியில் சஞ்சரிக்கும் நேரம் சொத்துக்கள் வாங்கும் யோகம் உண்டு. பிள்ளைகளின் சுபகாரியப் பேச்சுகள் முடிவாகும். 

4-10-2018 முதல் 28-10-2019 வரை

மிருகசீரி‌ஷம் 3, 4 பாதங்கள், திருவாதிரை, புனர்பூசம், 1, 2, 3 பாதங்கள் வரை

(பெயரின் முதல் எழுத்துக்கள்: க, கா, கி, கு, ஞ, ச, கே, கோ  உள்ளவர்களுக்கும்)

குரு பார்க்கப் போகும் இடம் பத்து! சேரப் போகின்றது இனி சொத்து!

சராசரி மனிதராய்ப் பிறந்தாலும் சாதனையாளராக மாறிக்காட்டும் மிதுன ராசி நேயர்களே!

புதன் என்ற பொன்னான கிரகத்தின் ஆதிக்கம் பெற்றவர்கள் நீங்கள். மக்கள் சக்தி உங்களிடம் அதிகம் உண்டு. வசீகரப் பேச்சும், வளைந்து கொடுக்கும் தன்மையும்  அதி சீக்கிரத்தில் உங்களை உயர்த்தும். உங்கள் ஒவ்வொரு வெற்றிக்குப் பின்னாலும் ஒருவர் ஒளிந்திருப்பார். சுறுசுறுப்பு அதிகம் பெற்றவர்கள் நீங்கள். மின்னல் வேகத்தில் செயல்படும் மூளையால் இன்னல்களிலிருந்து விடுபடுவீர்கள். எதிலும் வேகம் வேகம் என்று திரியும் உங்களுக்கு தேகத்தைக் கூட கவனிக்க நேரமில்லாமல் பணிபுரிவீர்கள்.

புரட்டாசி 18–ல் பொன்னான குருப்பெயர்ச்சி நாள் வந்துவிட்டது. இதுவரை 5–ம் இடத்தில் சஞ்சரித்து வந்த குரு பகவான் இப்பொழுது 6–ம் இடத்திற்குச் செல்கின்றார். உங்கள் ராசியை இதுவரை பார்த்து வந்த குரு பகவான் இப்பொழுது மாறிவிட்டாரே என்று நீங்கள் பயப்பட வேண்டாம். உங்கள் ராசிக்கு கேந்திராதிபத்ய தோ‌ஷம் பெற்றவர் குரு பகவான். அவர் இதுபோன்ற மறைவிடங்களில் வரும்பொழுது யோகத்தை வாரிவழங்குவர்.

“கெட்டவன் கெட்டிடில் கிட்டிடும் ராஜயோகம்” என்பது பழமொழி. அந்த ராஜயோகம் ஓராண்டுக்கு உங்களுக்கு செயல்படப் போகின்றது.

விருச்சிக குருவின் சஞ்சாரம்!

4.10.2018–ல் விருச்சிக ராசியில் சஞ்சரிக்கும் குரு பகவான் 28.10.2019 வரை 6–ம் இடத்தில் வீற்றிருந்து உங்களது அன்றாட வாழ்க்கையை நன்றாக அமைத்துக்கொடுக்கப் போகின்றார். இடையில் 13.3.2019–ல் தனுசு ராசிக்கு அதிசாரமாகச் செல்கின்றார். பிறகு 10.4.2019–ல் தனுசு ராசியிலேயே வக்ரம் பெறுகின்றார். மீண்டும் 19.5.2019–ல் விருச்சிக ராசியில் சஞ்சரித்து வக்ர கதியிலேயே இருக்கின்றார். 7.8.2019–ல் விருச்சிக குரு வக்ர நிவர்த்தியாகின்றார். 28.10.2019–ல் தனுசு ராசிக்கு செல்லும் பொழுது உங்கள் ராசியை 7–ம் பார்வையாகப் பார்ப்பார். எனவே அதிசார காலம் அதி  உன்னதமான காலமாகும். தொட்டது துலங்கும். கேட்டது கிடைக்கும். நல்ல காரியங்கள் தொடர்ந்து இல்லத்தில் நடைபெறும்.

குரு தற்சமயம் எதிரிகள் ஸ்தானத்தில் சஞ்சரிக்கும் பொழுது கொள்கைப்பிடிப்பைக் கொஞ்சம் தளர்த்திக் கொள்ள நேரிடும். கூட்டு முயற்சியில் அடிக்கடி மாற்றம் செய்ய நினைப்பீர்கள். அத்தியாவசிய பொருட்களையும், ஆடம்பரப் பொருட்களையும் வாங்குவதோடு கட்டிய வீட்டைப் பழுது பார்க்கும் அமைப்பும் உருவாகும். ஆரோக்கியத் தொல்லைகள் அதிகரிக்கும் பொழுது மாற்று மருத்துவம் உங்களுக்கு கைகொடுக் கும்.

குரு பார்வையால் ஏற்படும் பலன்கள்!

குருவின் பரிபூரண பார்வை உங்கள் ராசிக்கு 2, 10, 12 ஆகிய இடங்களில் பதிவாகின்றது. எனவே வாக்கு, தனம், குடும்பம், தொழில் கர்மம், செயல், எதிர்கால முன்னேற்றம் வாகன யோகம், வெளிநாடு பயணம், இடமாற்றம், அரசுவழிச்சலுகை, பிள்ளைகளின் முன்னேற்றம் போன்றவற்றில் எல்லாம் குருவின் பார்வை பலத்தால் புதிய திருப்பங்கள் ஏற்படப் போகின்றன.

குருவின் பார்வை பதியும் இடமான இரண்டாமிடம் புனிதமடைவதால் குடும்ப முன்னேற்றம் சிறப்பாக இருக்கும். இல்லத்திற்குத் தேவையான மின்சாதனப் பொருட்கள் மற்றும் ஆடம்பர, அத்தியாவசியப் பொருட் களை வாங்கி வசதியைப் பெருக்கிக் கொள்வீர்கள். கொடுத்த வாக்கைக் காப்பாற்ற இயலும். கொடுக்கல்–வாங்கல்களில் ஏற்பட்ட மந்தநிலை மாறும்.

புதிய ஒப்பந்தங்கள் வாயிலாகவும், பொருளாதாரநிலை உயரும். பிள்ளைகளின் கல்யாணக் கனவுகள் நனவாகும்.

‘பத்தினைக் குருதான் பார்த்தால் பலவிதத் தொழில்கள் வாய்க்கும், முத்தான பலன் கிடைக்கும், முன்னேற்றம்அதிகரிக்கும்’ என்பது முன்னோர் வாக்கு. அந்த அடிப்படையில் பார்க்கும்பொழுது 10–ம் இடத்தில் குருவின் பார்வை பதிவதால் இதுவரை தொழில் அமையவில்லையே என்று கவலைப்பட்டவர்களுக்கு புதிய தொழில் அமையும். கூட்டாளிகள் வந்திணைந்து பொருளாதாரத்தைப் பெருக்கிக் கொடுக்க முன்வருவர். கேட்ட உதவிகள் வங்கிகளிலும், வள்ளல்களிடமும் கிடைக்கும்.

அரசுப் பணிக்கு முயற்சித்தவர் களுக்கு அரசாங்க வேலை கிடைப்பதற்கான அறிகுறிகள் தோன்றும்.  கர்ம ஸ்தானம் என்று 10–ம் இடம் கருதப் படுவதால் பெற்றோர்களின் உடல் நலத்தில் கவனம் தேவை.

குருவின் பார்வை 12–ம் இடத்தில் பதிவதால் பயணத்தால் பலன் கிடைக்கும். பாகப்பிரிவினைகள் சுமுகமாக முடியும். எத்தனை இடர்பாடுகள் குடும்பத்தில் ஏற்பட்டாலும் அதை எளிதில் சமாளித்துவிடுவீர்கள். அந்நிய தேச யோகம் கூட ஒருசிலருக்கு எதிர்பாராத விதத்தில் அமையலாம். பயண ஸ்தானத்தைப் பார்க்கும் குருவால் இடமாற்றம், ஊர் மாற்றம், வீடு மாற்றம், நாடு மாற்றம் போன்றவைகள் நடைபெறும் சூழ்நிலை உருவாகும். பழைய வாகனத்தைக் கொடுத்துவிட்டுப் புதிய வாகனங்கள் வாங்கும் எண்ணங்கள் சிலருக்கு உருவாகலாம்.  

சப்தம ஸ்தானத்தில் சனி இருப்பதால் புதிய ஒப்பந்தங்களில் கையெழுத்திடும் பொழுதும், தொழில் மாற்றம் செய்ய நினைக்கும் பொழுதும் யோசித்துச்செய்வது நல்லது.

குருவின் பாதசார பலன்கள்!

குரு, பெயர்ச்சியாகும் காலத்தில் தன் சுய சாரத்தில் சஞ்சரிக்கின்றார். எனவே கல்யாண வாய்ப்புகள் கை கூடும். பிரிந்தவர்கள் இணையும் வாய்ப்பு உண்டாகும். பிறரிடம் ஒப்படைத்த பொறுப்புகள் சிறப்பாக நடைபெறும். பெற்றோர்களின் மணிவிழா, மற்றும் பவள விழாக்களை முன்னின்று நடத்துவீர்கள். உடன்பிறப்புகளின் முன்னேற்றத்தில் பங்குகொண்டு உதவி செய்வீர்கள். உத்தியோகத்தில் உள்ளவர்கள் பணிநிரந்தரம் காண்பர். ஒரு சிலர் வி.ஆர்.எஸ். பெற்றுக்கொண்டு புதிய தொழில் தொடங்கும் முயற்சியில் அக்கரை காட்டுவர்.

21.10.2018 முதல் 19.12.2018 வரை அனு‌ஷ நட்சத்திரக் காலில் குரு சஞ்சரிக்கின்றார். சனி சாரத்தில் குரு பகவான் சஞ்சரிக்கும் பொழுது கொஞ்சம் கூடுதல் கவனம் தேவை. இழப்புகளை ஈடுசெய்ய எடுத்த புது முயற்சிகளில் இழப்புகள் ஏற்படலாம். உடன்பிறப்புகள் உங்களுக்கு எதிராகச் செயல்படுவர். கடன் சுமை கூடுகின்றதே என்று கவலைப்படுவீர்கள். பிறருக்கு பொறுப்புச் சொல்லி வாங்கிக் கொடுத்த தொகையால் பிரச்சினைகள் வரலாம். பெற்றோர்களின் ஆதரவு குறையும். இக்காலத்தில் விட்டுக்கொடுத்துச் செல்வதன் மூலம் விருப்பங்கள் நிறைவேறும். பணியாளர் களைத்தட்டிக்கொடுத்துச் செல்வதன் மூலமே தகுந்த பலனும் கிடைக்கும்.

20.12.2018 முதல் 12.3.2019 வரை மற்றும் 18.5.2019 முதல் 27.10.2019 வரை கேட்டை நட்சத்திரக் காலில் குரு சஞ்சரிக்கின்றார். புதன் சாரத்தில் குரு சஞ்சரிக்கும் பொழுது வெற்றி வாய்ப்புகள் வீடு தேடி வரும். வியாபாரத்தில் இருந்த மந்த நிலை மாறும். வெளிவட்டாரப் பழக்கம் விரிவடையும். பொன், பொருட்கள் வாங்கப் போட்ட திட்டம் நிறைவேறும். அடகு வைத்த நகைகளை மீட்டுக் கொண்டு வந்து அணிந்து அழகு பார்க்கும் சூழல் உருவாகும். வெளிநாட்டில் இருந்து நல்ல தகவல் வந்து சேரும். தாய்வழி ஆதரவு கிடைக்கும். பூமிப் பிரச்சினை தீரும்.

13.3.2019 முதல் 17.5.2019 வரை மூல நட்சத்திரக் காலில் குரு பகாவன் சஞ்சரிக்கின்றார். கேது சாரத்தில் குரு சஞ்சரிக்கும் பொழுது தனுசு ராசிக்குள் பிரவேசிக்கின்றார். அதன் பார்வை பலம் உங்கள் ராசியிலேயே பதிகின்றது. எனவே நன்மைகள் அதிகம் நடைபெறும். குடும்பத்தில் மகிழ்ச்சி கூடும். குலதெய்வப் பிரார்த்தனைகளை நிறைவேற்றுவீர்கள். ஆரோக்கியத் தொல்லை அகலும். அரசியல் ஈடுபாடு கொண்டவர்களுக்கு நல்ல பொறுப்புகள் கிடைக்கும். புதுவீடு கிரகப்பிரவேசம் செய்யும்  வாய்ப்பு உண்டாகும். வியாபாரப் போட்டிகள் அகலும்.  

பொதுவாக குரு வாரத்தில், குருவிற்குரிய விசாகம் நட்சத்திரத்தில் குருப்பெயர்ச்சி நிகழ்வதால் நன்மைகள் அதிகம் கிடைக்குமென்றே நம்பலாம். பெயர்ச்சிக்கு முன்னதாகவே யோகபலம் பெற்ற நாளில் திசைமாறிய தென்முகக் கடவுளை வழிபட்டு வருவது நல்லது.

குருவின் வக்ர காலம்!

குரு பகவான் விருச்சிக ராசியிலும், தனுசு ராசியிலும் வக்ரம் பெறுகின்றார். கேந்திராதிபத்ய தோ‌ஷம் பெற்ற கிரகம் வக்ரம் பெறும் பொழுது அதிகமான நன்மைகள் உங்களுக்கு கிடைக்கப் போகின்றது. திட்டமிட்ட காரியங்கள் திட்டமிட்டபடி நடைபெறும். கல்விக்காக எடுத்த முயற்சி கைகூடும். செல்வநிலை ஒருபடி உயரும். அதிகாரிகளின்அனுகூலத்தோடு உத்தியோகத்தில் உள்ளவர்களுக்கு நல்ல பொறுப்புகள் கிடைப்பதோடு சலுகையும் கிடைக்கும். சுண்டல் மாலை அணிவித்து குருவை வழிபட்டால் அண்டி வந்த துன்பங்கள் அனைத்தும் அகலும்.

செல்வ வளம் தரும் சிறப்பு வழிபாடு!

உங்கள் ராசிநாதன் புதன் என்பதால் புதன்கிழமை தோறும் லட்சுமி சமேத விஷ்ணுவை வழிபடுவதோடு ஆஞ்சநேயருக்கு ராமஜெய மாலை அணிவிப்பது நல்லது. ஏகாதசி திதியில் விரதமிருந்து அரியக்குடி திருவேங்கடமுடையான், அலர்மேலுமங்கைத் தாயாரை வழிபடுவதன் மூலம் ஆனந்த வாழ்க்கை அமையும்.

பெண்களுக்கான சிறப்புப் பலன்கள்!

மிதுன ராசியில் பிறந்த பெண்களுக்கு இந்த குருப்பெயர்ச்சி சாதகமான பலன்களை வழங்கும். குடும்பத்தினர்கள் உங்கள் குணமறிந்து நடந்து கொள்வர். கணவன்–மனைவிக்குள் ஒற்றுமை பலப்படும். ஒருவரையொருவர் புரிந்துகொண்டு செயல்பட்டு உறவினர்கள் பாராட்டும் விதம் இல்லறம் அமையும். வேலை காரணமாக வெவ்வேறு ஊர்களில் இருந்த தம்பதியர்கள் இப்போது ஒரே இடத்தில் பணிபுரியும் வாய்ப்புக் கிட்டும். பிள்ளைகளின் திருமண முயற்சி கைகூடும். மேற்படிப்பிற்காக வெளிநாடு செல்ல வேண்டும் என்று விரும்பியவர்களுக்கு நீங்கள் எடுத்த முயற்சி கைகூடுவதோடு உதவியும் கிடைக்கும். பணிபுரியும் பெண்களுக்கு இடம், வாகனம் வாங்கச் சலுகை தருவர். மேலதிகாரிகளின் ஆதரவு கிடைக்கும். சக பணியாளர்களிடம் இருந்த பகை மாறும். வடக்குப் பார்த்த விநாயகர் வழிபாடும், குலதெய்வ வழிபாடும் குரு தட்சிணாமூர்த்தி வழிபாடும் நன்மைகளை வழங்கும்.