ரூ.25 கோடி கேட்டு மிரட்டிய தாதா - நடிகை லீனா மரியாவை சுட்டுக்கொல்ல முயற்சி?

கொச்சியில் லீனா மரியா பால் நடத்தி வரும் பியூட்டி பார்லரை நோக்கி பைக்கில் வந்த 2 மர்ம நபர்கள் சரமாரியாக துப்பாக்கியால் சுட்டு விட்டு தப்பிச் சென்றனர். அப்போது லீனா மரியா பால் கடையில் இல்லை. 2 பெண் ஊழியர்கள் மட்டுமே இருந்தனர். போலீசார் விரைந்து வந்து விசாரணை நடத்தினார்கள். சில நாட்களுக்கு முன்பு மும்பையை சேர்ந்த மாபியா கும்பல் தலைவன் ரவி புஜாரா, லீனா மரியாவுக்கு போன் செய்து ரூ.25 கோடி கேட்டு மிரட்டியதாக கூறப்படுகிறது. இதுகுறித்து கொச்சி போலீசில் அவர் புகார் செய்தார்.

எனவே மும்பை தாதா, ஆத்திரத்தில் ஆட்களை அனுப்பி துப்பாக்கி சூடு நடத்தி இருக்கலாம் என்று போலீசார் சந்தேகிக்கிறார்கள். அந்த பகுதியில் இருந்த கண்காணிப்பு கேமராவில் பதிவான காட்சிகளையும் ஆய்வு செய்து வருகிறார்கள். லீனா மரியா பால் அதிர்ச்சியில் உள்ளார். அவருக்கு பாதுகாப்பு அளிக்கப்பட்டு உள்ளது. ரவி புஜாராவை தேடி மும்பைக்கும் தனிப்படை போலீசார் செல்கிறார்கள்.