விவசாயியிடம் இருந்து பணத்தை பறித்து கொண்டு ஓடிய வாலிபருக்கு தர்ம அடி

குடியாத்தம்,

குடியாத்தம் அருகே கல்லப்பாடி கிராமத்தை சேர்ந்தவர் கார்த்திகேயன் (வயது 45), விவசாயி. இவர் நேற்று மதியம் குடியாத்தம் நடுப்பேட்டை ராஜாஜி தெருவில் உள்ள இந்தியன் வங்கியில் நகைகளை வைத்து ரூ.55 ஆயிரம் பெற்றுள்ளார்.

அந்த பணத்தை ஒரு பையில் வைத்து தனது மோட்டார் சைக்கிளில் மாட்டி உள்ளார். அப்போது கண்ணிமைக்கும் நேரத்தில் வாலிபர் ஒருவர் பணம் இருந்த பையை எடுத்துக் கொண்டு ஓடினார்.

இதனால் அதிர்ச்சி அடைந்த கார்த்திகேயன் கூச்சலிட்டார். அப்போது அக்கம்பக்கத்தில் இருந்தவர்கள் வாலிபரை விரட்டி சென்று பிடித்தனர். பின்னர் அந்த வாலிபரின் கைகளை கட்டி தர்ம அடி கொடுத்தனர்.

இதுகுறித்து தகவல் அறிந்ததும் குடியாத்தம் டவுன் போலீஸ் இன்ஸ்பெக்டர் இருதயராஜ் மற்றும் போலீசார் விரைந்து சென்று அந்த வாலிபரை போலீஸ் நிலையத்திற்கு அழைத்து வந்து விசாரணை நடத்தினர்.

விசாரணையில் அவர் ஆந்திர மாநிலம் விஜயவாடா ஆட்டோ நகரை சேர்ந்த சீனிவாசலு (வயது 28) என்பது தெரியந்தது. அவரிடம் போலீசார் தொடர்ந்து விசாரணை நடத்தி வருகின்றனர்.