அன்றே கணித்தார் உதயநிதி ஸ்டாலின்... 'டான்' - வெற்றி கொண்டாட்டம்

சென்னை,

நடிகர் சிவகார்த்திகேயன் நடிப்பில் கடந்த மே 13-ந்தேதி வெளியான திரைப்படம் 'டான்'. அறிமுக இயக்குனர் சிபி சக்ரவர்த்தி இயக்கியுள்ள இந்த படத்தை லைகா நிறுவனமும், சிவகார்த்திகேயனின் எஸ்.கே.புரொடக்‌ஷன்ஸ் நிறுவனமும் இணைந்து தயாரித்திருந்தது. இந்த படத்திற்கு அனிருத் இசையமைத்திருந்தார்.

இந்த திரைப்படத்தில் சிவகார்த்திகேயனுக்கு ஜோடியாக நடிகை பிரியங்கா மோகன் நடித்திருந்தார். மேலும் டான் படத்தில் சூரி, சமுத்திரக்கனி, விஜய் டிவி புகழ் சிவாங்கி, ஆர்.ஜே.விஜய், முனிஷ்காந்த், பால சரவணன், காளி வெங்கட் உள்ளிட்ட பலர் நடித்திருந்தனர். ரசிகர்களிடம் நல்ல வரவேற்பை பெற்ற டான் திரைப்படம் வசூல் ரீதியாகவும் வெற்றி பெற்றுள்ளது.

இந்த நிலையில், படம் வெற்றி பெற்றதை கொண்டாடும் விதமாக சென்னையில் டான் வெற்றிக்கொண்டாட்ட நிகழ்ச்சி நடைபெற்றது. இதில் சிவகார்த்திகேயன், அனிரூத், உதயநிதி ஸ்டாலின் எம்.எல்.ஏ மற்றும் படத்தில் நடித்திருந்த பலர் பங்கேற்றனர்.

அப்போது மேடையில் பேசிய உதயநிதி ஸ்டாலின், டாக்டர் படத்தை விட இந்த படம் ரசிகர்களிடம் நல்ல வரவேற்பை பெறும் என்று நான் முன்பே கூறியிருந்தேன். அது இப்போது நடந்துவிட்டது. டாக்டர் படம் படைத்த சாதனையை இந்த படம் மூன்றே வாரங்களில் படைத்துவிட்டது. இவ்வாறு அவர் பேசினார்.