'என்ஜாய் எஞ்சாமி' பாடல்: தீ யின் அறிக்கையால் சூடுபிடிக்கும் விவகாரம்...! முடிவுக்கு வருமா சர்ச்சை!!!

சென்னை

சர்வதேச 44-வது செஸ் ஒலிம்பியாட் போட்டிகளின் தொடக்க விழா சமீபத்தில் கோலாகலமாக நடைபெற்றது. பிரதமர் மோடி மற்றும் முதல்-அமைச்சர் மு.க.ஸ்டாலின் முன்னிலையில் நடைபெற்ற அந்த விழாவில் பல்வேறு கலை நிகழ்ச்சிகள் அரங்கேறின. அதில் 'என்ஜாய் எஞ்சாமி' பாடலை தீ மற்றும் மாரியம்மாள் பாடியிருந்தார்கள். அப்போது இப்பாடலை எழுதி, அதில் நடித்திருந்த தெருக்குரல் அறிவு இடம்பெறவில்லை.

இது தொடர்பாகப் பலரும் சமூக வலைத்தளங்களில் கேள்வி எழுப்ப பின்பு அது சர்ச்சையானது. இது தொடர்பாக விளக்கம் அளிக்கும் வகையில் தெருக்குரல் அறிவு வெளியிட்ட பதிவில்

" நான் "இசையமைத்தேன்" "எழுதினேன்" , பாடினேன்" நடித்தேன்" என்ஜாமியை அனுபவிக்கவும். இதை எழுத யாரும் எனக்கு ஒரு டியூனையோ, மெலடியையோ அல்லது எனக்கு வார்த்தையோ கொடுக்கவில்லை. இப்போது இருக்கும் அனைத்திற்கும் கிட்டத்தட்ட 6 மாதங்கள் தூக்கமில்லாமல், மன அழுத்தம் நிறைந்த இரவுகளையும் பகலையும் கழித்தேன். இது ஒரு சிறந்த குழுப்பணி என்பதில் சந்தேகமில்லை. அது அனைவரையும் ஒன்றாக அழைக்கிறது என்பதில் சந்தேகமில்லை.

ஆனால் அது வள்ளியம்மாளின் சரித்திரமோ அல்லது நிலமற்ற தேயிலைத் தோட்ட அடிமை என் முன்னோர்களின் சரித்திரமோ அல்ல.என்னுடைய ஒவ்வொரு பாடலும் இந்த தலைமுறை ஒடுக்குமுறையின் அடையாளமாக இருக்கும்.

இந்நாட்டில் 10000 நாட்டுப்புறப் பாடல்கள் உள்ளன. முன்னோர்களின் மூச்சு, அவர்களின் வலி, அவர்களின் வாழ்க்கை, அன்பு, அவர்களின் எதிர்ப்பு மற்றும் அவர்களின் இருப்பு பற்றிய அனைத்தையும் சுமந்து செல்லும் பாடல்கள். முடிவில் எப்பொழுதும் உண்மையே வெல்லும் : இது அனைத்தும் அழகான பாடல்களில் உங்களிடம் பேசும். ஏனென்றால் நாம் இரத்தமும் வியர்வையுமான விடுதலைக் கலைகளின் மெல்லிசைகளாக மாறிய தலைமுறை.

பாடல்கள் மூலம் பாரம்பரியத்தை எடுத்துச் செல்கிறோம். நீங்கள் உறங்கும் போது உங்கள் பொக்கிஷத்தை யார் வேண்டுமானாலும் அபகரிக்கலாம். நீங்கள் விழித்திருக்கும் போது ஒருபோதும் அது நடக்காது. ஜெய்பீம். முடிவில் எப்பொழுதும் உண்மையே வெல்லும்" என பதிவிட்டு இருக்கிறார்.

இதன் பிறகு இதற்கு விளக்கமளிக்கும் விதமாக சந்தோஷ் நாராயணன் அறிக்கை ஒன்றை வெளியிட்டு இருந்தார்.

அதில் எனது அன்பான நண்பர்கள், நலம் விரும்பிகள் மற்றும் குடும்பத்தினருக்கு வணக்கம். 'என்ஜாய் எஞ்சாமி' பாடலுடன் எனது பயணத்தைப் பற்றி பேச விரும்புகிறேன். கடந்த டிசம்பர் 2020 இல், தீ என்னிடம் இயற்கையைக் கொண்டாடும் ஒரு தமிழ்ப் பாடலை உருவாக்கும் யோசனையைச் சொன்னார். அதன் பிறகு நான் இசையமைத்து, பதிவுசெய்து 'என்ஜாய் எஞ்சாமி' பாடலைப் பாடினேன். மேலே கூறப்பட்ட என்னுடைய பணியானது உலகளவில் 'தயாரிப்பாளர்' என்று குறிப்பிட்டுள்ளது. தீ, அறிவு மற்றும் நானும் அன்பிற்காக இப்பாடலுக்கு ஒன்றாக இணைந்தோம். அறிவின் பல வரிகளுக்கு தீ இணைந்து இசையமைத்தார், அதே நேரத்தில் அறிவு பாடல் வரிகளை எழுத ஒப்புக்கொண்டார். மீதி ட்யூன் மற்றும் அறிவின் பகுதிகளுக்கு நான் இசையமைத்தேன்.

இப்பாடலுக்காகப் பல நிஜ வாழ்க்கைக் கதைகளை உருவாக்கி, அறிவுடன் பல மணி நேரம் செலவழித்த இயக்குநர் மணிகண்டனுக்கு (காக்கா முட்டை, கடைசி விவசாயி) எங்கள் குழு சார்பாக நன்றி. மேலும் என்ஜாய் என்ஜாமி பாடலின் அடிப்படையே அவரது திரைப்படமான 'கடைசி விவசாயி' படத்திலிருந்து தான் ஈர்க்கப்பட்டது. 'என்ஜாய் எஞ்சாமி'-யை சுற்றி ஒரு அற்புதமான கதையை அறிவு உருவாக்கியதில் நான் மிகவும் மகிழ்ச்சியடைகிறேன். இப்பாடலின் அனைத்து வரிகளுடன் படப்பிடிப்பின் சிந்தனை, ஏற்பாடு மற்றும் பதிவு செய்யும் முறை ஒரு 30 மணி நேரத்திற்குள் செய்யப்பட்டது. இப்பாடலின் வருமானம் மற்றும் உரிமை அனைத்தும் தீ, அறிவு மற்றும் நானே சமமாகப் பகிர்ந்துள்ளோம் என்பதில் நான் வெளிப்படையாக இருக்க விரும்புகிறேன். செஸ் ஒலிம்பியாட் 2022 இல் தீ மற்றும் மாரியம்மாளின் என்ஜாய் எஞ்சாமி பாடியது பொறுத்தவரை, அறிவால் கலந்துகொள்ள முடியவில்லை. ஏனென்றால் அறிவு அமெரிக்காவில் உள்ளார்.

அறிவிடம் எனக்கு மிகவும் பிடித்த படைப்பு வெற்றிமாறன் தயாரிக்கும் 'அனேல் மேல் பனித்துளி' திரைப்படத்தில் இருந்து விரைவில் வெளிவரவிருக்கும் 'கீச்சே கீச்சே' பாடல் தான். இதில் நான் இசையமைப்பாளராக பணியாற்றியுள்ளேன். 'என்ஜாய் எஞ்சாமி' படத்திற்கு கொடுத்த அதே அன்பை 'கீச்சே கீச்சே' படத்திற்கும் கொடுத்தால் அது கலைஞனாக அறிவுக்குப் பொருத்தமாக இருக்கும். நான் எப்போதும் ஒடுக்கப்பட்டவர்களுக்கு குரல் கொடுப்பதற்காக எனது தளத்தைப் பயன்படுத்துகிறேன். எனது தனிப்பட்ட வாழ்க்கை மற்றும் கலை இரண்டுமே அதற்குச் சான்றாகும். இத்தனை ஆண்டுகளாக எனக்கு ஆதரவளித்த அனைவருக்கும் மீண்டும் ஒருமுறை நன்றி. இப்பாடலை பற்றி பொதுவெளியிலோ அல்லது தனிப்பட்ட முறையிலோ விவாதிக்க நான் தயாராக இருக்கிறேன். மேலும் கலைகளை உருவாக்கி மக்களை ஒன்றிணைப்பதே எனது குறிக்கோள்." எனக் குறிப்பிட்டு இருந்தார்.

இந்நிலையில் பாடகி தீயும் இதுகுறித்து அறிக்கை ஒன்றை வெளியிட்டிருந்தார். அதில், "என்ஜாய் எஞ்சாமி பாடலின் ஒவ்வொரு கட்டத்திலும் அறிவு மற்றும் சந்தோஷ் நாராயணன் இருவருக்கும் உரிய அங்கீகாரம் வழங்கியுள்ளேன். ஒவ்வொரு முறையும் எனக்கு கிடைத்த வாய்ப்புகளில் அவர்கள் இருவரையும் குறிப்பாக அறிவு குறித்து பெருமையுடனே . அவர்கள் இருவரின் முக்கியத்துவத்தை எந்தக் கட்டத்திலும் நான் குறைத்து மதிப்பிட்டது கிடையாது. ஒவ்வொரு சந்தர்ப்பத்திலும், மேடையிலும் இருவரின் பங்களிப்பை முன்னிலைப்படுத்துவதை செய்துவருகிறேன்.

அதேநேரம், எங்களது பணி குறித்து மற்றவர்களால் பகிரப்படும் விளம்பரங்களில் எனக்கு எந்தவிதமான சம்பந்தமும் இல்லை. இயக்குநர் மணிகண்டனும், அவரின் `கடைசி விவசாயி' திரைப்படமும் 'என்சாயி எஞ்சாமி' பாடல் உருவாக்கத்துக்கு பெரிய உந்து சக்தியாக அமைந்தது. 'என்சாயி எஞ்சாமி' பாடல் வரிகளும், அதன் உருவாக்கமும் எங்களது அணியால் விவாதிக்கப்பட்டே செம்மைப்படுத்தப்பட்டது.

பாடல் மூலம் கிடைத்த அனைத்து வருமானம் மற்றும் உரிமைகளும் எங்கள் மூவருக்கும் சமமாகப் பகிரப்பட்டன. என்ஜாய் எஞ்சாமி பாடல் பெற்ற பெருமையை அறிவு மற்றும் சந்தோஷ் நாராயணனுடன் இணைந்து கொண்டாடவே விரும்பினேன்.

செஸ் ஒலிம்பியாட் நிகழ்ச்சியில் பங்கேற்க என்னுடன் சேர்த்து அறிவையும் அழைத்தனர். ஆனால் அவர் அமெரிக்காவில் இருந்ததால் செஸ் ஒலிம்பியாட் நிகழ்ச்சியில் பங்கேற்க முடியவில்லை. அதனால் அறிவின் குரலை மட்டும் இந்நிகழ்ச்சியில் பயன்படுத்தி கொண்டோம். தனது குரலுக்காகவும், பாடலில் அவரின் பங்களிப்புக்காகவும் நிகழ்வில் அறிவு பேசப்பட்டார். 'என்ஜாய் எஞ்சாமி' பாடலை உருவாக்கியதற்காக சந்தோஷ் நாராயணன், அறிவு, மஜா உள்ளிட்ட ஒட்டுமொத்த குழுவின் ஆதரவிற்கும் என் இதயத்திலிருந்து நன்றி தெரிவித்து கொள்கிறேன். இது குறித்து மீடியா முன்னாள் எப்போது வேண்டுமானாலும் விவாதிக்க தயாராக இருக்கிறேன்.

இந்த உலகத்தின் மீதும் உயிர்கள் மீதும் கொண்டுள்ள அன்பு, மரியாதையின் பொருட்டால் சக கலைஞர்களால் 'என்ஜாய் எஞ்சாமி' பாடல் பிறந்தது. என்னைப் பொறுத்தவரை, அது எப்போதும் அப்படியே இருக்கும். உண்மை எப்போதும் வெல்லும்" என்று கூறி உள்ளார்.