பிள்ளைகளின் படிப்புக்காக இந்தியர்கள் எவ்வளவு செலவிடுகிறார்கள்? ஆய்வில் புதிய தகவல்

மும்பை,

இந்தியா, அமெரிக்கா, ஆஸ்திரேலியா உள்ளிட்ட 15 நாடுகளை சேர்ந்த 8 ஆயிரத்து 481 பெற்றோரிடம் இந்த ஆய்வு மேற்கொள்ளப்பட்டது. இந்த பட்டியலில் இந்தியா 13-வது இடத்தை பிடித்து உள்ளது.

இந்திய பெற்றோர் தங்களுடைய ஒரு குழந்தையின் படிப்புக்காக (தொடக்க கல்வி முதல் இளநிலை பட்டப்படிப்பு வரை) 18 ஆயிரத்து 909 அமெரிக்கா டாலர் (இந்திய மதிப்பில் சுமார் ரூ.12 லட்சத்து 35 ஆயிரம்) செலவிடுகிறார்கள் என கண்டறியப்பட்டு உள்ளது. இந்த செலவானது பள்ளி மற்றும் கல்லூரி கட்டணம், புத்தக செலவு, போக்குவரத்து செலவு, உள்ளிட்ட அனைத்தையும் உள்ளடக்கியதாகும்.

இந்தியாவை பொறுத்தவரை 89 சதவீத பெற்றோர் தங்களது பிள்ளைகள் அவர்கள் விரும்பிய துறையில் முழு நேர வேலை வாய்ப்பை பெற முதுகலை பட்டம் பெறுவது அவசியம் என கருதுகிறார்கள்.

59 சதவீத இந்திய பெற்றோர் தங்களது வருமானத்தின் ஒரு பகுதியை பிள்ளைகளின் கல்விக்காக செலவிடுகிறார்கள். 48 சதவீத பெற்றோர் பொது சேமிப்பு, முதலீடுகள் மற்றும் காப்பீடு ஆகியவற்றில் இருந்தும், 38 சதவீத பெற்றோர் கல்விக்கான பிரத்யேக சேமிப்புகள் மற்றும் காப்பீடுகள் மூலமும் பிள்ளைகளின் கல்விக்காக செலவு செய்கிறார்கள்.