'குட் பேட் அக்லி' படத்தில் திரிஷா?

சென்னை,

அஜித்தின் 63-வது படமான 'குட் பேட் அக்லி' படத்தை ஆதிக் ரவிச்சந்திரன் இயக்குகிறார். இந்த படத்தை மைத்ரி மூவி மேக்கர்ஸ் நிறுவனம் தயாரிக்கிறது. இந்த திரைப்படத்திற்கு தேவிஸ்ரீ பிரசாத் இசையமைக்கிறார்.படம் 2025-ம் ஆண்டு பொங்கல் தினத்தில் வெளியாகும் என அறிவிக்கப்பட்டுள்ளது.

ஐதராபாத்தில் படப்பிடிப்பு தற்போது 90 சதவிகிதம் முடிவடைந்துள்ளது. அடுத்ததாக படக்குழு, இரண்டாம் கட்ட படப்பிடிப்புக்கு தயாராகி வருகிறது. அதன்படி இப்படத்தின் இரண்டாம் கட்ட படப்பிடிப்பு ரஷ்யாவில் விரைவில் தொடங்க உள்ளதாக கூறப்படுகிறது.

மகிழ்திருமேனி இயக்கத்தில் அஜித் நடித்துள்ள விடா முயற்சி படத்தில் அஜித்துடன் நடித்திருக்கும் திரிஷா, அதையடுத்து ஆதிக் ரவிச்சந்திரன் இயக்கத்தில் அஜித் நடித்து வரும் 'குட் பேட் அக்லி' என்ற படத்திலும் இணைந்து நடிக்க இருப்பதாகவும் தகவல்கள் வெளியாகியுள்ளன. இது குறித்த பேச்சுவார்த்தை நடந்து முடிந்து விட்டதாகவும், இப்படத்தின் அடுத்தகட்ட படப்பிடிப்பு ஐதராபாத்தில் நடக்கும்போது அஜித் உடன் திரிஷாவும் இணைந்து நடிக்க இருப்பதாகவும் கோலிவுட்டில் தகவல்கள் வெளியாகியுள்ளன.

திரிஷா ஜி, கிரீடம், மங்காத்தா, என்னை அறிந்தால் உள்ளிட்ட படங்களில் அஜித்துடன் இணைந்து நடித்துள்ளார்.