‘பைரேட் ஆப் தி கரீபியன்’ படத்தில் இருந்து நடிகர் ஜானி டெப் விலகல்

‘பைரேட்ஸ் ஆப் தி கரீபியன்’ படங்களுக்கு உலகம் முழுவதும் ரசிகர்கள் உள்ளனர். இந்த படத்தில் ஜானி டெப் நடித்துள்ள கேப்டன் ஜாக் ஸ்பாரோ கதாபாத்திரம் பிரபலம். டெட்மென், ஸ்லீப்பி ஹாலோவ், பிரம் ஜெல், சீக்ரெட் விண்டோ உள்பட பல படங்களில் நடித்துள்ள ஜானி டெப் 2003-ம் ஆண்டு ‘பைரேட்ஸ் ஆப் தி கரீபியன், த கர்ஸ் ஆப் த பிளாக் பேர்ல்’ படத்தில் நடித்தார்.

அவரது நடிப்பு ரசிகர்களுக்கு பிடித்து போனது. கண்களை உருட்டும் நக்கல் பேச்சு, எதிரிகளுடன் லாவகமாக மோதும் சண்டைகள், தலையில் தொப்பியுடன் வரும் வித்தியாசமான தோற்றம் அனைத்தையும் குழந்தைகளும் இளைஞர்களும் ரசித்தார்கள். இதன் மூலம் உலகம் முழுவதும் புகழ் பெற்றார். படத்தின் அடுத்தடுத்த பாகங்களிலும் ஜாக் ஸ்பாரோ கதாபாத்திரத்தில் ஜானி டெப்பே நடித்தார். இப்போது அவருக்கு 55 வயது ஆகிறது. 15 வருடங்களாக ஜாக் ஸ்பாரோவாக வந்த ஜானிடெப் இனிமேல் அந்த கதாபாத்திரத்தில் நடிக்க மாட்டார் என்று அறிவிக்கப்பட்டு உள்ளது.

பைரேட்ஸ் ஆப் தி கரீபியன் படங்களை தயாரித்து வந்த டிஸ்னி ஸ்டுடியோ, அடுத்த பாகங்களில் மாற்றங்களை செய்ய முடிவெடுத்துள்ளது. இதனால் ஜானி டெப் அடுத்த பாகங்களில் நடிக்க மாட்டார் என்று அந்த படத்தின் திரைக்கதையாசிரியர் ஸ்டூவர்ட் பீட்டீ தெரிவித்து உள்ளார். அவருக்கு பதிலாக யார் நடிப்பார் என்பதை இன்னும் முடிவு செய்யவில்லை என்றும் கூறினார். ஜானி டெப் விலகல் அவரது ரசிகர்களுக்கு ஏமாற்றத்தை ஏற்படுத்தி உள்ளது.