கல்லறை தோட்டம் ஆக்கிரமிப்பு; கிராமமக்கள் மறியலுக்கு முயற்சி

மதுரையில் இருந்து பரமக்குடி வரை உள்ள தேசிய நெடுஞ்சாலை நான்கு வழிச்சாலையாக மாற்றும் பணிகள் நடைபெற்று வருகின்றன. இதற்காக மானாமதுரையை அடுத்த கேப்பர்பட்டினம் கிராமத்தில் உள்ள 85 வீடுகள், மேல்நிலை நீர்தேக்க தொட்டி, கல்லறை தோட்டம் உள்ளிட்டவை முற்றிலும் அகற்றப்பட்டன. இவற்றிற்கு மாற்று இடம் தருவதாக வருவாய்த்துறையினர் வாக்குறுதி அளித்தனர். ஆனால் அதிகாரிகள் கூறியபடி, வீடுகள், தண்ணீர் தொட்டி உள்ளிட்டவை இடிக்கப்பட்டு ஒரு மாதத்திற்கு மேலாகியும் மாற்று இடம் வழங்கப்படவில்லை. மேலும் நான்கு வழிச்சாலை அமைக்கும் அதிகாரிகள், கேப்பர்பட்டினத்தில் சாலையோரம் உள்ள 1½ சென்ட் இடத்தை கல்லறை தோட்டமாக பயன்படுத்திக் கொள்ள எழுத்து பூர்வமாக அனுமதி அளித்தனர். அந்த இடத்தை கிராமமக்கள் சுத்தம் செய்தனர். ஆனால் தனிநபர் ஒருவர், கல்லறைக்கு ஒதுக்கப்பட்ட இடம் தன்னுடைய இடம் என கூறி பிரச்சினை செய்துள்ளார்.

இந்தநிலையில் நேற்று சாம்பல் புதன் என்பதால் கல்லறையில் வழிபாடு செய்வதற்காக மக்கள் வந்தனர். அப்போது கல்லறை தோட்டத்தில் ஆக்கிரமிப்பு செய்யப்பட்டு இருந்தது. இதனை கண்டித்து கேப்பர்பட்டினம் கிராமமக்கள் மதுரை–ராமேசுவரம் சாலையில் மறியல் செய்தனர். இதுகுறித்து தகவல் அறிந்த மானாமதுரை போலீசார் மறியல் செய்தவர்களிடம் பேச்சுவார்த்தை நடத்தினர். இதனையடுத்து கிராமமக்கள் அங்கிருந்து கலைந்து சென்றனர்.

அலைக்கழிப்பு

இதுகுறித்து கிராம தலைவர் ஜெயசீலன் கூறுகையில், வாழ்வாதாரத்தை இழந்து 85 குடும்பங்கள் தவிக்கிறது. தண்ணீர்தொட்டி, கல்லறை தோட்டம் உள்ளிட்ட அனைத்தையும் இடித்து அகற்றி விட்டனர். மாற்று இடம் தருவதாக கூறி தாசில்தார் அவர்களை அலைக்கழிக்கிறார், அலுவலகத்திற்கு சென்றால் ஏதாவது காரணத்தை கூறி பதில் சொல்ல மறுக்கின்றனர். எனவே மாற்று இடம் உடனடியாக வழங்க வேண்டும் என்றார்.

கேப்பர்பட்டினத்தை சேர்ந்த செல்வி என்பவர் கூறுகையில், தண்ணீர் தொட்டி இடிக்கப்பட்டதால் 15 நாட்களாக குடிக்கக்கூட தண்ணீரின்றி பரிதவித்து வருகிறோம். கல்லறை தோட்டத்தை தனிநபர் ஆக்கிரமித்ததுடன் தட்டி கேட்கும் கிராமமக்களுக்கு மிரட்டல் விடுக்கிறார். அதிகாரிகள் தகுந்த நடவடிக்கை எடுக்காவிட்டால், ஆதார் கார்டு, ரே‌ஷன் கார்டு ஆகியவற்றை தாசில்தார் அலுவலகத்தில் ஒப்படைக்கப்படும். மேலும் சாலை மறியல் போராட்டமும் நடத்தப்படும் என்றார்.