விஜய் சேதுபதி படம் ஓ.டி.டி.யில் ரிலீஸ்

கொரோனாவால் தமிழ், தெலுங்கு, இந்தியில் தயாரான பல படங்கள் தியேட்டருக்கு பதிலாக ஓ.டி.டி.யில் வெளியாகி வருகின்றன. சூர்யாவின் சூரரை போற்று, ஜோதிகா நடித்துள்ள பொன்மகள் வந்தாள், கீர்த்தி சுரேசின் பெண்குயின், வரலட்சுமி சரத்குமாரின் டேனி, விஜய்சேதுபதி நடித்துள்ள க.பெ.ரணசிங்கம், அனுஷ்காவின் நிசப்தம் உள்ளிட்ட படங்கள் நேரடியாக ஓ.டி.டி. தளத்தில் ரிலீஸ் செய்யப்பட்டன.

மாதவனின் மாறா, ஜெயம் ரவியின் பூமி படங்களும் ஓ.டி.டி.யில் வெளியாக உள்ளன. மலையாளத்தில் மோகன்லால்-மீனா ஜோடியாக நடித்துள்ள திரிஷ்யம் 2-ம் பாகம் படமும் ஓ.டி.டி.யில் வருகிறது.

இந்த நிலையில் விஜய்சேதுபதி நடித்துள்ள முகிழ் என்ற இன்னொரு படமும் ஓ.டி.டி.யில் வெளியாகிறது. இதில் நாயகியாக ரெஜினா வருகிறார். விஜய்சேதுபதியின் மகள் ஸ்ரீஜாவும் முக்கிய கதாபாத்திரத்தில் நடித்துள்ளார். இந்த படத்தை விஜய்சேதுபதியே தயாரித்துள்ளார். புதுமுக இயக்குனர் கார்த்திக் டைரக்டு செய்துள்ளார். பெற்றோர் ஒரு குழந்தையை எப்படி வளர்க்கிறார்கள். அந்த குழந்தைக்கு பிரச்சினை வரும்போது பெற்றோர் எப்படி கையாள்கிறார்கள் என்பது கதை.