கேரளாவில், எம்.எல்.ஏ. பேச்சால் சர்ச்சை - மம்முட்டி, மோகன்லாலை விட விஜய்க்கு அதிக ரசிகர்களா?

விஜய் நடித்த படங்கள் கேரளாவிலும் வெற்றிகரமாக ஓடுகின்றன. மலையாள சூப்பர் ஸ்டார்களான மம்முட்டி, மோகன்லால் படங்களை விட அதிக வசூல் ஈட்டுகின்றன. ஜில்லா, துப்பாக்கி, தலைவா, தெறி, மெர்சல், சர்கார் உள்ளிட்ட பல படங்கள் அங்கு நல்ல வசூல் பார்த்துள்ளன.

கேரள வினியோகஸ்தர்களும் விஜய் படங்களை அதிக விலைக்கு வாங்கி வெளியிட்டு லாபம் பார்க்கிறார்கள். விஜய் படங்களுடன் போட்டியிடாமல் மலையாள நடிகர்கள் தங்கள் படங்கள் வெளியீட்டை தள்ளி வைக்கும் நிலையும் உள்ளது. விஜய் படங்கள் வெளியாகும்போது கேரள ரசிகர்கள் தியேட்டர்களில் கட்-அவுட் வைப்பது, பால் அபிஷேகம் செய்வது என்று அமர்க்களப்படுத்துகின்றனர்.

இந்த நிலையில் கேரளாவில் மலையாள நடிகர்களை விட விஜய்க்கு அதிக ரசிகர்கள் உள்ளனர் என்று கேரள எம்.எல்.ஏ. ஜார்ஜ் பரபரப்பாக பேசினார். டி.வி. நிகழ்ச்சியொன்றில் அவர் பங்கேற்று பேசும்போது, “கேரள தியேட்டர்களில் விஜய் கட்-அவுட்களுக்கு ரசிகர்கள் பால் அபிஷேகம் செய்வதை நான் உள்பட பலரும் பார்த்து இருக்கிறோம். கேரளாவில் மலையாள நடிகர்களை விட விஜய்க்கு அதிக ரசிகர்கள் உள்ளனர்” என்றார்.

இது சர்ச்சையை ஏற்படுத்தி உள்ளது. மம்முட்டி, மோகன்லால் ரசிகர்கள் ஜார்ஜை சமூக வலைத்தளங்களில் கண்டித்து வருகிறார்கள். “விஜய்க்கு அதிக ரசிகர்கள் இருப்பது உண்மைதான். ஆனால் மலையாள நடிகர்களை விட அதிக ரசிகர்கள் இருப்பதாக சொல்வதை ஏற்க முடியாது” என்று அவர்கள் கருத்து பதிவிடுகிறார்கள்.