மணல் கடத்திய லாரி பறிமுதல்; டிரைவர் கைது

செந்துறை,

அரியலூர் மாவட்டம் செந்துறை அருகே உள்ள வெள்ளாற்றில் இரவு நேரங்களில் டிப்பர் லாரிகள் மூலம் மணல் அள்ளப்படுவதாக தளவாய் போலீசாருக்கு தகவல் வந்தது. இதையடுத்து போலீசார் நேற்று அந்த பகுதியில் ரோந்து பணியில் ஈடுபட்டனர். அப்போது தெத்தேரி கிராமம் அருகே வெள்ளாற்றில் சிலர் மணல் அள்ளிக்கொண்டிருந்தனர். போலீசார் வருவதை பார்த்த அவர்கள் அங்கிருந்து தப்பி சென்றனர். இதையடுத்து போலீசார் அங்கு மணல் கடத்திய லாரியை செந்துறை போலீஸ் நிலையத்திற்கு அனுப்பி வைத்தனர். இதையடுத்து போலீசார் வழக்குப்பதிவு செய்து, அனுமதியின்றி மணல் அள்ளியதாக லாரி டிரைவர் சிவக்குமாரை கைது செய்தனர். மேலும் லாரியையும் பறிமுதல் செய்தனர். இதுகுறித்து உடையார்பாளையம் கோட்டாட்சியர் டீனாகுமாரி மேல்விசாரணை நடத்தி வருகிறார்.