தாழ்த்தப்பட்டோர் குறித்து அவதூறு கருத்து: மீரா மிதுனுக்கு குற்றப்பத்திரிகை நகல்

நடிகையும், மாடல் அழகியுமான மீரா மிதுன், தாழ்த்தப்பட்டோர் குறித்து சமூக வலைதளங்களில் அவதூறு கருத்துகளை தெரிவித்ததாக விடுதலை சிறுத்தைகள் கட்சி சார்பில் அளிக்கப்பட்ட புகாரின் பேரில் சென்னை மத்திய குற்றப்பிரிவு போலீசார் கடந்த ஆண்டு ஆகஸ்டு மாதம் மீரா மிதுன் மீதும், உடந்தையாக இருந்ததாக அவரது நண்பர் சாம் அபிஷேக் மீதும் வழக்கு பதிந்து இருவரையும் கைது செய்தனர்.

அதன்பின்பு இருவரும் ஜாமீனில் விடுவிக்கப்பட்டனர். இந்த நிலையில் அவர்கள் மீது குற்றப்பத்திரிகை தாக்கல் செய்யப்பட்டது.

குற்றப்பத்திரிகை நகலை பெற்றுக்கொள்வதற்காக இருவரும் நேரில் ஆஜராக சென்னை முதன்மை செசன்ஸ் கோர்ட்டு உத்தரவிட்டிருந்தது.

இந்தநிலையில் நேற்று அந்த வழக்கு நீதிபதி அல்லி முன்னிலையில் விசாரணைக்கு வந்தது. போலீசார் தரப்பில் சிறப்பு அரசு வக்கீல் எம்.சுதாகர் ஆஜரானார்.

விசாரணையின்போது மீரா மிதுன், அவரது நண்பர் சாம் அபிஷேக் ஆகியோர் ஆஜராகினர். அவர்களுக்கு குற்றப்பத்திரிகை நகல் வழங்கப்பட்டது.

பின்னர் வழக்கு விசாரணையை 21-ந்தேதிக்கு தள்ளிவைத்த நீதிபதி, குற்றச்சாட்டு பதிவுக்காக அன்றைய தினம் மீரா மிதுன், அவரது நண்பர் சாம் அபிஷேக் ஆகியோர் ஆஜராக வேண்டும் என்று உத்தரவிட்டார்.