பூமி வாங்கும் முயற்சியில் இருந்த தடை அகலும் நாள். புதிய பாதை புலப்படும். ஆற்றல் மிக்கவர்களின் ஆதரவு உண்டு. தொழில் வளர்ச்சி மேலோங்கும். தொகை எதிர்பார்த்த படியே வந்து சேரும்.       

19-07-2019 முதல் 25-07-2019 வரை

இனிமையாகப் பேசும் துலா ராசி அன்பர்களே!

உங்கள் முயற்சிகள் நல்லபடியாக வெற்றி பெறும் என்பதால், மனதில் இருந்த பாரங்கள் குறையும். விவாக சம்பந்தமான விஷயத்தில் இருந்த தடைகள் அகலும். புது வீட்டில் குடியேறுவது, ஆன்மிக பயணங்கள் மேற்கொள்வது போன்றவை மனதுக்கு மகிழ்ச்சியை அளிக்கும். எந்த காரியம் செய்தாலும் சிறிய தடை வரத்தான் செய்யும். ஆனால் இறுதியில் வெற்றி பெறுவீர்கள். நண்பர்கள், உங்கள் உதவியை அதிகம் எதிர்பார்ப்பார்கள். பழைய கடன்கள் தற்போது தொல்லை தரும். நீண்ட தூரப் பயணங்களை சில நாட்கள் தள்ளிப் போடுங்கள். மாணவர்களின் கல்வியில் ஏற்படும் தொய்வு தற்காலிகமானதுதான். எனவே தொடர்ந்து முயற்சி செய்யுங்கள்.

உறவினர்களின் இல்லத்து நிகழ்ச்சிகளில் பங்கேற்க வேண்டியதிருக்கும். எனவே வரவுக்கு மேல் செலவு ஏற்படக்கூடும். இரும்பு சம்பந்தமான தொழில் செய்பவர்களுக்கு பணத் தட்டுப்பாடு உண்டாகும். அப்போது நண்பர்கள் உதவுவார்கள். ஒரு சிலருக்கு கண்வலி அல்லது தலைவலி தோன்றி மறையும். குடும்பத்தில் உள்ள மூத்தவர்களின் ஆரோக்கியத்தில் கவனம் செலுத்துங்கள். பிரிந்த உறவுகள், உங்களால் கிடைக்கும் ஆதாயத்திற்காக சேர வருவார்கள். பிறருக்கு வாக்குறுதி கொடுப்பதையும், ஜாமீன் கையெழுத்து போடுவதையும் தவிர்த்திடுங்கள். செய்யும் காரியங்களில் அவசரப்பட்டால், பின்னாளில் சிரமங்கள் உங்களைத் தேடி வரக்கூடும்.

இந்த வாரம் செவ்வாய்க்கிழமை முருகப்பெருமானுக்கு தீபம் ஏற்றி வழிபாடு செய்யுங்கள்.

ஆடி மாத ராசி பலன்கள்

17-7-2019 முதல் 17-8-2019   வரை

விலை உயர்ந்த பொருட்களை வாங்கும் யோகம்

விகாரி வருடம் ஆடிமாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் சுக்ரன் புதனோடு இணைந்து புத-சுக்ர யோகத்தை உருவாக்கும் விதத்தில் பலம்பெற்றுச் சஞ்சரிக்கின்றார். எனவே பொன், பொருள் சேரும். புகழ் கூடும். புதிய திருப்பங்கள் ஏற்படும். வீட்டிற்குத் தேவையான விலை உயர்ந்த பொருட்கள் வாங்குவதில் கவனம் கொள்வீர்கள். மின்சாதனப் பொருட்கள் பழுதானவற்றை எல்லாம் நீக்கிவிட்டுப் புதியவற்றை பொருத்தும் முயற்சியில் ஆர்வம் காட்டுவீர்கள்.
9-ல் ராகு இருப்பதால் உடனுக்குடன் பணத்தேவைகள் பூர்த்தியாகும். கேட்ட இடத்தில் உதவியும் கிடைக்கும். தந்தை வழிச் சொத்துக்களில் இருந்த தகராறுகள் மாறும். எந்த வழியிலேனும் நீங்கள் செய்த முயற்சியின் விளைவாக வரவேண்டிய பாக்கிகள் வசூலாகும். சொந்தம், சுற்றங்கள் உங்கள் முன்னேற்றத்தைக் கண்டு ஆச்சரியப்படுவர்.

தன சப்தமாதிபதியான செவ்வாய் நீச்சம் பெற்றிருக்கின்றார். அவரோடு கடக ராசியில் சூரியனும் சேர்ந்து வலுவிழக்க வைக்கின்றார். குடும்ப ஸ்தானாதிபதியாக செவ்வாய் விளங்குவதால் குடும்பத்தில் சில பிரச்சினைகள் தலைதூக்கினாலும் சமாளித்து விடுவீர்கள். உடன்பிறப்புகளைச் கொஞ்சம் அனுசரித்துக்கொள்வது நல்லது. `குற்றம் பார்க்கின் சுற்றம் இல்லை' என்பதற்கேற்ப அவர்கள் மீது நீங்கள் குறைசொல்லாமல் அனுசரித்துச் செல்வது நல்லது.

3-ம் இடத்தில் சந்திரன், சனி, கேது ஆகிய மூன்று கிரகங்களும் இருக்கின்றன. தொழில் ஸ்தானாதிபதியான சந்திரன் சுக பஞ்சமாதிபதியான சனியுடன் கூடியிருப்பதால் தொழில் வளர்ச்சியில் எந்தப் பாதிப்புகளும் ஏற்படாது. புதிய நண்பர்களின் அறிமுகத்தோடு பொருளாதார நிலையை உயர்த்திக்கொள்ள புதிய முயற்சிகளில் ஈடுபட்டு வெற்றிபெறும் வாய்ப்பை குருபகவான் உங்களுக்கு வழங்கப் போகின்றார்.

காரணம் குருபகவான் மாதத் தொடக்கத்தில் வக்ரம் பெற்றிருந்தாலும், ஆகஸ்டு 7-ந் தேதி வக்ர நிவர்த்தியாகி பலம் பெறுகின்றார். அப்பொழுது அதன் பார்வைக்கு பலன் அதிகம் கிடைக்கின்றது. உத்தியோக முன்னேற்றம், ஊர் மாற்றங்களால் நன்மை, தொழில் வளர்ச்சி, சமூகத்தில் உயர்ந்தநிலை போன்றவற்றை இந்தக் குரு பார்வை வழங்கும்.

இம்மாதம் வெள்ளிக்கிழமை தோறும் விரதமிருந்து அம்பிகை வழிபாட்டை மேற்கொள்ளுங்கள். ஆடி அமாவாசை அன்று முன்னோர்களை வழிபட்டு வருவதன் மூலம் உங்கள் முயற்சிகளில் வெற்றி கிடைக்கும்.

கடக சுக்ரனும், சிம்மச் சுக்ரனும் சஞ்சாரம்

ஜூலை 24-ந் தேதி கடக ராசிக்குச் சுக்ரன் செல்கின்றார். ஆகஸ்டு 17-ந் தேதி சிம்ம ராசிக்குச் சுக்ரன் செல்கின்றார். உங்கள் ராசிக்குப் பத்தாமிடமான கடகத்தில் சுக்ரன் சஞ்சரிக்கும் பொழுது தொழில் வளர்ச்சி சிறப்பாக இருக்கும். தொலை தூரத்திலிருந்து வரும் தகவல் மூலம் வெளிநாட்டில் பணிபுரியும் வாய்ப்பு கிடைக்கலாம். புத ஆதித்ய யோகம் செயல்படுவதால் தங்கம், வெள்ளி வாங்குவதில் தனிக்கவனம் செலுத்துவீர்கள். பொதுவாழ்வில் புதிய பொறுப்புகள் கிடைக்கும். கல்வி சம்பந்தமாக எடுத்த முயற்சி கைகூடும். லாப ஸ்தானத்தில் சுக்ரன் சஞ்சரிக்கும் பொழுது பணத்தேவைகள் உடனுக்குடன் பூர்த்தியாகும். பெண்வழி ஒத்துழைப்புகளும் உண்டு.

கடக புதனின் சஞ்சாரம்

ஆகஸ்டு 3-ந் தேதி கடக ராசிக்குப் புதன் செல்கின்றார். அங்குள்ள சூரியன், சுக்ரனுடன் இணைந்து அற்புதமான பலன்களை அள்ளி வழங்கப் போகின்றார். குறிப்பாக வெளிநாடு சென்று படிக்க விரும்பும் பிள்ளை களுக்கு உரிய ஏற்பாடுகளை செய்தால் அதில் வெற்றி கிடைக்கும். தூரத்து நாடுகளில் நீங்கள் பணிபுரிய விண்ணப்பித்திருந்தாலும் அழைப்புகள் வந்து சேரலாம். மாமன், மைத்துனர் வழியில் ஏற்பட்ட மனக்கசப்புகள் மாறும். விலகிச்சென்ற சொந்தங்கள் விரும்பி வந்து இணைவர்.

சிம்மச்செவ்வாயின் சஞ்சாரம்

ஆகஸ்டு 10-ந் தேதி சிம்மத்திற்கு செவ்வாய் செல்கின்றார். இக்காலம் ஒரு பொற்காலமாகும். 2, 7 ஆகிய இடங்களுக்கு அதிபதியான செவ்வாய் லாப ஸ்தானத்தில் பலம் பெறும் பொழுது, குடும்ப முன்னேற்றம் கூடுதலாக இருக்கும். கொடுக்கல்-வாங்கல்கள் ஒழுங்காகும். சொத்துக்கள் வாங்க, விற்க வாய்ப்புகள் கைகூடி வரும். உடன்பிறப்பு களின் ஒத்துழைப்போடு ஒரு நல்ல காரியம் இல்லத்தில் நடைபெறும்.

குருவின் வக்ர நிவர்த்திக் காலம்

இதுவரை விருச்சிக ராசியில் வக்ர இயக்கத்தில் இருந்த குரு பகவான் ஆகஸ்டு 7-ந் தேதி வக்ர நிவர்த்தியாகின்றார். பலம்பெற்ற குருவின் பார்வை உங்கள் ராசிக்கு ஜீவன ஸ்தானம், உத்தியோக ஸ்தானம், ஆயுள் ஸ்தானம் ஆகியவற்றின்மீது பதிவாகின்றது. எனவே வேலை கிடைக்கும், தொழில் சம்பந்தமாக முயற்சி எடுத்தவர்களுக்கு புதிய ஒப்பந்தங்கள் வந்து சேரும். ஆரோக்கியத் தொல்லை அகலும். மாற்று மருத்துவம் உடல்நலத்தைச் சீராக்கும். இம்மாதம் ராகு-கேதுக்களுக்கு உரிய வழிபாடுகளை செவ்வாய்க்கிழமை அன்று செய்வது நல்லது.

பணத்தேவையைப் பூர்த்தி செய்யும் நாட்கள்: ஜூலை: 10, 18, 19, 29 ஆகஸ்டு: 3, 4, 7, 8, 9, 15, 16

மகிழ்ச்சி தரும் வண்ணம்: கிரே

பெண்களுக்கான பலன்கள்

இம்மாதம் பணப்பற்றாக்குறை அகலும் மாதமாகும். தொழிலில் எதிர்பார்த்ததைக் காட்டிலும் கூடுதல் வருமானம் கிடைக்கும். கணவன்-மனைவிக்குள் பிணக்குகள் அகன்று இணக்கம் ஏற்படும். பிரியம் அதிகரிக்கும். உங்கள் பெயரிலேயே தொழில் தொடங்குவதற்கு குடும்ப உறுப்பினர்கள் சம்மதிப்பர். தாய்வழி ஆதரவு திருப்தி தரும். உடன்பிறப்புகளில் ஒரு சிலர் மட்டும் உங்கள் குணமறிந்து நடந்து கொள்வர். அத்தியாவசியத் தேவைகளை முன்னிட்டு வாங்கிய கடனைக் கொடுத்து மகிழ்வீர்கள். பிள்ளைகளால் பெருமை வந்து சேரும். அவர்களின் கல்வி முன்னேற்றம் வியக்கத்தக்க விதம் அமையும். பணிபுரியும் பெண் களுக்கு பாராட்டும், புகழும் கூடும். விருப்ப ஓய்வில் வெளிவந்து சுயதொழில் தொடங்கும் முயற்சி ஒருசிலருக்கு கைகூடும்.  இம்மாதம் வெள்ளிக்கிழமை அன்று லட்சுமி கவசம் பாடி அஷ்ட லட்சுமியையும் வழிபாடு செய்து வருவது நல்லது.

19-12-2017 முதல் 28-03-2020 வரை

சித்திரை 3, 4 பாதங்கள், சுவாதி, விசாகம் 1, 2, 3 பாதங்கள் வரை

(பெயரின் முதல் எழுத்துக்கள்: ர, ரி, ரு, ரே, த, தி, து, தே உள்ளவர்களுக்கும்)

ஏழரைச் சனிதான் விலகியது! இனிய வாழ்க்கை மலர்கிறது!

எந்த நேரமும் சந்தோஷமாக இருக்க வேண்டும் என்று விரும்பும் துலாம் ராசி நேயர்களே!

நல்லநேரம் எப்போது வரப்போகிறது என்று காத்திருந்த உங்களுக்கு வந்துவிட்டது நல்லநேரம். டிசம்பர் 19-ந் தேதியுடன் ஏழரைச் சனி விலகுகிறது. இனிய வாழ்க்கை மலரப் போகின்றது. இதுவரை கடந்த காலத்தில் ஏற்பட்ட துன்பங்களில் இருந்து விடுதலை கிடைக்கப் போகிறது. இந்த சனிப்பெயர்ச்சியின் விளைவாக முதன்மையான பலன் கிடைக்கும் ராசிகளில் உங்கள் ராசியும் ஒரு ராசியாக அமையும்.

சனி விலகுவதற்கு முன்னதாகவோ அல்லது விலகிய பின் ஓரிரு மாதங்களுக்குள்ளோ, சிறப்பு ஸ்தலங்களுக்கு சென்று வழிபட்டு வந்தால் இழந்தவைகளை ஈடுசெய்யும் வாய்ப்பு கிடைக்கும். சனிபகவான் சன்னிதியில் எள் தீபம் ஏற்றி வழிபடுவதோடு, கருப்பு வண்ண வஸ்திரம் அணிவித்து எள்ளோதரை நைவேத்தியமிட்டு எண்ணைக் காப்பு சாற்றி அபிஷேக ஆராதனைகள் செய்து வழிபட்டால் பிரச்சினைகள் தீரும்.

திருநள்ளாறு, திருக்கொள்ளிக் காடு, பெரிச்சிக்கோவில், நல்லிப்பட்டி, திருக்கொடியலூர், குச்சானூர் போன்ற ஸ்தலங்களிலும் சனி பகவான் வீற்றிருந்து அருள்பாலிக்கின்றார். வாய்ப்பிருக்கும் பொழுது அருகில் இருக்கும் ஸ்தலங்களுக்குச் சென்று வழிபட்டு ஆராதித்து வரலாம். குறிப்பாக உங்களைப் பொறுத்தவரை சனி விலகும் நேரம் என்பதால் நள மகாராஜாவிற்கு சனி விலகி நல்லருள் கொடுத்த இடமான திருநள்ளாற்றிற்குச் சென்று வழிபட்டு வருவது நல்லது.

பொதுவாக உங்கள் ராசிக்கு 4, 5 ஆகிய இடங்களுக்கு அதிபதியானவர் சனிபகவான். தாய் ஸ்தானம், சுக ஸ்தானம், வாகனம் மற்றும் வளர்ச்சிக்குரிய இடம், வீடு, நிலம், பூமி போன்றவைகளை அறியுமிடம். பூர்வீக சொத்துக்கள் மற்றும் புத்திரர்கள் சம்பந்தப்பட்ட விவரங்களை எடுத்துரைக்கும் இடங்களுக்கெல்லாம் அதிபதியானவர் சனி பகவான்.

உங்கள் ராசி ரீதியாக பார்க்கும் பொழுது முயற்சிக்கு வித்திடும் மூன்றாமிடத்தில் அவர் அடியெடுத்து வைக்கப் போவதால் இனி எடுத்த காரியங்களில் எளிதில் வெற்றி கிடைக்கும். இயல்பான வாழ்க்கையில் ஏற்பட்ட தடைகள் அகலும்.

வெற்றிகள் ஸ்தானம் தன்னில்
வேந்தனாம் சனிதான் வந்தால்
சுற்றமும் நட்பும் போற்றும்!
சுகமெல்லாம் வந்து சேரும்!
கற்றவர் நண்பராவார்!
காரிய வெற்றி கிட்டும்!
முற்றிலும் நன்மை வாய்க்க
முறையாகவே வணங்குவீரே!

என்று ஜோதிட சாஸ்திரம் சொல் கிறது.

முன்னேற்றம் தருமா? மூன்றாமிடத்துச் சனி!

டிசம்பர் 19-ந் தேதி மாபெரும் கிரகம் என்று வர்ணிக்கப்படும் சனி பகவான் மூன்றாமிடத்திற்குச் செல்கின்றார். குடும்ப ஒற்றுமைக்கு குந்தகம் விளைவித்தவர்கள் இனி விலகிச் செல்வர். கடுமையாக முயற்சித்தும் பணத்தை அதிகம் செலவிட்டும் காரியம் முடியவில்லையே என்று கவலைப்பட்ட வர்கள் இனி மகிழ்ச்சி வெள்ளத்தில் மூழ்கப் போகிறீர்கள். மாற்றங்களும், ஏற்றங்களும் வந்து சேரப்போகின்றது.

உடன்பிறப்புகளுக்குள் ஒருவருக்கொருவர் சண்டைபோட்டுக் கொள்ள வழிசெய்தவர்கள் இனி விலகிச் செல்வர். சகோதர ஒற்றுமை பலப்பட்டு மற்ற வர்கள் அதிசயிக்கும் விதத்தில் வாழ்க்கை அமையப் போகின்றது. முன்னேற்றத்திற்கு வித்திடும் இடம் மூன்றாமிடமாகும். இதை மறைவிடம் என்றும் சொல்வார்கள். மறைவிடத்திற்கு சனி வரும் பொழுதெல்லாம் நிறைவான பலனைக் கொடுக்கும் என்பது நம்பிக்கை.

அந்த அடிப்படையில் இப்பொழுது கூடப்பிறந்தவர்களின் பாசமழையில் நனையப் போகிறீர்கள். பூர்வீக சொத்துக்களைப் பிரித்துக் கொள்வதில் சகோதரர்களுக்குள் சமரசம் ஏற்பட்டு நல்ல வழி பிறக்கப் போகின்றது. நீண்ட நாட்களாக நடைபெற்று வந்த வழக்குகளில் வெற்றி கிடைக்கும். குடும்பப் பிரச்சினைகள் படிப்படியாக நல்ல முடிவிற்கு வரும். பிள்ளைகளுக்கு வேலை கிடைத்து அவர்கள் மூலமும் உங்களுக்கு உதிரி வருமானங்கள் வந்து சேரலாம். காது மற்றும் கழுத்து போன்றவற்றில் வந்த தொல்லைகள் அகலும். குடும்ப வருமானம் கூடுதலாக இருக்கும்.

தொழிலில், நீங்கள் சந்தோஷமடையும் விதத்தில் அற்புதமாகப் பணியாற்றும் பணியாளர்கள் அமையப் போகிறார்கள். நம்பிக்கைக்குரியவர்களை இனம் கண்டு கொண்டு சேர்த்துக் கொள்வீர்கள். முயற்சியில் தீவிரம் காட்டும் நேரமிது. உள்ளத்தில் ஊக்கமும், உறுதியும் வந்து சேரும். இதுபோன்ற காலங்களில் புதிய முயற்சிகளில் ஈடுபடும்பொழுது முன்பின் தெரியாதவர்கள் கூட உங்கள் முன்னேற்றத்திற்கு வித்திடுவர். பூரணமாகச் சனி விலகும் நேரம் என்பதால் இனி நற்பலன்களே உங்களை நாடி வரப்போகின்றது.

சனியின் பார்வை பலன்கள்!

உங்கள் ராசிக்கு 3-ம் இடத்தில் சஞ்சரிக்கும் சனி பகவான் 5, 9, 12 ஆகிய இடங்களைப் பார்க்கப் போகின்றார். சனியின் பார்வை பதியும் இடங்களை நாம் அறிந்து கொண்டு அதற்கு ஏற்ற விதத்தில் நமது வாழ்க்கைப் பாதையை அமைத்துக்கொள்ளலாம். குறிப்பாக அதன் பார்வை 5-ம் இடத்தில் பதிவதால் பிள்ளை செல்வம் இல்லையே என்று கவலைப்பட்டவர்களுக்கு புத்திரப்பேறு கிடைப்பதற்கான அறிகுறிகள் தென்படும். இதுவரை ஏறாத கோவில் இல்லை, பார்க்காத வைத்தியம் இல்லை, செய்யாத பரிகாரங்கள் இல்லை என்று சொல்லி ஆதங்கப்பட்டவர்களுக்கு இப்பொழுது செய்த பரிகாரங்களுக்கு பலன் கொடுக்கப்போகின்றது.

பிள்ளைகளின் உயர்கல்வியை முன்னிட்டு வெளிநாட்டில் செய்த ஏற்பாடுகள் பலன் தரும். படித்து முடித்தும் வேலையில்லாமல் இருக்கிறார்களே அவர்களும் உத்தியோகத்திற்குச் சென்றால் உதிரி வருமானங்கள் கிடைக்குமே, மிதமிஞ்சிய பொருளாதாரத்தில் மிதக்கலாமே என்று சிந்தித்தவர்களுக்கு விடை கூறும் விதத்தில் வந்துவிட்டது இந்தச் சனிப்பெயர்ச்சி. வெளிநாட்டிலும் வேலை கிடைக்கலாம். உள்நாட்டில் அரசுப்பணிக்கு முயற்சி செய்தவர் களுக்கு அதுவும் கைகூடும். பெண் குழந்தைகளின் கல்யாண வாய்ப்புகளும் ஏற்படும்.

அடுத்துச் சனியின் பார்வை ஒன்பதாமிடத்தில் பதிவதால் பெற்றோர் வழி உறவில் ஏற்பட்ட விரிசல்கள் அகலும். பூர்வீக சொத்துக்களில் இருந்த வில்லங்கங்கள் விலகும். வாகனம் வாங்கும் முயற்சியில் ஆர்வம் காட்டுவீர்கள். பழைய வாகனங்களைக் கொடுத்துவிட்டுப் புதிய வாகனங்களை வாங்கி அனைவரையும் ஆச்சரியத்தில் ஆழ்த்துவீர்கள். சனியின் பார்வை பனிரெண்டாமிடத்தில் பதிவதால் பயணங்கள் அதிகரிக்கும். குடும்பத்தின் சார்பாக முன்னோர்கள் கட்டிய கோவிலைப் பராமரித்து குடமுழுக்கு விழா செய்வதிலும் ஆர்வம் காட்டுவீர்கள்.

குதூகலம் தரும் குருப்பெயர்ச்சிக் காலம்!

4.10.2018-ல் விருச்சிக ராசியில் குரு சஞ்சரிக்கப் போகின்றார். அதன்பிறகு 28.10.2019-ல் தனுசு ராசிக்கு குரு செல்கின்றார். இந்த இரண்டு பெயர்ச்சிகளும் இழப்புகளை ஈடுசெய்யும் விதத்திலேயே இருக்கின்றது. குரு பார்க்க கோடி நன்மையல்லவா? எனவே, விருச்சிகத்தில் குருப் பெயர்ச்சி நடைபெறும் பொழுது குடும்ப முன்னேற்றம் கூடும். சுபவிரயங்கள் அதிகரிக்கும். தொழில் வளர்ச்சி கூடும். வாங்கல்- கொடுக்கல்களை ஒழுங்கு செய்து கொள்வீர்கள். ஆரோக்கியத் தொல்லையில் இருந்து விடுபட்டு அதிக உற்சாகத்துடன் பணிபுரிவீர்கள்.

தனுசு ராசியில் குரு சஞ்சரிக்கும் பொழுது வெளிநாட்டு யோகம் வெற்றி கரமாக வந்து சேரும். விவாகப் பேச்சுகள் முடிவாகும். இளைய சகோதரத்தோடு இணக்கம் ஏற்பட்டு எடுத்த முயற்சிகளில் வெற்றி கிடைக்கும். பெற்றோர்களின் ஆதரவு உண்டாகும்.

ராகு-கேது பெயர்ச்சிக் காலம்!

13.2.2019-ல் மிதுன ராசியில் ராகுவும், தனுசு ராசியில் கேதுவும் சஞ்சரிக்கப் போகிறார்கள். 9-ம் இடத்தில் ராகுவும், 3-ம் இடத்தில் கேதுவும் சஞ்சரிக்கும் பொழுது திடீர் தனலாபம் வந்து திக்குமுக்காடச் செய்யும். போட்டியாகச் செயல்பட்டவர்கள் விலகுவர். பொருளாதாரத்தில் இருந்த தேக்க நிலை மாறும். உடன்பிறப்புகள் உங்கள் முன்னேற்றத்திற்கு உறுதுணையாக இருப்பர். பூமி சம்பந்தப்பட்ட வழக்குகளில் புதிய திருப்பம் ஏற்படும்.

அருகிலிருக்கும் சிவாலயத்திற்குச் சென்று வெள்ளிக்கிழமை தோறும் அம்பிகை வழிபாட்டை மேற்கொள்ளுங்கள். பிரதோஷ நாளில் நந்தீஸ்வரர் வழிபாட்டை மேற்கொள்ளுங்கள். சிறப்பு வழிபாடாக சிவகங்கை மாவட்டம் காரைக்குடி அருகிலிருக்கும் கோவிலூரில் உள்ள கொற்றவாளஸ்வரர், திருநெல்லையம்மனை வழிபட்டு வெற்றி வாய்ப்பு களை வரவழைத்துக் கொள்ளுங்கள்.

மங்கையருக்கான மகத்தான பலன்கள்!

துலாம் ராசியில் பிறந்த பெண்களுக்கு முழுமையான ஏழரைச் சனி விலகுகிறது. இனி உங்கள் எண்ணங்கள் ஈடேறும். எடுத்த காரியங்களில் வெற்றி கிடைக்கும். பிரிந்த உறவினர்கள் மீண்டும் வந்திணைவர். பிரச்சினைகள் படிப்படியாக மாறும். இழந்த சொத்துக்கள், நகைகள் மீண்டும் பெறும் வாய்ப்புக் கிடைக்கும். கணவன்-மனைவிக் குள் ஒற்றுமை பலப்படும். ஒருவரை ஒருவர் புரிந்து கொண்டு செயல் படுவீர்கள். உடல்நலம் சீராகி உற்சாகத்தோடு காணப்படுவீர்கள்.

உத்தியோகத்தில் நல்ல முன்னேற்றங்கள் வந்து சேரும். ஊதிய உயர்வும், நினைத்த இடத்திற்கு பதவி உயர்வோடு கூடிய இடமாற்றமும் கிடைக்கும். தனுசு ராசியில் குரு சஞ்சரிப்பது மிகுந்த அற்புதமான நேரமாகும். தங்கம், வெள்ளி தடையின்றி வந்து சேரும். வாகன யோகம் முதல் அனைத்து வளர்ச்சியும் உண்டாகும். ஆரம்பத்தில் சுக ஸ்தானத்தில் கேதுவும், தொழில் ஸ்தானத்தில் ராகுவும் இருப்பதால் வருமானம் திருப்தி தரவும், வசதி வாய்ப்புகள் பெருகவும், ராகு-கேது பிரீதி செய்வது நல்லது.

சனியின் வக்ர காலம்!

25.4.2018 முதல் 21.8.2018 வரை மூல நட்சத்திரக் காலில் சனி வக்ரம் பெறகின்றார். 8.5.2019 முதல் 3.9.2019 வரை மீண்டும் பூராட நட்சத்திரக் காலில் சனி வக்ரம் பெறுகின்றார்.

உங்கள் ராசிக்கு 4, 5 ஆகிய இடங்களுக்கு அதிபதியானவர் சனிபகவான். அவர் வக்ரம் பெறுவது அவ்வளவு நல்லதல்ல. குடும்பத்தில் குழப்பங்கள் அதிகரிக்கும். கூட்டாளிகள் விலகுவர். சுகங் களும், சந்தோஷங்களும் குறையும். இதுபோன்ற காலங்களில் எச்சரிக்கை தேவை. பிள்ளைகளால் பிரச்சினைகள் அதிகரிக்கும். வெளியூரில் அல்லது வெளிநாட்டில் வசிக்கும் பிள்ளைகளை கண் காணித்துக்கொள்வது நல்லது. பூர்வீக சொத்துக்களில் மீண்டும் விவகாரங்கள் தலைதூக்கலாம். கொடுத்த பணம் குறிப்பிட்டபடி வசூலாகாமல் போகலாம். தொழிலில் புதியவர்களை நம்பி ஏமாற்றமடையும் சூழ்நிலையும் உண்டு.

4-10-2018 முதல் 28-10-2019 வரை

சித்திரை 3, 4 பாதங்கள், சுவாதி, விசாகம் 1, 2, 3 பாதங்கள் வரை

(பெயரின் முதல் எழுத்துக்கள்: ர, ரி, ரு, ரே, த, தி, து, தே உள்ளவர்களுக்கும்)

இரண்டில் வந்தது குரு பகவான் இல்லற வாழ்வில் மகிழ்ச்சி வரும்!

எந்த நாளும் இனிய நாளாக அமைய என்ன செய்யலாம் என்று சிந்தித்துக் கொண்டிருக்கும் துலாம் ராசி நேயர்களே!

அள்ளிக்கொடுக்கும் வெள்ளிச் சுக்ரனின் ஆதிக்கம் பெற்ற ராசியைக் கொண்டவர்கள் நீங்கள். ஆக்கப்பூர்வமாக சிந்தித்து செயல்படுவீர்கள். வாழ்க்கையில் எல்லாச் செல்வங்களையும் ஒரு சேரப் பெற்று வாழ வேண்டுமென்று விரும்புபவர்கள் நீங்கள். வசீகரத் தோற்றத்திற்கு சொந்தக் காரர்களாக இருக்கும் நீங்கள் எடுக்கும் முயற்சிகளில் எப்பொழுதும் பின்வாங்க மாட்டீர்கள். சுய கவுரவத்திற்காகவும், புகழுக்காகவும் பணம் செலவு செய்யவும் தயங்க மாட்டீர்கள். கவிதை, கதை எழுதுவதிலும், ஆடல், பாடல், நடிப்பு, இயக்கம், படம் எடுத்தல் போன்றவற்றில் சிறந்து விளங்குபவர்களும் நீங்கள் தான்.

உங்கள் ராசியில் இதுவரை சஞ்சரித்துப் பலவித இன்னல்களையும், இதயக்குமுறல்களையும் கொடுத்த குரு பகவான், இனி புரட்டாசி 18 முதல் புதிய பாதையைக் காண வைக்கப் போகின்றார்.

புரட்டாசி 18–ல் குரு பகவான் தன்னுடைய நட்சத்திரக்காலில் வியாழக் கிழமை அன்று பெயர்ச்சியாவதால் நல்ல திருப்பங்கள் ஏற்படும். உங்கள் ராசியைப் பொறுத்தவரை 3, 6 ஆகிய இடங்களுக்கு அதிபதியானவர் குரு பகவான். உடன்பிறந்தோர், வெற்றிச் செய்திகள், வீரம், அஞ்சாநெஞ்சம், அணிகலன்கள் வாங்கும் யோகம், வழக்குகளில் திசைதிருப்பம், எதிரிகளின் பலம் ஆகியவற்றைக் குறிக்குமிடமாக 3–ம் இடம் விளங்குவதால் அதற்குரிய காரகத்துவங்களை குரு பகவான் சிறப்பாகச் செய்து கொடுப்பார்.

ஆறாமிடத்தைப் பொறுத்தவரை எதிர்ப்பு, வியாதி, கடன், இடையூறு சக்தி, களைப்பு, வீண்பழி, கண்நோய், நேரம் தவறுதல், தியாக வாழ்வு, பங்காளிப்பகை, கருத்து வேறுபாடு போன்றவற்றை எடுத்துரைக்கும் இடமாகும். இந்த இடத்தில் ஆதிபத்யங்களைக் கொண்டு தன ஸ்தானத்தில் சஞ்சரிக்கும் குரு பகவான் நல்ல பலன்களை அள்ளி வழங்குவார்.

விருச்சிக குருவின் சஞ்சாரம்!

4.10.2018–ல் விருச்சிக ராசியில் சஞ்சரிக்கும் குரு பகவான் 28.10.2019 வரை தன ஸ்தானத்தில் வீற்றிருந்து பல வழிகளிலும் உங்களுக்குப் பொருளாதார நிலையை உயர்த்திக் கொடுக்கப் போகின்றார். இடையில் 13.3.2019–ல் தனுசு ராசிக்கு அதிசாரமாக செல்கின்றார். பிறகு 10.4.2019–ல் தனுசு ராசியிலேயே வக்ரம் பெறுகின்றார். மீண்டும் 19.5.2019–ல் விருச்சிக ராசியில் சஞ்சரித்து வக்ர கதியிலேயே இருக்கின்றார். 7.8.2019–ல் விருச்சிக குரு வக்ர நிவர்த்தியாகின்றார். 28.10.2019–ல் தனுசு ராசிக்கு முறையாகச் செல்கின்றார்.

குரு பார்வை தரும் பலன்கள்!

குருப்பெயர்ச்சியின் பொழுது 6, 8, 10 ஆகிய இடங்களைப் பார்க்கின்றார். குருப்பெயர்ச்சியான உடன் உங்கள் ராசிக்கு ருண, ரோக, சத்ரு ஸ்தானத்தையும், இழப்புகள் ஸ்தானத்தையும், தொழில் ஸ்தானத்தையும் தனது இன்னல் தீர்க்கும் பார்வையால் பார்க்கப் போகின்றார்.

‘ஆறினை குரு தான் பார்த்தால் அடைந்திரும் கடன்கள் யாவும்’ என்பார்கள். எனவே குரு பார்வை 6–ல் பதியும் பொழுது, கடன் சுமை குறையும். மூடிக்கிடந்த தொழிலுக்கு திறப்பு விழா நடத்துவீர்கள். முன்னேற்றப் பாதையில் அடியெடுத்து வைப்பதற்கான அறிகுறிகள் தோன்றும். பணியிடத்தில் எதிர்பாராத விதத்தில் சலுகைகள் கிடைக்கும். நோய்கள் அகல மாற்று மருத்துவத்தை மேற்கொள்வீர்கள்.

‘எட்டினை குருதான் பார்த்தால் இழப்பினை ஈடுசெய்வீர்கள்’ என்பது முன்னோர் வாக்கு. அந்த அடிப்படையில் சென்ற ஆண்டு தொழிலில் ஏற்பட்ட இழப்புகளை ஈடுசெய்ய புதிய வாய்ப்புகள் வந்து சேரும். ஒப்பந்தங் களில் கையெழுத்திட்டு மகிழ்வீர்கள்.  மனப்பயம் அகலும். அடகு வைத்த நகைகளை மீட்டுக்கொண்டு வந்து அணிவித்து அழகு பார்ப்பீர்கள்.

‘பத்தினை குருதான் பார்த்தால் முத்தான தொழில்கள் வாய்ப்பும் முன்னேற்றமும் கூடும்’. துணிந்து எடுத்த முடிவுகளால் துயரங்களிலிருந்து விடுபடுவீர்கள். கடின உழைப்பிற்கான பலன் கிடைக்கும் நேரமிது. உத்தியோகத்தில் உள்ளவர்களுக்கு அந்நிய தேசத்திலிருந்து வரும் அழைப்புகள் மகிழ்ச்சி தரும். ஒருசிலர் வி.ஆர்.எஸ். பெற்றுக் கொண்டு விரும்பிய வண்ணம் தொழில் செய்ய கூட்டாளிகளை சேர்த்துக்கொள்ள முன்வருவர்.

உங்கள் ராசிக்கு 3–ம் இடத்தில் கேதுவும், சனியும் இணையும் நேரத்தில் உடன்பிறப்புகளை கொஞ்சம் அனுசரித்துக் கொள்வது நல்லது. பூர்வீக சொத்துக்களைப் பிரித்துக்கொள்ளும் பொழுது சகோதரர் கருத்துக்களுக்கு இணங்கிச் சென்றால் தான் காரியங்கள் முடிவடையும். என்றைக்கோ வாங்கிய சொத்தில் இடர்பாடுகளும், வில்லங்கங்களும் வரலாம். சவுபாக்கிய துர்க்கை வழிபாடு சகல பாக்கியங்களையும் வழங்கும்.

குருவின் பாதசார பலன்கள்!

குருப்பெயர்ச்சியாகும் பொழுது குரு தனது சுய சாரத்தில் சஞ்சரிக்கின்றார். 3, 6 ஆகிய இடங்களுக்கு அதிபதியான குரு, தன் காலிலேயே சஞ்சரிக்கும் பொழுது முன்னேற்றம் மிக அதிகமாக இருக்கும். பணம் முடையாக இருக்கின்றதே என்று சொன்ன நீங்கள் மூட்டை மூட்டையாக பணம் வருகின்றதே என்று சொல்லுமளவிற்கு தொழிலில் வளர்ச்சி கூடும். சகோதரர்களின் கல்யாணத்தை முன்னின்று நடத்தி வைப்பீர்கள். பொது நலத்தில் இருப்பவர்களுக்கு பொருத்த மான தலைமைப் பதவியும் கிடைக்கலாம். அரசு மூலம் கிடைக்க வேண்டிய சலுகைகளும் கிடைக்கும்.

21.10.2018 முதல் 19.12.2018 வரை அனு‌ஷ நட்சத்திரக் காலில் குரு சஞ்சரிக்கின்றார். சனி சாரத்தில் குரு பகவான் சஞ்சரிக்கும் பொழுது, வெளிவட்டாரத் தொடர்பு விரிவடையும். வியக்கும் தகவல் வீடு வந்து சேரும். அந்நிய இனத்தவர்களின் ஆதரவால் நல்ல பலகாரியங்களைச் செய்து முடிப்பீர்கள். போட்டி பந்தயங்களில் வெற்றி கிடைக்கும். பூமி வாங்கும் யோகம் உண்டு.

ஒருசிலர் எதிர்கால நலன் கருதி இடம் வாங்கி அதில் வாடகைக்கு கடை கட்டிவிட முன்வருவர். பொதுவாக சொத்துக்களில் ஆதாயம் கிடைக்கும் நேரமிது. தாயின் உடல் நலத்தில் கவனம் தேவை. பிள்ளைகள் வெளிநாடு செல்லப் போட்ட திட்டங்கள் நிறைவேறலாம்.

20.12.2018 முதல் 12.3.2019 வரை மற்றும் 18.5.2019 முதல் 27.10.2019 வரை கேட்டை நட்சத்திரக்காலில் குரு பகவான் சஞ்சரிக்கின்றார். புதன் காலில் குரு சஞ்சரிக்கும் பொழுது புதிய  வாகனங்கள் வாங்கப் போட்ட திட்டங்கள் நிறைவேறும். விலங்கு வளர்ப்பில் ஆர்வம் காட்டுவீர்கள். ஒரு சிலருக்கு மாடு கன்று வாங்கி வளர்க்கும் யோகம் உண்டு. விவசாயத்துறையில் ஈடுபட்டவர்களுக்கு நல்ல லாபம் கிடைக்கும். புதன் உங்கள் ராசிக்கு 9, 12 ஆகிய இடங் களுக்கு அதிபதியானவர். எனவே தந்தை வழியில் இருந்த கருத்து வேறுபாடுகள் அகலும். பங்காளிப் பகை மாறும். பூர்வீகக் கோவில்களைப் பராமரிக்க எடுத்த முயற்சி கைகூடும். பாகப்பிரிவினைகள் சுமுகமாக முடியும்.

13.3.2019 முதல் 17.5.2019 வரை மூலம் நட்சத்திரக் காலில் குரு பகவான் சஞ்சரிக்கின்றார். கேது சாரத்தில் குரு பகவான் சஞ்சரித்து தனுசு ராசிக்குள் பிரவேசிப்பதால் உங்கள் ராசிக்கு 7, 9, 11 ஆகிய இடங்கள் புனிதமடைகின்றன. எனவே இக்காலம் ஒரு பொற்காலமாக அமையும். உத்தியோகத்திற்காக முயற்சி செய்தவர்களுக்கு அது உடனடியாகக் கைகூடும். பணி நீக்கம் செய்யப்பட்டு பல நாட்களாக வேலையில்லாமல் இருந்தவர்கள் மீண்டும் பணியில் அமர்த்தப்படுவர். வாரிசுகளின் வளர்ச்சி பெருமைப்படத்தக்கதாக அமையும். பணப்புழக்கம் அதிகரிக்கும். கரைந்த சேமிப்புகளை ஈடுகட்டுவீர்கள். புதிய ஒப்பந்தங்கள் மூலம் கூடுதல் வருமானம் கிடைக் கும்.

செல்வ வளம் தரும் சிறப்பு வழிபாடு!

வெள்ளிக்கிழமை தோறும் மீனாட்சி அம்மன் வழிபாட்டை மேற்கொள்வது நல்லது. சுவாதி நட்சத்திரமன்று அல்லது யோகபலம் பெற்ற நாளில் சிவகங்கை மாவட்டம் கீழச்சிவல்பட்டி அருகில் உள்ள இளையாற்றங்குடியில் வீற்றிருந்து அருள்வழங்கும், நித்தியகல்யாணி சமேத கயிலாசநாதரையும், குழையத் தழுவிய காமாட்சியையும் வழிபட்டு வருவது நல்லது. அம்பிகை வழிபாடு இன்பம் வழங்கும்.

குருவின் வக்ர காலம்!

இந்த பெயர்ச்சி காலத்தில் விருச்சிக ராசியிலும், தனுசு ராசியிலும் குரு வக்ரம் பெறுகின்றார். இந்த வக்ர காலம் உங்களுக்கு வளர்ச்சி அதிகமாகவே இருக்கும். குடும்ப முன்னேற்றம் திருப்தி தரும். அருகிலிருப்பவர்களின் ஆதரவு அதிகமாகக் கிடைக்கும். பிள்ளைகளின் கல்யாணக் கனவுகளை நனவாக்குவீர்கள். குடும்ப ஒற்றுமை கூடும். பிரிந்தவர்கள் வந்திணைவர். சுயதொழில் தொடங்க முன் வருபவர்களுக்கு வங்கிகளிலும் சலுகைகள் கிடைக்கும். பணிநிரந்தரமாகவில்லையே என்று கவலைப்பட்டவர்களுக்கு பணி நிரந் தரமாகும். தொழில்புரிபவர்கள்  லாபம் சம்பாதிப்பர். பணியாளர் தொல்லை அகலும். உழைப்பிற்கேற்ற பலன் கிடைத்து மகிழும் உன்னதமான நேரமிது.

பெண்களுக்கான சிறப்புப் பலன்கள்!

இந்த குருப்பெயர்ச்சி எதிர்  பார்ப்புகளை நிறைவேற்றும் விதத்திலேயே இருக்கின்றது. வருமானம் திருப்திகரமாக இருக்கும். கணவன்–மனைவிக்குள் அன்பும், பாசமும், அதிகரிக்கும். அன்னியோன்யம் ஏற்படும். பிள்ளைகள் வழியில் எதிர்பார்த்த சுபகாரியங்கள் கை கூடும். அவர்களின் மேற்படிப்பை முன்னிட்டு வெளிநாடு செல்லும் யோகம் கூட ஏற்படலாம். மாற்று மருத்துவத்தின் மூலம் உடல்நலம் சீராகும். தாய் மற்றும் உடன்பிறப்புகளின் உதவியும் ஒத்துழைப்பும் கிடைக்கும். தனுசில் அதிசாரமாக குரு சஞ்சரிக்கும் பொழுது அதன் பார்வை லாப ஸ்தானத்தில் பதிவதால் பணிபுரியும் பெண்களுக்கு பதவி உயர்வும், ஊதிய உயர்வும் கிடைக்கும். உங்கள் பெயரில் சொத்துக்கள் வாங்க குடும்ப உறுப்பினர்கள் சம்மதிப்பர். வைரவர் வழிபாடு வளர்ச்சியைக் கூட்டும். குலதெய்வ வழிபாடு குடும்ப முன்னேற்றத்தைக் கொடுக்கும். குருப் பெயர்ச்சி சமயத்தில் குருவிற்குரிய சிறப்பு ஸ்தலங்களுக்குச் சென்று வழிபட்டு வருவது நல்லது.