நீட் தேர்வு விவகாரம்: நடிகர் சூர்யாவுக்கு காயத்ரி ரகுராம் எதிர்ப்பு

நீட் தேர்வு பயத்தில் ஒரே நாளில் மூன்று மாணவர்கள் தற்கொலை செய்தது அதிர்ச்சியை ஏற்படுத்தியது. இதையடுத்து நீட் தேர்வை ரத்து செய்யும்படி அரசியல் கட்சியினரும், திரையுலகினரும் வற்புறுத்தினர். நடிகர் சூர்யா நீட் தேர்வு முறையை கடுமையாக கண்டித்தார். அவர் கூறும்போது, “நீட் போன்ற ‘மனுநீதி’ தேர்வுகள் எங்கள் மாணவர்களின் வாய்ப்புகளை மட்டுமின்றி உயிர்களையும் பறிக்கிறது. அப்பாவி மாணவர்களின் மரணங்களை அமைதியாக வேடிக்கை பார்த்துக் கொண்டு இருக்கக்கூடாது. நீட் தேர்வுக்கு எதிராக ஒரு சமூகமாக நாம் ஒன்றிணைந்து குரல் எழுப்புவோம்?” என்றார். சூர்யா கருத்துக்கு பா.ஜனதா பிரமுகரும், நடிகையுமான காயத்ரி ரகுராம் எதிர்ப்பு தெரிவித்துள்ளார். டுவிட்டரில் அவர் வெளியிட்டுள்ள பதிவில், “நடிகர்களின் திரைப்படங்கள் வெளியாகும்போது ரசிகர்கள் தங்கள் சொந்த செலவில் பேனர் வைத்து கொண்டாடுகிறார்கள். அப்போது பேனர் தவறி விழுந்து சில ரசிகர்கள் உயிர் இழந்துள்ளனர். இதற்காக சினிமாவை தடை செய்யலாமா? தேர்வை தைரியமாக எதிர்கொள்ள மாணவர்களுக்கு நம்பிக்கையை ஏற்படுத்த வேண்டும். நோயாளிகளை கவனிக்கும் மருத்துவர்களுக்கு தினமும் பரீட்சைத்தான்” என்று கூறியுள்ளார்.