துபாயில் இருந்து வந்த விமானங்களில் கடத்தி வந்த ரூ.1 கோடி தங்கக்கட்டிகள் பறிமுதல் இலங்கையை சேர்ந்தவர்கள் உள்பட 3 பேர் கைது

மும்பை,

துபாயில் இருந்து விமானங்களில் கடத்தி வந்த ரூ.1 கோடி மதிப்பிலான தங்கக்கட்டிகள் பறிமுதல் செய்யப்பட்டது. இது தொடர்பாக இலங்கையை சேர்ந்தவர்கள் உள்பட 3 பேர் கைது செய்யப்பட்டனர்.

துபாயில் இருந்து நேற்று அதிகாலை மும்பை விமான நிலையத்திற்கு விமானம் ஒன்று வந்திறங்கியது. இதில், வந்த பயணி ஒருவரின் நடவடிக்கையில் சுங்க அதிகாரிகளுக்கு சந்தேகம் ஏற்பட்டது. எனவே அதிகாரிகள் அவரை தனியாக அழைத்து சோதனை நடத்தினர். அப்போது, அவர் வைத்திருந்த உடைமைகளில் எதுவும் சிக்கவில்லை. ஆனாலும் அதிகாரிகளுக்கு அவர் மீது சந்தேகம் வலுத்தது. எனவே அதிகாரிகள் அந்த பயணியின் உடலை ஸ்கேன் செய்தனர். அப்போது அவரது ஆசனவாயில் ஏதோ பொருள் மறைத்து வைக்கப்பட்டு இருப்பது தெரிந்தது.

இதையடுத்து அதிகாரிகள் அவரது ஆசனவாயில் மறைத்து வைக்கப்பட்டு இருந்த 13 தங்கக்கட்டிகளை கண்டுபிடித்தனர். இதன்மதிப்பு ரூ.45 லட்சத்து 50 ஆயிரம் ஆகும்.

அவரிடம் நடத்திய விசாரணையில், அவருடன் விமானத்தில் வந்த அவரது நண்பரும் ஆசனவாயில் மறைத்து வைத்து தங்கக்கட்டிகள் கடத்தியது தெரியவந்தது. இதையடுத்து அவரை பிடித்து அவரிடம் இருந்த 12 தங்கக்கட்டிகளை பறிமுதல் செய்தனர். அதன் மதிப்பு ரூ.42 லட்சம் ஆகும். பிடிபட்ட 2 பேரும் இலங்கையில் உள்ள புத்தாலம் பகுதியை சேர்ந்த ஜமீர் அப்துல்(வயது42), அல்தாப் ஹமீத்(48) என்பது தெரியவந்தது.

இதேப்போல துபாயில் இருந்து மும்பை வந்த மற்றொரு விமானத்தில் வந்திறங்கிய சையத்(26) என்ற பயணியிடம் இருந்து சுங்க அதிகாரிகள் ரூ.17 லட்சம் மதிப்பிலான 2 தங்கக்கட்டிகளை பறிமுதல் செய்தனர்.

–