சிதம்பரத்தில் தீ விபத்து 4 கூரை வீடுகள் எரிந்து சாம்பல்

சிதம்பரம்,

சிதம்பரம் தில்லைக்காளியம்மன் கோவில் தெருவை சேர்ந்தவர் ராஜா(வயது 45). இவர் நேற்று காலை வீட்டை பூட்டிவிட்டு வெளியே சென்றிருந்தார். இந்த நிலையில் மதியம் 1 மணி அளவில் அவரது கூரை வீடு திடீரென தீப்பிடித்து எரியத்தொடங்கியது.

இதை பார்த்த அக்கம்பக்கத்தினர் தீயை அணைக்க தண்ணீரை ஊற்றினர். ஆனால் அவர்களால் தீயை அணைக்க முடியவில்லை. இதற்கிடையே மளமளவென எரிந்த தீ, அருகில் உள்ள பக்கத்து வீடுகளும் பரவியது.

இதுபற்றி தகவல் அறிந்ததும் சிதம்பரம் தீயணைப்பு வீரர்கள் சம்பவ இடத்துக்கு விரைந்து வந்து தண்ணீரை பீய்ச்சியடித்து தீயை அணைத்தனர். இருப்பினும் இந்த தீ விபத்தில் ராஜா, சிவகாமி, மஞ்சுளா, பாஸ்கர் ஆகிய 4 பேரது கூரை வீடுகள் எரிந்து சாம்பலானது. வீட்டில் இருந்த பொருட்களும் சேதமடைந்தன. இதன் சேதமதிப்பு ரூ.1½ லட்சம் என கூறப்படுகிறது. மின்கசிவினால் இந்த தீ விபத்து நிகழ்ந்ததாக கூறப்படுகிறது.