பிரா: அழகு.. பாதுகாப்பு.. ஆரோக்கியம்

அதுவே கொஞ்சம் மாறி ரவிக்கைக்குள் அணியும் சிறிய உடையாக (பிரா) மாறியது. அது அவர்களுக்கு அழகு, நம்பிக்கை, சவுகரியத்தை அளித்தது. அதனால் வரவேற்பு அதிகமானது.

அனைவரும் அணிய தொடங்கியதால் ஆடை வடிவமைப்புபோலவே உள்ளாடை வடிவமைப்பிலும் அதிக கவனம் செலுத்தப்பட்டது.

1889-ம் ஆண்டு மே 30-ல் பிரான்ஸ் நாட்டைச் சேர்ந்த பத்திரிகையாளர் ‘ஹர்மினி காடோலே’ முதன்முதலில் பிராவை வடிவமைத்தார். இது ஆடைக்குள் அணியும் உள்ளாடை என்பதால் அளவில் சிறியதாக வடிவமைக்கப்பட்டிருந்தது. எளிமையாக பயன்படுத்தும் வகையில் இருந்ததால் அனைவரும் விரும்பி வாங்கினார்கள்.

அழகுடன், பாதுகாப்பும் தந்த உள்ளாடைகள் ஒரு அத்தியாவசிய ஆடையாக மாறியது. அதனால் இன்று பல நிறுவனங்கள் உள்ளாடைகளை மட்டுமே வடிவமைத்து விற்பனை செய்கின்றன.

விக்டோரியா ராணி காலத்தில் அரசிக்கு உள்ளாடை வடிவமைத்தவர்கள் ‘கோர்ஸெட்ஸ்’ எனப்படும் கோட்டு போன்ற அமைப்புடைய மேலாடையை வடிவமைத்தார்கள். அதன் உட்புறத்தில் ஜாக்கெட் போன்ற அமைப்பைக் கொண்ட ஆடையின் பின்புறத்தில் பல நாடாக்கள் இருந்தன. அதனை இழுத்து பின்புறம் முடிச்சுபோட வேண்டும். ராணியின் குடும்பத்தினர் அணிவதை பார்த்து, அதே போன்று வடிவமைத்து பல பெண்கள் அணிய ஆசைப்பட்டார்கள். ஆனால் சாதாரண பெண்களுக்கு அந்த டிசைன் அசவுகரியமாக இருந்தது.
பின்னர் மெல்லமெல்ல பல மாற்றங்களை அடைந்து நவீன ‘பிரா’க்கள் வெளிவரத் தொடங்கின. இன்று சரியான அளவு, ஏராளமான வண்ணங்கள், பாதுகாப்பு, நம்பிக்கை, சவுகரியம் என எல்லாம் கலந்த கலவையாக கச்சிதமாக பிராக்கள் வடிவமைக்கப்படுகின்றன.

ஆரம்ப காலத்தில் கிராமப்புறங்களில் பெரும் சர்ச்சையை சந்தித்தது ‘பிரா’க்கள். அப்போது கிட்டத்தட்ட ஜாக்கெட்டின் பாதி அளவுடன் கூடிய மெல்லிய துணியால் வடிவமைக்கப்பட்டு முன்னால் முடிச்சுபோடும் விதத்தில் ‘பிரா’க்கள் இருந்தன. அளவில் குறைந்தது என்பதால் அதற்கு மேல் ஜாக்கெட் அணிய வேண்டும். பார்க்க கொஞ்சம் கவர்ச்சிகரமாக இருந்ததால் வெளிவேலைக்குச் செல்லும் பெண்கள் அத்தகைய பிரா அணிவதை விரும்பவில்லை.

சில நூற்றாண்டுகளுக்கு முன்பெல்லாம் சில இடங்களில் பெண்கள் ஜாக்கெட் அணிவதையே எதிர்த்தார்கள். பிந்தைய காலங்களில் ஜாக்கெட் இல்லாமல் உடல் முழுவதும் புடவையை சுற்றிக்கொண்டார்கள். அதையே அன்றைய பெண்கள் சவுகரியம் என்று கருதியதால், அப்போது அறிமுகமான பிராக்கள் அதிக சர்ச்சைகளை உருவாக்கியது. ‘குடும்பப் பெண்கள் உள்ளாடை அணியக்கூடாது’ என்ற பிற்போக்கான வாதம்கூட அப்போது எழுப்பப்பட்டது. ஜாக்கெட் அணிவதுகூட தவறானது என்று பலர் பெண்களை தடுத்து நிறுத்தினர். அதில் உள்ள பாதுகாப்பை பற்றி யாரும் சிந்திக்கவில்லை. நகர்ப் புறத்திலிருந்து கிராமத்திற்கு வாழ்க்கைப்பட்டு போகும் பெண்களுக்கு இந்த உள்ளாடை, ஜாக்கெட் விவாதம் அப்போது பெரும் பிரச்சினையாக இருந்தது.

இன்றும்கூட நம் நாட்டில் உள்ளாடையை ஒரு ஒதுக்கப்பட்ட விஷயமாகவே சிலர் பார்க்கிறார்கள். பிராவை பலர் கண்ணில்படும்படி உலர்த்தக்கூடாது. ‘பிரா’ பட்டை ஜாக்கெட்டிற்கு வெளியே தென்படக்கூடாது. ஜாக்கெட் நிறத்திற்கு மாறான நிறத்தில் பிரா இருக்கக்கூடாது. வெள்ளை ஜாக்கெட்டுக்கு, கருப்பு பிரா அணியக்கூடாது. இப்படி பல விதமான பார்வைகள் உள்ளன.

இந்த உள்ளாடைக்கும், உடல் ஆரோக்கியத்திற்கும் தொடர்பு இருக்கிறது. தவறான உள்ளாடைகளை தேர்ந்தெடுத்து அணிந்தால் உடல் நலமும் பாதிக்கப்படும். முதுகு வலி, தோள்பட்டை வலி, மூச்சுத் திணறல், உடல் எரிச்சல், அஜீரணக் கோளாறு போன்றவை அடிக்கடி ஏற்பட்டால் அதற்கு அவர்கள் பயன்படுத்தும் பொருத்தமற்ற பிராக்களும் காரணமாக இருக்கலாம்.
திரையில் கவர்ச்சியாக நடிக்கும் நடிகைகள் கூட உள்ளாடை விஷயத்தில் மிக கவனமாக இருக்க வேண்டும். சமீபத்தில் ஒரு பேஷன் நிகழ்ச்சியில் பிரபல இந்தி நடிகை பிரியங்கா சோப்ராவிடம் கேள்வி கேட்டனர்.

‘நீங்கள் சினிமாவில் கவர்ச்சியாக தோற்றமளிக்கிறீர்கள். நிஜ வாழ்க்கையில் வெறும் பிரா அணிந்து வெளியில் வர விரும்புவீர்களா?’ என்ற அர்த்தமற்ற கேள்வி கேட்கப்பட்டது. அவர் வேகமாக மறுத்தார்.

‘அது யாராலும் முடியாது. திரைப்படம் என்பது வேறு. நிஜ வாழ்க்கை வேறு. பொது இடத்தில் அப்படி தோற்றமளித்தால் அது பொது மக்களுக்கு இடைஞ்சலை ஏற்படுத்தும் குற்றமாக கருதப்பட்டுவிடும். உள்ளாடை என்பது பாதுகாப்பிற்காக அணியப்படுவது. அது நாம் அணியும் உடைக்குள்தான் இருக்க வேண்டும். அதுதான் மரியாதை’ என்று பதில் அளித்தார்.

பிரா அணிய விரும்பாத நடிகைகளும் இருக்கிறார்கள். தீபிகாபடுகோனே ‘பெரும்பாலும் நான் அணியும் உடைகள் உடலை மூடி இருப்பதால் பிரா அணியத் தேவையில்லை என்று நினைக்கிறேன்’ என்று வெளிப்படையாக சொன்னார். இவரைப் போல சன்னிலியோன், பூனம் பாண்டே, உலகப் புகழ் பெற்ற மாடல் கிம் கர்த்ஷியான், பாடகி ரிஹானா போன்ற பலர் உள்ளாடை அணிவதை விரும்புவதில்லை என்ற கருத்தை வெளிப்படுத்தி யிருக்கிறார்கள்.

1990-ல் இது பற்றி ஒரு ஆய்வு நடத்தப்பட்டது. ‘இது ஒரு சவுகரியமான உள்ளாடையாக இருந்தாலும் இதை எப்போதும் அணிந்து கொள்ளக் கூடாது’ என்று ஆய்வு முடிவை வெளியிட்டார்கள். ‘தொடர்ந்து இறுக்கமான பிராக்களை அணிந்தால், மார்பக தசைகளின் வளர்ச்சி தடைபடுகிறது. அதிக இறுக்கத்தால் தோல் வியாதிகள் உருவாகவும் வழி வகுக்கிறது. ரத்த ஓட்டம் தடைபடுகிறது. இதனால் மூச்சுத் திணறல் ஏற்படுகிறது. அதனால் தேவையான நேரத்தில் மட்டும் அணிந்து கொள்ளுங்கள்’ என்று அறிவுறுத்தப்பட்டது. இது ஆரோக்கியம் சார்ந்த அறிவிப்பாகும்.

வியர்வை கசிவால் நோய் தொற்றுகளும் ஏற்படுகிறது. அதனால் சரியான அளவு உள்ளாடைகளை தேர்வு செய்து முறையாக அணிந்துகொள்ள பழக வேண்டும். ஆனால் நம் நாட்டில் இது பற்றி மற்றவரிடம் ஆலோசனை கேட்க தயங்குகிறார்கள். சரியான முறையில் பிரா அணிவது பற்றி “யூ-டியூபில்” வீடியோ வெளியிட்டிருக்கிறார்கள். இதுவரை 10 லட்சம் பேர் அதை கண்டிருக்கிறார்கள். ஏதேனும் அசவுகரியம் என்றால் அது எதனால் என்று பாருங்கள். உங்கள் உடலமைப்பிற்கு எப்படிப்பட்ட ‘பிரா’வை தேர்வு செய்வது என்பதையும் வலைத்தளங்களில் பார்த்து தெரிந்து கொள்ளுங்கள். ‘பிரா’ என்பது அழகு, நம்பிக்கை, சவுகரியம், பாதுகாப்பு, ஆரோக்கியம் போன்ற அனைத்தையும் உள்ளடக்கியது.