பெரம்பலூர் மாவட்டத்தில் அடிப்படை வசதிகள் இல்லாத 6 சிறுவர் காப்பகங்களுக்கு சீல் வைப்பு

பெரம்பலூர் மாவட்டத்தில் செட்டிக்குளம், பாடாலூர், பெரம்பலூர் உள்ளிட்ட 7 இடங்களில் சிறுவர் காப்பகங்கள் உள்ளன. இந்த காப்பகங்களில், பெற்றோரை இழந்த, தாய் அல்லது தந்தையை இழந்த குழந்தைகள் தங்கி இருந்தனர். இந்த நிலையில் கடந்த 27-ந் தேதி குழந்தைகள் நலத்துறை பாதுகாப்பு அதிகாரிகள், இந்த காப்பகங்களில் திடீர் ஆய்வு நடத்தினர். இதில் 6 காப்பகங்களில் உள்கட்டமைப்பு வசதிகள் சரியில்லாமல் இருந்தது தெரியவந்தது.

இதனையடுத்து 6 சிறுவர் காப்பகங்களுக்கும் சீல் வைத்தனர். இதுகுறித்து அதிகாரிகள் கூறுகையில், அந்த காப்பகங்களில் கழிப்பறை வசதி, குடிநீர் வசதி உள்ளிட்ட அடிப்படை வசதிகள் சரியில்லாமல் இருந்ததால் குழந்தைகள் அவதி அடைந்து வந்தது தெரியவந்தது. இதனையடுத்து அந்த காப்பகங்களுக்கு சீல் வைத்துள்ளோம் என்றனர்.