இணைய தளத்தில் வெளியாகும் வரலட்சுமி, யோகிபாபு படங்கள்

கொரோனாவால் திரையுலகம் முடங்கி உள்ளது. இதனால் புதிய படங்களை தியேட்டருக்கு பதிலாக இணைய தளத்தில் வெளியிடுகிறார்கள். ஜோதிகாவின் பொன்மகள் வந்தாள் படம் ஏற்கனவே டிஜிட்டல் தளத்தில் வெளியானது. கீர்த்தி சுரேஷ் நடித்துள்ள பெண்குயின் படத்தையும் ஓடிடி தளத்தில் வெளியிட்டனர். டெல் கணேசன் தயாரிப்பில் நெப்போலியன் நடித்துள்ள ‘டெவில்ஸ் நைட்‘ படமும் டிஜிட்டல் தளத்தில் வெளியாகி உள்ளது.

இந்த நிலையில் வரலட்சுமி சரத்குமார் நடித்துள்ள டேனி படம் இணைய தளத்தில் வெளியாகும் என்று அறிவித்துள்ளனர். இந்த படத்தை இயக்குனர் சற்குணத்தின் உதவியாளர் சாந்த மூர்த்தி டைரக்டு செய்துள்ளார்.

இதில் வரலட்சுமி போலீஸ் இன்ஸ்பெக்டராக நடித்துள்ளார். கொலையாளிகள் மூன்று பேரை அவர் எப்படி கண்டுபிடிக்கிறார் என்பது கதை. ஆகஸ்டு மாதம் யோகிபாபு நடித்துள்ள காக்டெயில் படமும் இணைய தளத்தில் வெளியாக உள்ளது. படங்களை இணையதளத்தில் வெளியிட தியேட்டர் அதிபர்கள் எதிர்ப்பு தெரிவித்துள்ளனர். அதையும் மீறி டிஜிட்டல் தளத்தில் தொடர்ந்து படங்கள் ரிலீசாகின்றன. அருண் விஜய்யின் ‘வா டீல்,‘ ‘மம்மி சேவ்‘, ‘அண்டாவ காணோம்‘ ஆகிய மேலும் 3 படங்கள் இணைய தளத்தில் வர உள்ளது.