எதிர்ப்பை மீறி ஓ.டி.டி.யில் படம்: நடிகர் தனுஷ் வருத்தம்

தனுஷ் நடித்துள்ள ஜெகமே தந்திரம் படம் இந்த மாதம் ஓ.டி.டி. தளத்தில் வெளியாக உள்ளது. இதனை தனுஷ் விரும்பவில்லை. திரையரங்க உரிமையாளர்கள், வினியோகஸ்தர்கள், சினிமா ஆர்வலர்கள் மற்றும் எனது ரசிகர்களைப்போல நானும் ஜெகமே தந்திரம் தியேட்டரில் வெளியாகும் என்ற நம்பிக்கையில் இருக்கிறேன் என்று கூறியிருந்தார்.

தனுஷ் ரசிகர்களும் படத்தை ஓ.டி.டி.யில் வெளியிடக்கூடாது என்று எதிர்ப்பு தெரிவித்தனர். அதையும் மீறி ஜெகமே தந்திரம் படத்தை ஓ.டி.டி. தளத்துக்கு விற்று விட்டனர். இது தனுசுக்கும், அவரது ரசிகர்களுக்கும் ஏமாற்றத்தை ஏற்படுத்தியது. இதையடுத்து ஜெகமே தந்திரம் படம் சம்பந்தமான எந்த பதிவுகளையும் சமூக வலைத்தள பக்கத்தில் தனுஷ் வெளியிடாமல் இருந்தார்.

தற்போது படத்தின் டிரெய்லர் வெளியாகி உள்ள நிலையில் தனுஷ் டுவிட்டரில் வெளியிட்ட பதிவில், “தியேட்டரில் வெளியாகி சிறந்த அனுபவத்தை கொடுக்க வேண்டிய படம் ஓ.டி.டி.யில் வருகிறது. ஆனாலும் அனைவரும் ஜெகமே தந்திரம் மற்றும் சுருளியை ரசிப்பீர்கள் என்ற நம்பிக்கை உள்ளது’’ என்று கூறியுள்ளார். தனுஷ் தற்போது ‘தி கிரே மேன்’ ஹாலிவுட் படத்தில் நடிக்க அமெரிக்காவில் முகாமிட்டுள்ளார்.