பயணத்தால் பலன் கிடைக்கும் நாள். வளர்ச்சிப் பாதையில் அடியெடுத்து வைப்பீர்கள். தாய்வழி உறவினர்களால் அனுகூலம் உண்டு. சுபகாரியப் பேச்சுக்கள் முடிவாவதற்கான அறிகுறிகள் தோன்றும்.

18-1-2019 முதல் 24-1-2019 வரை

பாசத்துடன் பழகும் மீன ராசி அன்பர்களே!

இந்த வாரம் நற்பலன்கள் தொடர்ந்து நடைபெறக்கூடிய நிலை அமையும். உத்தியோகஸ்தர்களுக்கு அலுவலகத்தில் திருப்திகரமான நிலை காணப்படும். தொழிற்பிரிவினர் உழைப்பிற்கேற்ற ஊதியத்தைப் பெற்று மகிழும் நிலை உண்டு. சக தொழிலாளர்கள் நன்றாக ஒத்துழைப்பார்கள். மாணவர்கள் மிகுந்த அக்கறை செலுத்தி பாடங் களிலும், வகுப்பிலும் முன்னிலை பெறுவார்கள். கலைஞர்களுக்குப் பொருளாதார உயர்வு ஏற்படக்கூடிய வகையில் புதிய வாய்ப்புகள் அமைந்து உற்சாகத்தைத் தரும்.

அரசியல்வாதிகள் பரபரப்பாக இயங்கக்கூடிய சூழல் ஏற்படும். வியாபாரம் லாபகரமாகவே நடைபெற்று வரும். கடன் கொடுப்பதில் கவனமாக இருப்பது அவசியம்.

பெண்கள் எதிலும் அக்கறையாக செயல்படுவதன் மூலம் குடும்பத்தில் சச்சரவுகள் தவிர்க்கப்படும். குடும்பத்தின் அமைதி நிலவும். உங்களின் குடும்ப விவகாரங்களில் மூன்றாவது நபரை தலையிட அனுமதிக்காதீர்கள். அவரால் பிரச்சினைகள் உருவாகலாம். பொறுப்புகளில் கவனமாக இருங்கள். தந்தையின் உடல்நலத்தில் அக்கறை செலுத்த வேண்டிய தருணம் இது. குடும்பத்தில் சுபநிகழ்ச்சி ஒன்று நடைபெறும். திடீர் அதிர்ஷ்ட வாய்ப்பால் சிலருக்கு தனவரவு உண்டாகும். பயணம் ஒன்றை மேற்கொள்வதன் மூலம் மிகுந்த பயன் கிடைக்கும். சிலருக்கு ஆரோக்கிய குறைபாடு ஏற்பட்டுத் தொல்லை தரக்கூடும்.

நீங்கள் வியாழக்கிழமை அன்று ஹயக்ரீவரை வழிபட்டு வாருங்கள். ஞாபகசக்தி உண்டாகும். வெற்றி வாய்ப்புகள் பெருகும்.

19-12-2017 முதல் 28-03-2020 வரை

(பூரட்டாதி 4-ம் பாதம், உத்ரட்டாதி, ரேவதி வரை) (பெயரின் முதல் எழுத்துக்கள்: தீ,து,ஓ,ஸ்ரீ,தே,தொ,சு உள்ளவர்களுக்கும்)

பத்தாமிடத்தில் சனி! பணம் வரும் தொழிலில் இனி!

உறவினர்களை ஆதரிப்பதில் ஒப்பற்ற குணம் படைத்த மீன ராசி நேயர்களே!

தேசப்பற்றும், தெய்வப் பற்றும் அதிகம் பெற்ற உங்களுக்கு இதுவரை 9-ம் இடத்தில் சஞ்சரித்து வந்த சனி பகவான் இப்பொழுது 10-ம் இடத்தில் சஞ்சரித்து பல வழிகளிலும் நன்மைகளை வழங்கப் போகின்றார்.

முத்தான தொழில்அமைய வேண்டு மானால் 10-ம் இடம் நன்றாக இருக்க வேண்டும். தொழில்கள் மட்டுமல்ல, செய்யும் செயல்களில் திறமை பளிச்சிடவும், வையகத்தார் போற்றும் வாழ்க்கை அமைந்திடவும் 10-ம் இடம் பலம்பெற்றிருக்க வேண்டும். அப்படிப்பட்ட இடத்திற்கு உங்கள் ராசிக்கு லாபாதிபதியாகவும், விரயாதிபதியாகவும் விளங்கும் சனி பகவான் வருகின்றார்.

பயண ஸ்தானமாகவும் 12-ம் இடம் கருதப்படுகின்றது. எனவே, தொழில் மற்றும் உத்தியோகத்தில் அவரவர் தகுதிக்கு ஏற்ப திடீர் இடமாற்றங்கள் உருவாகலாம்.

சுமார் இரண்டரை ஆண்டு காலம் 10-ம் இடத்தில் சஞ்சரிக்கப் போகும் சனி உங்களுக்கு எல்லையற்ற நன்மைகளைக் கொடுக்க, சனிக்கிழமை தோறும் வாலில் மணி கட்டிய ஆஞ்சநேயரை வழிபட்டு வருவது நல்லது. மேலும் புதுக்கோட்டை மாவட்டம் வேகுப்பட்டி விஸ்வரூப ஆஞ்சநேயர், சேலம் அருகிலுள்ள நாமக்கல் விஸ்வ ரூப ஆஞ்சநேயர், காரைக்குடி அருகிலுள்ள வ.சூரக்குடி, சுசீந்திரம் போன்ற ஊர்களில் வீற்றிருந்து அருள் வழங்கும் ஆஞ்சநேயரையும் வழிபடுவது நல்லது.

நளனுக்கு நல்வாழ்வை அமைத்துக்கொடுத்த திருநள்ளாறு சனி பகவான் மற்றும் மதுரை தேனி அருகிலுள்ள குச்சானூர் சனிபகவான் ஸ்தலங் களுக்கும் யோகபலம் பெற்ற நாளில் சென்று சனி ஓரையில் வழிபட்டு வருவது நல்லது. சனி பிடிக்காத தெய்வம் என்று சொல்லப்படும் விநாயகப் பெருமான், அனுமன் ஆகிய இரண்டும் இணைந்த ஆதியந்தப் பிரபு படத்தை வைத்து இருபுறமும் இரண்டு தெய்வங்களுக்கும் உரிய மாலைகளைச் சூட்டி தொடர்ந்து பூஜையறையில் வைத்து வழிபாடு செய்யலாம்.

ஜீவன ஸ்தானம் தன்னில்
சேர்கின்ற சனியை நாளும்
கோவிலில் சென்று பார்த்துக்
கும்பிட்டு மகிழ்ந்திருந்தால்
ஆவன நமக்குச் செய்வார்!
அனைத்திலும் வெற்றி தந்தே
பூமகள் அருளால் நாளும்
பொருள் குவிய வழிவகுப்பார்!

என்று ஜோதிட சாஸ்திரம் சொல்கின்றது.

அந்த அடிப்படையில் குடும்ப முன்னேற்றம் கூட சனி பகவான் வழிபாடு வழிவகுத்துக்கொடுக்கும்.

பத்தாமிடத்திற்கு வந்த முத்தான சனி!

டிசம்பர் 19-ந் தேதி முதல் பத்தாமிடத்திற்கு வந்த முத்தான சனி பகவான் ஒரு மிகப்பெரிய கிரகமாக விளங்குபவர். ‘மந்தன்’ என்றும், ‘காரி’ என்றும், சனியை அழைப்பது வழக்கம். மந்த கதியில் இயங்குவதால் அவரை ‘மந்தன்’ என்று சொல்லுவர். ஆனால் ‘மந்தன் செய்யுமளவிற்கு மகேஸ்வரன் கூடச் செய்ய மாட்டான்’ என்று சொல்வார்கள். அந்த அடிப்படையில் கிள்ளிக் கொடுக்காமல் அள்ளிக்கொடுக்கும்ஆற்றல் சனி பகவானுக்கு உண்டு.

பொதுவாக 10-ம் இடம் என்று கருதும் பொழுது தொழில், ஜீவனம், கர்மம், அரசு பணி, ராஜாங்க ஆதரவு, சேவை மனப்பான்மை, உயர்ந்த நிலையில் இருப்பவர்களின் பழக்கம், அதிகார வர்க்கத்தினரின் அனுகூலம், வணிக முன்னேற்றம், திரயம் தேடும் முயற்சி, பிதுர் கடன் செய்தல், சொத்து சுகங்களோடு வாழ்க்கை நடத்துதல் போன்றவற்றை எல்லாம் விளக்குமிடமாகவே செயல்படுகின்றன. மேற்கண்ட நன்மைகள் அனைத்தும் இனி சனியின் பார்வையில் வரப்போகின்றது.

10-ல் வந்த சனி தெய்வ வழிபாட்டில் ஆர்வம் காட்ட வைப்பார். வாங்கல்- கொடுக்கல்கள் ஒழுங்காக வழி பிறக்கும். பழைய கடன்கள் அனைத்தையும் அடைத்துவிட்டு நிம்மதிப் பெருமூச்சு விடுவீர்கள். குடும்ப உறுப்பினர்களில் யாருக்கேனும் அஷ்டமத்துச் சனி, அர்த்தாஷ்டமச் சனி இருக்குமேயானால் புதிதாக தொழிலுக்கு மூலதனம் போட கடன் வாங்கும் சூழ்நிலை உருவாகலாம். மிக உயர்ந்த மனிதர்களின் ஒத்துழைப்பு உண்டாகும். தந்தை வழிக்கடன், கடமை களைச் செய்து முடிப்பீர்கள். பெற்றோர்களின் உடல் நலத்தில் அச்சுறுத்தல் ஏற்பட்டு அகலும். அசையா சொத்துகள் வாங்குவதில் ஆர்வம் காட்டுவீர்கள்.

சனியின் பார்வை பலன்கள்!

உங்கள் ராசிக்கு 10-ம் இடத்தில் சஞ்சரிக்கும் சனி பகவான் அதன் பார்வையை 4, 7, 12 ஆகிய இடங்களில் பதிகின்றார். எனவே சுக ஸ்தானம், மாத்ரு ஸ்தானம், வித்யா, வியாபார ஸ்தானம், களத்திர ஸ்தானம், பயண ஸ்தானம், விரய ஸ்தானம் போன்றவற்றில் எல்லாம் அதன் பார்வை பதிந்து உங்களுக்குப் பலன்களைத் தர ஏதுவாக இருக்கின்றார்.

சனியின் பார்வை 4-ல் பதிவதால் ஆரோக்கியத் தொல்லைகள் ஏற்பட்டாலும் ஆகாரத்தில் கட்டுப்பாடு செலுத்தி அதனைச் சரிசெய்து கொள்ளுங்கள். அலைச்சலைக் குறைத்துக் கொள்ளுங்கள். பயணங்களால் தொல்லையும் உண்டு, நன்மைகளும் உண்டு. நிறுத்தப்பட்ட படிப்பை மீண்டும் தொடரும் வாய்ப்பு கிடைக்கும். மறதி அதிகரிக்கும் நேரமிது. எனவே படிப்பில் ஈடுபட்டிருப்பவர்கள் முழுமையாக படிப்பில் கவனம் செலுத்துவது நல்லது. புதிய வாகனங்களை ஒரு சிலர் வாங்கி மகிழ்வர். தாயின் உடல்நலத்தில் கவனம் தேவை. சுயஜாதகத்தில் திசாபுத்தி பலமிழந்திருப்பவர்கள் பிரதோஷ காலத்தில் நந்தியெம்பெருமானை வழிபாடு செய்தால் நல்ல வாய்ப்புகள் இல்லம் தேடி வரும்.

சனியின் பார்வை 7-ம் இடத்தில் பதிவதால் கல்யாண வாய்ப்புகள் கைகூடும். கடல் தாண்டி வரும் தகவல் நல்ல தகவல்களாக இருக்கும். குடும்பத்தில் விட்டுக் கொடுத்துச் செல்வதே நல்லது. விட்டுப்போன வரன்கள் கூட மீண்டும் வந்து சேரலாம். தட்டுப்பாடுகள் அகலும். தன வரவு திருப்திகரமாக இருக்கும். அதே நேரத்தில் வீண் விரயங்கள் ஏற் படாமல் இருக்க சுபவிரயங்களை மேற்கொள்வது நல்லது. வீடு வாங்கும் முயற்சி அல்லது கட்டும் முயற்சியில் ஆர்வம் செலுத்துங்கள். தங்கம், வெள்ளி போன்றவற்றில் முதலீடு செய்யும் வாய்ப்பு உருவாகும். கீழ் வீடு கட்டியவர்களுக்கு மாடி வீடு கட்டும் எண்ணம் உருவாகும். முன்னோர்கள் கட்டி வைத்த ஆலயங்களுக்கு சேவைசெய்ய வாய்ப்புகள் கைகூடிவரும்.

சனி 12-ம் இடத்தைப் பார்ப்பதால் பயணங்களால் பலன் கிடைக்கும். பாகப்பிரிவினைகள் சுமுகமாக முடியும். புண்ணிய ஸ்தலங்களுக்கு யாத்திரைகள் செல்லும் வாய்ப்பு உண்டு.

குதூகலம் தரும் குருப்பெயர்ச்சி காலம்!

4.10.2018-ல் விருச்சிக ராசியில் குரு சஞ்சரிக்கப் போகின்றார். அதன்பிறகு 28.10.2019-ல் தனுசு ராசிக்கு குரு செல்கின்றார். இந்த இரண்டு பெயர்ச்சியும் உங்களுக்கு நன்மைகளை வழங்கும்.

விருச்சிகத்தில் குரு சஞ்சரிக்கும் பொழுது அதன் பார்வை உங்கள் ராசியிலேயே பதிவதால் மிகுந்த யோகமான காலமாகும். ஆரோக்கியம் சீராகி ஆனந்தப்படுத்தும். அன்றாட வாழ்க்கை நன்றாக அமையும். பண வரவு திருப்திதரும். கல்யாண வாய்ப்பு கள் கைகூடும். மேலும் 3, 5 ஆகிய இடங்களையும் குரு பார்ப்பதால் சகோதர ஒற்றுமை பலப்படும். பூர்வீக சொத்துகளில் இருந்த பிரச்சினைகள் அகலும்.

தனுசு ராசியில் குரு சஞ்சரிக்கும் பொழுது அதன் பார்வை 2, 4, 6 ஆகிய இடங்களில் பதிகின்றது. எனவே குடும்பத்தில் ஏற்பட்ட குழப்பங்கள் அகலும். எதிரிகளை இனம் கண்டு கொள்வீர்கள். உத்தியோக மாற்றங்கள் உறுதியாகும். சம்பளப் பாக்கிகள் வந்து சேரும்.

ராகு-கேது பெயர்ச்சிக் காலம்!

13.2.2019-ல் மிதுன ராசியில் ராகுவும், தனுசு ராசியில் கேதுவும் சஞ் சரிக்கப் போகிறார்கள். இதன் விளைவாக கேட்ட இடத்தில் உதவிகள் கிடைக்கும். தாய்வழி ஆதரவு உண்டு. படிப்பில் இருந்த தடை அகலும். தன்னம்பிக்கையோடு பணிபுரிவீர்கள். புதிய தொழில் தொடங்கும் முயற்சியில் ஆர்வம் கூடும். புனிதப் பயணங் களில் கவனம் செலுத்துவீர்கள். திருமணம் எதிர்பார்த்த இடத்தில் நல்ல விதமாக முடியும். தொழில் போட்டிகள் அகலும். பிள்ளைகள் பொறுப்புணர்ச்சியோடு நடந்து கொள்வர்.

சுக ஸ்தான ராகு உற்சாகத்துடன் செயல்பட்டு வெற்றி காண வேண்டுமானால் ராகு-கேது பிரீதிகளை செய்து கொள்வது நல்லது.

தொட்ட காரியங்களில் வெற்றி பெற வழிபாடு!

திங்கட் கிழமைதோறும் சிவாயலத்திற்கு சென்று விநாயகப் பெருமானையும், வியாழக்கிழமை தோறும் குருதட்சிணாமூர்த்தியையும் வழிபட்டு வாருங்கள். பவுர்ணமியன்று கிரிவல வழிபாடும், அமாவாசையன்று முன்னோர் வழிபாடும் நற்பலன் வழங்கும். சிறப்பு வழிபாடாக புதுக்கோட்டை மாவட்டம் வேந்தன் பட்டியிலுள்ள நினைத்ததை நிறைவேற்றும் நெய் நந்தீஸ்வரரை வழிபட்டு நிகழ்காலத் தேவைகளை பூர்த்தி செய்து கொள்ளுங்கள்.

சனியின் வக்ர காலம்!

25.4.2018 முதல் 21.8.2018 வரை மூல நட்சத்திரக் காலில் சனி வக்ரம் பெறுகின்றார். 8.5.2019 முதல் 3.9.2019 வரை மீண்டும் பூராட நட்சத்திரக் காலில் சனி வக்ரம் பெறுகின்றார்.

இக்காலத்தில் நன்மையும், தீமையும் கலந்தே நடைபெறும். தொழிலில் கொஞ்சம் கூடுதல் விழிப் புணர்ச்சி தேவை. எதிரிகளை நம்பி ஏமாறும் சூழ்நிலை உண்டு. உதிரி வருமானங்கள் வந்தாலும், விரயங்களைச் சமாளிக்க இயலாது. பிறருக்கு பணப்பொறுப்புகள் சொல்வதன் மூலம் சிக்கல்கள் ஏற்படலாம். வெளிநாட்டில் இருந்து அனுகூலமற்ற தகவல் வந்து சேரும். கட்டிய வீட்டை அல்லது வாங்கிய வீட்டைக் கடன்சுமையின் காரணமாக ஒருசிலர் விற்க நேரிடலாம்.

மங்கையருக்கான மகத்தான பலன்கள்!

மீன ராசியில் பிறந்த பெண்களுக்கு இந்த சனிப்பெயர்ச்சி வரவும், செலவும் சமமாகும் பெயர்ச்சியாகவே இருக்கின்றது. விரயாதி பதியாகவும், லாபாதிபதியாகவும் சனி விளங்குவதால் விரயத்திற்கு ஏற்ற தொகை வந்து கொண்டே இருக்கும். கல்யாணம், கிரகப்பிரவேசம் பெற்றோர்களின் மணி விழாக்கள் போன்றவைகள் நல்ல விதமாக நடைபெறும். கணவன்- மனைவிக்குள் ஒற்றுமை பலப் படும்.

விருச்சிகத்தில் குரு சஞ்சரிக் கும் பொழுது பணப்புழக்கம் அதிகரிக்கும். ஆரோக்கிய தொல்லை அகலும். தாய்வழி ஆதரவு எப்பொழுதும் போல் இருக்கும். உடன் பிறப்புகளை அனுசரித்துக் கொள்ள வேண்டிய நேரமிது. தந்தையின் உடல் நலத்தில் கவனம் தேவை. பிள்ளைகளின் சுபகாரியப் பேச்சுகள் நல்ல முடிவிற்கு வரும். உத்தியோகத்தில் உள்ளவர்களுக்கு பொருத்தமான வேலை அமையும். குலதெய்வ வழிபாடும், குரு வழிபாடும் குடும்ப முன்னேற்றத்திற்கு வித்திடும்.

27-7-2017 முதல் 13-2-2019 வரை

(பூரட்டாதி 4–ம் பாதம், உத்ரட்டாதி, ரேவதி வரை)

(பெயரின் முதல் எழுத்துக்கள்: தீ,து,ஓ,ஸ்ரீ,தே,தொ,சு உள்ளவர்களுக்கும்)

பஞ்சம ஸ்தானத்தில் ராகு படிப்படியாய் முன்னேற்றம்!

நல்ல தகவல்களையே நாளும் கேட்க வேண்டுமென்று நினைக்கும் மீன ராசி அன்பர்களே!

ஜூலை 27–ந் தேதி ராகு–கேதுக் களின் பெயர்ச்சி நிகழவிருக்கிறது. இதுரை 6–ம் இடமான சிம்மத்தில் ராகுவும், 7–ம் இடமான கன்னி ராசியில் குருவும் அமைந்து அஷ்டலட்சுமி யோகத்தை உருவாக்கி நல்ல பலன்களை அள்ளி வழங்கி வந்தார்கள். இப்பொழுது 5–ம் இடத்திற்கு ராகுவும், 11–ம் இடமான லாப ஸ்தானத்திற்கு கேதுவும் செல்கிறார்கள். 11–ல் கேது சஞ்சரித்தாலும், குருவின் பார்வை அதன் மீது செப்டம்பர் 2–ந் தேதி வரை பதிகிறது. அப்போது குரு துலாம் ராசிக்குச் சென்று, உங்கள் ராசிக்கு 2,4,12 ஆகிய இடங்களைப் பார்க்கப் போகிறார். எனவே அதன் பிறகு உங்களுக்கு மிகுந்த முன்னேற்றங்கள் வந்து சேரும். டிசம்பர் மாதம் 19–ந் தேதி நிகழவிருக்கும் சனிப்பெயர்ச்சியும், தொழில் முன்னேற்றத்தை வழங்கப்போகிறது.

தற்சமயம் கடக ராசியில் சஞ்சரிக்கும் ராகு, பஞ்சம ஸ்தானம் எனப்படும் புத்திர ஸ்தானத்தில் சஞ்சரிக்கப் போவதால் பிள்ளைகளின் சுபகாரியப் பேச்சுகள் நல்ல முடிவிற்கு வரும். குடும்பத்தில் மங்கல ஓசை கேட்கும். வாரிசு இல்லாதவர்களுக்கு ராகு–கேது பெயர்ச்சிக்குப் பின்னால் செய்யும் பரிகாரங்களின் வாயிலாக மகப்பேறு உண்டாகும். கவுரவம், அந்தஸ்து உயரும். பட்டங்களும், பதவிகளும் வந்து சேரும். திட்டங்கள் தீட்டாமலேயே சில காரியங்கள் நல்ல முடிவிற்கு வரும். அதிகார பலமிக்க பெரிய பதவிகளும் தேடி வரலாம். உத்தியோகத்தில் எதிர்பார்த்த நல்ல மாற்றங்கள் வந்து சேரும்.

பஞ்சம ஸ்தானத்தில்  சஞ்சரிக்கும் ராகு!

இதுவரை கடந்த ஒன்றரை ஆண்டு காலமாக 6–ம் இடத்தில் சஞ்சரித்து வந்த ராகு, ஜூலை 27–ந் தேதியன்று பின்னோக்கி வந்து 5–ம் இடத்திற்கு வருகிறார். இக்காலம் ஒரு பொற் காலம் என்றே சொல்லலாம். அனைத்துக் கடன்களும் விலகப் போகிறது. ஆதரவுக் கரம் நீட்டுபவர்களின் எண்ணிக்கை உயரப்போகிறது. நினைத்ததை நினைத்த நேரத்தில் செய்து முடிப்பீர்கள். நிகழ்காலத் தேவைகள் உடனுக்குடன் பூர்த்தியாகும்.

பஞ்சமத்தில் ராகுபலம் பெற்றிருந்தால்
பார்ப்பவர்கள் நாகதோ‌ஷம் என்று சொல்வார்!
அஞ்ச வேண்டாம் அதற்குரிய வழிபாடேற்றால்
அற்புதமாய் ராகுபலன் அளிப்பார் அன்றோ?

என்று ஜோதிட சாஸ்திரம் சொல்கின்றது.

பொதுவாக பஞ்சம ஸ்தானத்தில் ராகு சஞ்சரிக்கும் பொழுது புத்திர

தோ‌ஷம் உருவாகும் என்றும், பிள்ளைகளைப் பற்றிய கவலை மேலோங்கும் என்றும் சொல்வார்கள். பிள்ளைகள் சம்பந்தமாக ஏதேனும் குறை ஏற்படலாம். அல்லது வயதிற்கு வந்த பிள்ளை கள் பெற்றோர் சொல்லும் கருத்துகளை ஏற்று நடக்காமல் முரண்பாடாக செயல்படலாம். ஒரு சிலருக்கு பிள்ளைச்செல்வம் உருவாவதில் தாமதம் ஏற்படும். அதே நேரத்தில் நாகதெய்வ வழிபாடுகளை நம்பிக்கையோடு செய்தால் சோகங்கள் மாறும்.

உங்களுக்கு ராசிநாதனே குருவாக விளங்குதால், எப்பொழுதும் குரு வருள் உங்களோடு இணைந்திருக்கும். அதனால் மற்ற தோ‌ஷங்களின் பாதிப்புகள் பெரிய அளவில் ஏற்படாது. தற்சமயம் குரு உங்கள் ராசியையும், 11–ல் சஞ்சரிக்கும் கேதுவையும் பார்க்கிறார். எனவே  குருப்பெயர்ச்சிக்குள் ராகு–கேதுக்களின் மூலம் மிகுந்த நன்மைகள் கிடைக்கப் போகிறது. குருப்பெயர்ச்சிக்குப் பின்னால் குருவின் பார்வை பலம் வாக்கு, தனம், குடும்பம் எனப்படும் 2–ம் இடத்தில் பதிவதால் வாக்கு வலிமை கூடும்.

பணவரவிற்கு பஞ்சம் இருக்காது. தொழில் முன்னேற்றம் அதிகரிக்கும். தொலை தூரத்தில் இருந்து வரும் தகவல் தொழிலுக்கு உறுதுணை புரிவதாக அமையும் நிலையான வருமானத்திற்கு வழி அமைத்துக் கொள்வீர்கள். நீடித்த நோய் அகலும். பூர்வீக சொத்து களை விற்று விட்டுப் புதிய சொத்து கள் வாங்குவதில் மும்முரம் காட்டுவீர்கள். கட்டிய வீட்டைப் பராமரிக்கும் சூழ்நிலை ஒரு சிலருக்கு உண்டு. பிள்ளைகள் வழியில் ஏதேனும் கவலைகள், பிரச்சினைகள் இருந்தால் அது தீரும். நல்ல மனம் படைத்தவர்களின் உதவியோடு அதைச் சரிசெய்து கொள்வீர்கள். வேலைக்குச் செல்ல நினைப்பவர்களுக்கு நல்ல வேலை கிடைக்கும்.

லாப ஸ்தானத்தில் சஞ்சரிக்கும் கேதுவின் பலன்!

இதுவரை உங்கள் ராசிக்கு விரய ஸ்தானத்தில் சஞ்சரித்து வந்த கேதுபகவான், ஜூலை 27–ந் தேதி முதல் லாப ஸ்தானத்திற்கு வருகிறார். அதுமட்டுமல்லாமல் குருவின் 5–ம் பார்வையும் பெறுகிறார். எனவே எண்ணற்ற நல்ல காரியங்கள் இல்லத்தில் நடைபெறப் போகிறது. தொழில் வளர்ச்சி மேலோங்கும். தொகை வரவு திருப்தி தரும். புதிய திட்டங்கள் தீட்டிப் பெரிய அளவில் தொழில் செய்ய வேண்டும் என்று நினைப்பீர்கள்.

மிகப்பெரிய தொழிற்சாலை, நிறுவனங்கள் நடத்த அரசு வழியில் ஏதேனும் முயற்சிகள் செய்தால் அந்த முயற்சிகளில் பலன் கிடைக்கும். பணியாளர்கள் பலரையும் அமர்த்தி வேலை பார்க்கும் வாய்ப்பு கிடைக்கும். முக் கியப் புள்ளிகள் உங்கள் முன்னேற்றப் பாதைக்கு வழிவகுத்துக் கொடுப்பர்.

மூத்த சகோதரத்தால் வந்த தொல்லைகள் அகலும். முகஸ்துதிக்காக பழகியவர்கள் உங்களை விட்டு விலகுவர். புதிய பங்குதாரர்கள் வந்திணைந்து பொருளாதார நிலை உயர வழிவகுத்துக் கொடுப்பர். படித்த படிப்பிற்கேற்ற வேலை கிடைக்கவில்லையே என்று நினைத்தவர்களுக்கு இப்பொழுது அது கிடைக்கும். கேது இருக்குமிடம் சனியின் வீடு என்பதால் ஸ்திரமான பலன்களை அது வழங்கும் என்பதில் எள்ளளவும் சந்தேகமில்லை.

பெண்களுக்கு!

மீன ராசியில் பிறந்த பெண்களுக்கு பொருளாதார நிலை திருப்திகரமாக இருக்கும். பிறந்த வீட்டாரின் அன்பும், புகுந்த வீட்டாரின் ஆதரவும் கிடைக்கும். கணவன்–மனைவி இடையே பாசமும், நேசமும் கூடும். பிணக்குகள் அகன்று இணக்கம் ஏற்படும். பிள்ளைகளின் வளர்ச்சி பெருமைக்குரியதாக இருக்கும். ஆடை, ஆபரண சேர்க்கை உண்டு. உத்தியோகத்தில் உள்ளவர்களுக்கு பணிபுரியும் இடத்தில் நல்ல பெயர் கிடைக்கும். கேது பலத்தால் ஆன்மிக நாட்டம் அதிகரிக்கும். கணவரோடு சேர்ந்து வெளிநாட்டில் வசிக்கும் யோகம் கூட ஒருசிலருக்கு உண்டு. குருப்பெயர்ச்சிக்குப் பின்னாலும் குருவின் பார்வை குடும்ப ஸ்தானத்தில் பதிவதால் கவலைப்பட வேண்டியதில்லை. வாரம்தோறும் குருவழிபாட்டை மேற்கொள்வதோடு ராகு– கேதுக்களுக்கு பிரீதி செய்துகொள்வதும் நல்லது.

வாழ்க்கை வசந்தமாக வழிபாடு!

ஐந்தாமிடத்து ராகுவால் அதிர்ஷ்ட வாய்ப்புகளை வரவழைத்துக் கொள்ளவும், 11–ம் இடத்து கேதுவால் பண வரவு பெருகவும் ராகு–கேதுக்களின் சாரபலமறிந்து நாகதெய்வ வழிபாட்டை மேற்கொள்வதோடு சனிக்கிழமை தோறும் ஆனைமுகப் பெருமானை அர்ச்சித்து வழிபடுவது நல்லது.

பாதசாரப்படி ராகு தரும் பலன்கள்!

புதன் சாரத்தில் ராகு சஞ்சரிக்கும் பொழுது (27.7.2017 முதல் 3.4.2018 வரை)

நிலம், வீடு, வாகனம் ஆகியவை வாங்க, தீட்டிய திட்டங்கள் நிறைவேறும் நேரம் இது. சுகங்களும், சந்தோ‌ஷங்களும் அதிகரிக்கும். புதிய கூட்டாளிகள் நட்பால் பொருளாதாரத்தைப் பெருக்கிக் கொள்வீர்கள். தொழில் வளர்ச்சியடைய புதிய யுக்திகளைக் கையாளுவீர்கள். வாழ்க்கைத் துணையால் நன்மை கிடைக்கும்.

சனி சாரத்தில் ராகு சஞ்சரிக்கும் பொழுது (4.4.2017 முதல் 11.12.2018 வரை)

சனி உங்கள் ராசிக்கு லாபாதிபதியாகவும், விரயாதிபதியாகவும் இருப்பவர். இந்த கால கட்டத்தில் அவர் லாபத்தையும் கொடுத்து, விரயத்தையும் கொடுப்பார். வருமானம் திருப்தி கரமாக இருந்தாலும், வளர்ச்சிப் பாதைக்கென்று செலவும் உண்டாகும். ஒரு சிலருக்கு சேமிப்பு கரையலாம். இடமாற்றம், வீடுமாற்றங்கள் வந்து சேரும். தூரதேசப் பயணங்களால் பலன் கிடைக்கும். ஆரோக்கியத் தொல்லையில் இருந்து விடுபடுவீர்கள்.

குரு சாரத்தில் ராகு சஞ்சரிக்கும்பொழுது (12.12.2018 முதல் 12.2.2019 வரை)

குருவின் சாரத்தில் ராகு சஞ்சரிக்கும் பொழுது தொட்ட காரியங்களில் வெற்றி கிடைக்கும். தோள் கொடுத்து உதவ நண்பர்கள் முன்வருவார்கள். வெற்றிச் செய்திகள் வீடுதேடி வரும். தொழில் தொடங்கும் வாய்ப்புகளுக்குப் போதிய முதலீடு கிடைக்கவில்லையே என்று கவலைப்பட்டவர்களுக்கு இப்பொழுது புதிய கூட்டாளிகள் வந்திணைந்து, தொழில் முன்னேற்றம் காண வழிவகுத்துக் கொடுப்பர். அரசியல் ஈடுபாடு கொண்டவர்களுக்கு புதிய பொறுப்புகளும், பதவிகளும் கிடைக்கும். உத்தியோகத்தில் உள்ளவர்களுக்கு ஊதிய உயர்வும், பதவி உயர்வும் எதிர்பார்த்தபடி வந்துசேரும். மகப்பேறு வாய்க்காதவர்களுக்கு மகப்பேறு கிட்டும் நேரமிது.

பாதசாரப்படி கேது தரும் பலன்கள்!

செவ்வாய் சாரத்தில் கேது சஞ்சரிக்கும் பொழுது (27.7.2017 முதல் 29.11.2017 வரை)

இக்காலத்தில் குடும்பத்தில் சுபகாரியங்கள் நடைபெறும். துணிவும், தன்னம்பிக்கையும் கூடும். ஆரோக்கியத் தொல்லையிலிருந்து விடுபடுவீர்கள். செல்வநிலை ஒருபடி உயரும். முக்கிய எண்ணங்கள் நிறைவேறி மனநிம்மதியை வழங்கும். சகோதர ஒற்றுமை பலப்படும். நிலபுலன்களில் முதலீடு செய்வீர்கள். எதிரிகள் விலகுவர். இக்காலத்தில் முருகப்பெருமான் வழிபாட்டை மேற்கொள்வது நல்லது.

சந்திரன் சாரத்தில் கேது சஞ்சரிக்கும்பொழுது (30.11.2017 முதல் 7.8.2018 வரை)

இது ஒரு அதிர்ஷ்ட காலமாகும். குடும்பத்தில் உள்ளவர்களின் தேவைகளைப் பூர்த்தி செய்ய வாய்ப்புகள் கைகூடிவரும். பொருளாதாரத்தில் நிறைவு ஏற்படும். பிள்ளைகளின் எதிர்கால நலன் கருதி செய்யும் முயற்சிகளில் வெற்றி கிடைக்கும்.

சூரிய சாரத்தில் கேது சஞ்சரிக்கும் பொழுது (8.8.2018 முதல் 12.2.2019 வரை)

இக்காலத்தில் கொஞ்சம் கூடுதல் கவனம் தேவை. எதிரிகளின் தொல்லை அதிகரிக்கும். வழக்குகளில் திடீர் திருப்பம் ஏற்படும். உத்தியோக மாற்றங்கள் திடீரென ஏற்பட்டு மனக்கவலையைக் கொடுக்கும். குடும்ப உறுப்பினர்களின் ஆரோக்கியத் தொல்லைக்காக அதிகமான மருத்துவச் செலவுகள் உண்டாகலாம். பிரதோ‌ஷ வழிபாடு இக்காலத்தில் நன்மைகளை வழங்கும்.

4-10-2018 முதல் 28-10-2019 வரை

(பூரட்டாதி 4–ம் பாதம், உத்ரட்டாதி, ரேவதி வரை)

(பெயரின் முதல் எழுத்துக்கள்: தீ, து, ஓ, ஸ்ரீ, தே, தொ, சு உள்ளவர்களுக்கும்)

குருவின் பார்வை பதிகிறது! குழப்பம் எல்லாம் அகல்கிறது!

பிறருக்கு உதவும் பெருந்தன்மையான குணம் பெற்ற மீன ராசி நேயர்களே!

உங்கள் ராசிநாதனான குரு பகவான் நவகிரகத்தில் சுபகிரகமாக விளங்குபவர். எனவே சமூகத்தில் உங்களுக்கு மதிப்பும், மரியாதையும் அதிகமாகவே இருக்கும். மனதில் உதித்த கருத்துக்களை மறைக்காமல் எடுத்துரைப்பதால் உங்களுக்கு நீங்களே எதிராகவும் இருப்பீர்கள். முன்னோர்களின் சடங்கு, சம்பிரதாயங்களில் அதிக நம்பிக்கை கொண்டவர்கள் நீங்கள். தெய்வப்பற்றுமிக்க நீங்கள் நட்பிற்கு முக்கியத்துவம் கொடுப்பீர்கள். உறவினர்களைக் காட்டிலும் நண்பர்களே உங்களுக்கு அதிகம் நன்மைகளைச் செய்பவர்களாக விளங்குவர்.

இந்த குருப்பெயர்ச்சியால் சிறப்பான பலன்கள் உங்களுக்கு கிடைக்கப் போகின்றது. புரட்டாசி 18  பொன் கொழிக்கும் நேரமாகும். மணவாழ்க்கை மகிழ்ச்சிகரமாக அமையும். மாற்றுக் கருத்துடையோர் மனம் மாறுவர். நோய் நொடிகள் அகலும். நொந்த மனம் மாறும். தாய், சேய் உறவில் திருப்தி ஏற்படும்.   

இதுவரை அஷ்டமத்தில் அடி யெடுத்து வைத்த குரு பகவான் அல்லல்களை அடுக்கடுக்காகக் கொடுத்திருக்கலாம். இனி 9–ம் இடத்திற்கு வந்து உன்னதப் பலன்களை வழங்கப் போகின்றார். பொன், பொருட்களின் சேர்க்கை உண்டு. புகழ் கூடும். ‘வெற்றி மீது வெற்றி வந்து என்னைச் சேரும், அதை வாங்கித்தந்த பெருமையெல்லாம் குருவைச் சேரும்’ என்று சொல்லப் போகிறீர்கள். அந்தளவிற்கு இந்த குருப்பெயர்ச்சி நன்மைகளை வழங்கப்போகின்றது.

 விருச்சிக குருவின் சஞ்சாரம்!

4.10.2018–ல் முதல் விருச்சிக ராசியில் சஞ்சரிக்கும் குரு பகவான் 28.10.2019 வரை உங்கள் ராசிக்கு ஒன்பதாமிடத்தில் சஞ்சரித்து ஒளிமயமான எதிர் காலத்தை வழங்கப் போகின்றது. 13.3.2019–ல் தனுசு ராசிக்கு அதிசாரமாக செல்கின்றார். பிறகு 10.4.2019–ல் தனுசு ராசியிலேயே வக்ரம் பெறுகின்றார். மீண்டும் 19.5.2019–ல் விருச்சிக ராசியில் சஞ்சரித்து வக்ர கதியிலேயே இருக்கின்றார். 7.8.2019–ல் விருச்சிக குரு வக்ர நிவர்த்தியாகின்றார். 28.10.2019–ல் தனுசு ராசிக்கு முறையாகச் செல்கின்றார். குருப்பெயர்ச்சியின் பொழுது குருவின் பார்வை 1, 3, 5 ஆகிய இடங்களில் பதிகின்றது. எனவே உடல்நலம் சீராகும். உற்சாகத்தோடு பணிபுரிவீர்கள். வருமானம் திருப்தி தரும். பூர்வ புண்ணியத்தின் பலனாக உங்களுக்கு எவையெல்லாம் கிடைக்க வேண்டுமோ அவை அனைத்தும் வந்து சேரும் நேரமிது.

குரு பார்வை தரும் பலன்கள்!

குருப்பெயர்ச்சிக் காலத்தில் குருவின் பார்வை ஜென்ம ராசியில் பதிவதால் நன்மைகள் அதிகம் கிடைக்கும். ‘ஜென்மத்தை குருதான் பார்த்தால் செல்வாக்கு உயரும்’ என்பர். எனவே வாழ்க்கைப் பாதை சிறப்பாக அமையும். ஆரோக்கியம் சீராகி ஆனந்தப் படுத்தும். புகழேணியின் உச்சிக்குச் செல்ல வழிபிறக்கும். நினைத்ததை நடத்திக் காட்டுவீர்கள். நேச மனப்பான்மை கொண்டவர்களின் எண்ணிக்கை அதிகரிக்கும். சேமிப்பு உயரும்.

குருவின் பார்வை 3–ம் இடத்தில் பதிகின்றது. ‘மூன்றினை குருதான் பார்த்தால் முன்னேற்றம் அதிகரிக் கும்’ என்பர். எனவே கண்ணேறு படும் விதம் உங்கள் முன்னேற்றம் வரப்போகின்றது. சகோதரர்கள் பகை மாறி பாசம் காட்டுவார்கள். ‘அண்ணன் என்னடா, தம்பி என்னடா, அவசரமான உலகத்திலே?’ என்று கேள்வி எழுப்பிய நீங்கள் இனி, ‘அவசரத் திற்கு உதவுபவர்கள் அண்ணன் தம்பிகள்’ என்று சொல்வீர்கள். வழக்கு கள் சாதகமாக முடியும். வருங்கால நலன் கருதி தீட்டிய திட்டங்கள் வெற்றி பெறும். உழைப்பிற்கேற்ற பலன்மட்டுமல்ல, உதிரி வருமானங்களும் கிடைக்கும். அழைப்புமணி அடித்தவுடன் வரும் பணியாளர்களால் ஏற்பட்ட தொல்லைகள் அகலும். உடன்பிறப்புகளின் இல்லங்களில் நடைபெறும் சுபகாரிய நிகழ்வுகளில் கலந்துகொண்டு மகிழ்வீர்கள். பேச்சுத்திறமையால் சூழ்ச்சிகளை முறியடிப்பீர்கள்.

‘ஐந்தினை குருதான் பார்த்தால் அனைத்திலும் வெற்றி கிட்டும்’ என்பது சாஸ்திர நியதி. பஞ்சம ஸ்தானத்தைக் குரு பார்க்கும்பொழுது நெஞ்சம் மகிழும் சம்பவங்கள் நிறையவே நடைபெறும். வஞ்சகம் செய்தோர் விலகுவர். வாரிசுகளின் முன்னேற்றம் கண்டு பெருமைப்படுவீர்கள். அவர்களின் கல்வி வளர்ச்சிக்கும், கல்யாண முயற்சிக்கும் உறுதுணையாக நிற்பீர்கள். பூர்வீக சொத்துக் களில் பங்கீடுகளில் உங்களுக்குரிய பங்கு திருப்தியாகக் கிடைக்கும். தூரத்தில் படிக்கும் பிள்ளைகளை உங்கள் மேற்பார்வையில் வைத்துக் கொள்ளுங்கள். வாகனங்கள் வாங்கவும், வீடு கட்டவும், வங்கிகளில் எதிர்பார்த்த சலுகைகள் கிடைக்கும்.

குருவின் பாதசார பலன்கள்!

குருப்பெயர்ச்சியின் பொழுது குரு தனது சுயசாரத்தில் சஞ்சரிக்கின்றார். இக்காலம் ஒரு பொற்காலமாக அமையும். எடுத்த காரிங்களில் வெற்றி பெறுவீர்கள். தொழில் துறையில் நல்ல முன்னேற்றம் ஏற்படும். துணிவும், தன்னம்பிக்கையும் கூடும். ஒரு தொழில் செய்வோர் மறுதொழில் செய்ய முன்வருவர். உடன்பிறந்தவர்கள் உங்களுக்கு உறுதுணையாக இருப்பர். ஒரு கடனை அடைக்க மற்றொரு கடனை வாங்கி காலம் தள்ளிய நீங்கள் இப்பொழுது சங்கிலித்தொடர் போல் வந்த கடனை பாதிக்கு மேல் கொடுத்து ஒழுங்கு செய்து கொள்வீர்கள். சொத்துக்களாலும் ஆதாயம், சொந்தங்களாலும் மகிழ்ச்சி கூடும் நேரமிது.

21.10.2018 முதல் 19.12.2018 வரை அனு‌ஷ நட்சத்திரக்காலில் குரு சஞ் சரிக்கின்றார். சனி சாரத்தில் குரு பகவான் சஞ்சரிக்கும் பொழுது தொழில் வளர்ச்சி அபரிமிதமாக இருக்கும். பண மழையிலும், பக்கபலமாக இருக்கும் நண்பர்களின் பாச மழையிலும் நனையும் நேரமிது. உடல்நலம் சீராகும். அதிகச் செல்வாக்கு மிக்கவர்கள் உங்களுக்குப் பின்னணியாக இருந்து திட்டங்கள் நிறைவேற வழிவகுத்துக்கொடுப்பர். பழைய வாகனங்கள் பழுதாகி, பழுதாகி கவலைகொள்ள வைக்கின்றதே என்று நினைத்துப் புதிய வாகனங்கள் வாங்கப் பதிவு செய்வீர்கள். அதற்கு கேட்ட இடத்தில் உங்களுக்கு சலுகைகள் கிடைக்கும். வெளிநாட்டு வேலை வாய்ப்புக் கூட ஒருசிலருக்கு அமையலாம். பிற மாநிலங்களில் பணியாற்றும் யோகமும் சிலருக்கு உண்டு.

20.12.2018 முதல் 12.3.2019 வரை மற்றும் 18.5.2019 முதல் 27.10.2019 வரை கேட்டை நட்சத்திரக்காலில் குரு பகவான் சஞ்சரிக்கின்றார். புதன் காலில் குரு சஞ்சரிக்கும் பொழுது எதிர்பார்ப்புகள் அனைத்தும் நிறைவேறும். இல்லம் தேடி நல்லசெய்தி வந்து சேரும். வீட்டை விரிவுபடுத்திக் கட்டுவது, வர்ணம் பூசுவது தண்ணீர்த்தொட்டிஅமைப்பது போன்ற பணிகளைச் செய்யத்தொடங்குவீர்கள். கட்டிய வீட்டைப் பழுது பார்க்க முடியாமல் நீண்ட காலமாக சிதிலமடைந்த நிலயில் இருக்கின்றதே என்று கவலைப்பட்டவர்கள், இப்பொழுது அதைப் பராமரிக்கும் பணியில் ஆர்வம் காட்டுவீர்கள். அரசுப்பணி கிடைக்கவில்லையே என்று ஏங்கியவர்களுக்கு அது கிடைக்கும்.

13.3.2019 முதல் 17.5.2019 வரை மூலம் நட்சத்திரக் காலில் குரு பகவான் சஞ்சரிக்கின்றார். கேது சாரத்தில் குரு பகவான் சஞ்சரித்து தனுசு ராசிக்குள் பிரவேசிப்பதால் அவரது பார்வை உங்கள் ராசிக்கு 2, 4, 6 ஆகிய இடங்களில் பதிவாகின்றது. எனவே குடும்ப முன்னேற்றம் கூடுதலாக இருக்கும். பிள்ளைகளின் கல்யாணக் கனவுகளை நனவாக்குவீர்கள். உற்றார், உறவினர்களிடம் ஒற்றுமை பலப்படும். தேசப்பற்று மிக்கவர்கள் உங்களுக்கு நட்பாகி நல்ல காரியங்களை முடித்துக்கொடுப்பர். உத்தியோகத்தில் உள்ளவர்களுக்கு ஊதிய உயர்வும், பதவி உயர்வும் தானாக வந்து சேரும். தெய்வப்பற்று மிக்க நீங்கள் புனித யாத்திரைகளைச் செய்ய முன்வருவீர்கள்.

குருவின் வக்ர காலம்!

இந்தக் குருப்பெயர்ச்சிக் காலத்தில் விருச்சிக ராசியிலும், தனுசு ராசியிலும் குரு வக்ரம் பெறுகின்றார். இந்த வக்ர காலத்தில் எதிலும் விழிப்புணர்ச்சியோடு இருந்தால் தான் விரயங்களில் இருந்து விடு படலாம். உங்கள் ராசியைப் பொறுத்தவரை கேந்திராதிபத்ய தோ‌ஷம் பெற்ற கிரகம் என்பதால் வக்ர காலத்தில் பெரிய அளவில் பாதிப்புகள் ஏற்படாது. இருந்தாலும் ஆரோக்கியத்தொல்லை உருவாகும். அருகிலுள்ள வீட்டார்களுடன் பகை ஏற்படலாம். உழைப்பு அதிகமாகவும், ஊதியம் குறைவாகவும் இருக்கும். சொந்தங்களைக் கொஞ்சம் அனுசரித்துச் செல்வது நல்லது. வீடு வாங்குவதில் வில்லங்கங் களும், பத்திரப்பதிவில் இருந்த தடைகளும் ஏற்படலாம். வழிபாடு வளர்ச்சியைக் கூட்டும்.

செல்வ வளம் தரும் சிறப்பு வழிபாடு!

வியாழக்கிழமை தோறும் குருதட்சிணாமூர்த்தியை வழிபட்டு வருவதோடு பஞ்சமி திதியில் வராஹியை வழிபாடு செய்யுங்கள். யோக பலம்பெற்ற நாளில் சிவகங்கை மாவட்டம் பட்டமங்கலத்திலுள்ள வெற்றி தரும் குரு பகவானை வழிபட்டு வாழ்க்கைப் பாதையை வளமாக்கிக் கொள்ளுங்கள்.

பெண்களுக்கான சிறப்புப் பலன்கள்!

இந்த குருப்பெயர்ச்சி உங்களுக்கு சாதகமான பெயர்ச்சியாக அமையப் போகின்றது. வாங்கல், கொடுக்கல்கள் ஒழுங்காகும். வளர்ச்சி கூடும். தேங்கிய காரியங்கள் சிறப்பாக நடைபெறும். தெய்வத் திருப்பணிகளுக்கு கொடுத்து உதவுவீர்கள். கணவன்–மனைவிக்குள் நெருக்கம் அதிகரிக்கும். புயல் வீசிய குடும்பத்தில் இனி தென்றல் தவழும். தேக்க நிலை மாறி ஆக்கநிலை உருவாகும். வாக்குறுதியை நிறைவேற்றுவீர்கள். வருமானம் அதிகரிக்கும். வீட்டிற்குத் தேவையான விலை உயர்ந்த பொருட்களை வாங்குவதில் தனிக்கவனம் செலுத்துவீர்கள். மங்கல நிகழ்ச்சிகள் மனையில் அடுத்தடுத்து நடைபெறும். பிள்ளைகளின் முன்னேற்றம் கருதி எடுத்த முயற்சி வெற்றி தரும். தாய்வழி ஒத்துழைப்பும், உடன்பிறப்புகளின் ஆதரவும், பாசத்தோடு பழகும் பக்கத்து வீட்டாரின் உறவும் திருப்தி தரும். பணிபுரியும் பெண்களுக்குப் பதவி உயர்வும், ஊதிய உயர்வும் கடல்தாண்டிச் சென்று பணிபுரியும் யோகமும் முயற்சி எடுக்காமலேயே கிடைக்கும். வியாழன் தோறும் குருவை வழிபடுவதோடு, பவுர்ணமி நாளில் கிரிவலம் வருவதும் நல்லது. தெசாபுத்திக்கேற்ற தெய்வ வழிபாடு தக்க பலன்தரும்.