மோட்டார் சைக்கிள் மீது லாரி மோதல்: கூலித்தொழிலாளிகள் 3 பேர் படுகாயம்

கரூர்,

கரூர் அருகே கிருஷ்ணராயபுரத்தை சேர்ந்தவர் கருப்பசாமி (வயது28). இவர் வாங்கல் பகுதியில் ஒரு கோழிப்பண்ணையில் கூலித்தொழிலாளியாக வேலைபார்த்து வருகிறார். இவருடன் அதே பகுதியை சேர்ந்த முருகேசன் (50), சக்திவேல் (28) ஆகியோரும் பணியாற்றி வருகின்றனர். சம்பவத்தன்று இரவு கருப்பசாமி, தனது சக தொழிலாளர்களான முருகேசன், சக்திவேலுடன் ஒரே மோட்டார் சைக்கிளில் மண்மங்கலம் பிரிவு ரோட்டில் திரும்பும் போது அந்த வழியாக வந்த லாரி மோதியது. இதில் கருப்பசாமி உள்பட 3 பேரும் படுகாயமடைந்தனர். அவர்கள் சிகிச்சைக்காக கரூரில் ஒரு தனியார் மருத்துவமனையில் அனுமதிக்கப்பட்டனர். இந்த விபத்து தொடர்பாக வாங்கல் போலீசார் வழக்குப்பதிவு செய்து லாரியை ஓட்டி வந்த விருதுநகர் மாவட்டம் ஸ்ரீவில்லிபுத்தூரை சேர்ந்த சிவசங்கரனை (39) கைது செய்தனர்.