வேளாங்கண்ணி புனித ஆரோக்கிய அன்னை பேராலயத்தில் நாளை கிறிஸ்துமஸ் விழா ஏராளமான பக்தர்கள் வருகை

வேளாங்கண்ணி,

வேளாங்கண்ணி புனித ஆரோக்கிய அன்னை பேராலயத்தில் நாளை(ஞாயிற்றுக் கிழமை) கிறிஸ்துமஸ் விழா நடைபெறுகிறது. விழாவில் கலந்துகொள்வதற்காக ஏராளமான பக்தர்கள் வருகை தந்துள்ளனர்.

ஆரோக்கிய அன்னை பேராலயம்

நாகை மாவட்டத்தில் முக்கிய சுற்றலா தலமாக வேளாங்கண்ணி ஆரோக்கிய அன்னை பேராலயம் உள்ளது. இந்த பேராலயம் மத நல்லிணக்கத்திற்கு அடையாளமாக, சர்வ மதத்தினரும் நம்பிக்கையுடன் வழிபட்டு செல்லும் ஆன்மிக தலமாகவும் திகழ்கிறது. கீழை நாடுகளின் ‘லூர்து நகர்‘ என்ற பெருமையுடன் அழைக்கப்படும் அன்னை மரியின் புகழ் பரப்பும் புண்ணிய தலமாகவும் வேளாங்கண்ணி விளங்குகிறது. கிறிஸ்தவ ஆலயத்திற்கு மிக அரிதாக கிடைக்கக்கூடிய ‘பசிலிக்கா‘ என்ற பெருமை மிகு பிரம்மாண்ட கட்டிட அமைப்பில் இந்தியாவில் கட்டப்பட்டுள்ள ஐந்து கிறிஸ்தவ பேராலயங்களில் வேளாங்கண்ணி பேராலயமும் ஒன்று என்பது சிறப்பாகும். மேலும், வேளாங்கண்ணி பேராலயம் முடவனுக்கு அன்னை மரியாள் காட்சி தந்த தலமாகவும் விளங்குகிறது. பேராலயத்தின் அருகிலேயே கடற்கரை அமைந்துள்ளது இப்பேராலயத்தை மேலும் சிறப்பு சேர்ப்பதாகும்.

ஏசு பிறப்பு நிகழ்ச்சி

பல்வேறு சிறப்புகள் பெற்ற வேளாங்கண்ணி பேரலாயத்தில் ஆண்டுதோறும் ஏசு கிறிஸ்து பிறந்தநாளான டிசம்பர் 25-ந்தேதி கிறிஸ்துமஸ் விழா கொண்டாடப்படும். துன்பத்தில் துவண்டு, அமைதி தேடி மன்றாடி வருபவர்களின் மனதை ஆற்றுப்படுத்தி புது வாழ்விற்கு வழிகாட்டி வரும் வேளாங்கண்ணி ஆரோக்கிய அன்னை பேராலயத்தில் ஏசு பிறந்த நாளான கிறிஸ்துமஸ் பண்டிகை நாளில் சிறப்பு பிரார்த்தனைகள் நடைபெறுவது வழக்கம். இதையொட்டி கிறிஸ்துமஸ் பண்டிகைக்கு முந்தைய நாள் நள்ளிரவில் ஏசு பிறப்பு நிகழ்ச்சி நடைபெறும். அதேபோல் நாளை (ஞாயிற்றுக்கிழமை) கிறிஸ்து பிறப்பையொட்டி, இன்று (நள்ளிரவு) ஏசு பிறப்பு நிகழ்ச்சி நடைபெறுகிறது. இதனை முன்னிட்டு வேளாங்கண்ணிக்கு நேற்று காலை முதல் தமிழகம் மட்டுமின்றி பிற மாநிலத்தை சேர்ந்த கிறிஸ்தவ மக்கள் வேளாங்கண்ணி பேராலயத்திற்கு வந்த வண்ணம் உள்ளனர்.

பாதுகாப்பு பணி

நிகழ்ச்சியை முன்னிட்டு வேளாங்கண்ணி விடியற்காலை விண்மீன் ஆலயத்தில் கிறிஸ்துமஸ் குடில் அமைக்கப்பட்டது. கிறிஸ்துமஸ் பண்டிகையை வரவேற்கும் வகையில் பேராலய ஆராதணை மண்டபம் அருகில் வண்ண விளக்குகளால் அலங்கரிக்கப்பட்ட கிறிஸ்துமஸ் கோபுரம் (டவர்) ஒன்று அமைக்கப்பட்டுள்ளது. மேலும் பேராலயத்தை சுற்றி உள்ள செடிகளில் வண்ணவிளக்குகள் அலங்கரிக்கப்பட்டுள்ளது. இதனால் வேளாங்கண்ணி பேராலயத்தை சுற்றிலும் வண்ணமயமாக காணப்படுகிறது. பேராலயத்திற்கு வரும் பக்தர்களை வரவேற்கும் வகையில் பேராலய முகப்பில் அலங்கார வளைவு அமைக்கப்பட்டுள்ளது. பண்டிகையையொட்டி வேளாங்கண்ணிக்கு பக்தர்கள் மற்றும் பொதுமக்கள் அதிக அளவில் வருவதால் அங்கு போலீசார் பாதுகாப்பு பணியில் ஈடுபட்டு வருகின்றனர்.