மாவட்டத்தில் நாளை டி.என்.பி.எஸ்.சி. குரூப்-2 தேர்வை 27,636 பேர் எழுதுகிறார்கள்

தர்மபுரி,

இதுதொடர்பாக தர்மபுரி மாவட்ட வருவாய் அலுவலர் சங்கர் வெளியிட்டுள்ள செய்திக்குறிப்பில் கூறியிருப்பதாவது:-

தமிழ்நாடு அரசு பணியாளர் தேர்வாணையத்தால் நடத்தப்படும் ஒருங்கிணைந்த டி.என்.பி.எஸ்.சி. குரூப்-2-ஏ பதவிகளுக்கான போட்டித்தேர்வு நாளை(ஞாயிற்றுக்கிழமை) நடைபெற உள்ளது. இந்த தேர்வுக்காக தர்மபுரி மாவட்டத்தில் தர்மபுரி, அரூர் ஆகிய இடங்களில் தேர்வு மையங்கள் அமைக்கப்பட்டு உள்ளன. தர்மபுரியில் அமைக்கப்பட்டுள்ள தேர்வு மையங்களில் 19,686 பேரும், அரூரில் அமைக்கப்பட்டுள்ள தேர்வு மையங்களில் 7950 பேரும் தேர்வெழுத உள்ளனர்.

தர்மபுரி மாவட்டத்தில் மொத்தம் 27,636 பேர் இந்த தேர்வை எழுதுகிறார்கள். தேர்வு எழுத வரும் விண்ணப்பதாரர்கள் தேர்வு மையத்தில் செல்போன்,கால்குலேட்டர் மற்றும் எலக்ட்ரானிக் கைகடிகாரம் போன்ற தகவல் பரிமாற்ற கருவிகளை பயன்படுத்த அனுமதிக்கப்பட மாட்டார்கள். எனவே அவற்றை தேர்வு மையங்களுக்கு கொண்டு வருவதை தவிர்க்குமாறு கேட்டுக்கொள்ளப்படுகிறார்கள். அவ்வாறு கொண்டு வரப்படும் பொருட்கள் தேர்வுக்கூடத்தில் தடை செய்யப்பட்டவை என்பதால் அவற்றின் பாதுகாப்பிற்கு அவர்களே பொறுப்பேற்க வேண்டும்.

தேர்வு மையங்களில் முறைகேடுகள் நடப்பதை தடுக்க கண்காணிப்பு கேமராக்கள் பொருத்த நடவடிக்கை மேற்கொள்ளப்பட்டுள்ளது. எனவே அனைத்து தேர்வர்களும் தேர்வு மையத்தில் அச்சமின்றி தேர்வுகளை எழுதலாம்.

தேர்வுகளில் எந்தவிதமான முறைகேடான நடவடிக்கையிலும் ஈடுபடக்கூடாது. தேர்வு மையங்கள் வழியாக செல்லும் பஸ்கள் அனைத்தும் தேர்வு மையங்களில் நின்று செல்லவும் ஏற்பாடு செய்யப்பட்டு உள்ளது. இவ்வாறு அதில் கூறப்பட்டுள்ளது.