மாணவி அனிதாவின் சாவுக்கு நீதி கேட்டு கடலூர் மாவட்டம் முழுவதும் கல்லூரி மாணவர்கள் போராட்டம்

இதுபற்றி அறிந்த சிதம்பரம் நகர போலீஸ் இன்ஸ்பெக்டர் அம்பேத்கார் தலைமையிலான போலீசார் சம்பவ இடத்துக்கு விரைந்து வந்தனர். அப்போது, மாணவர்களை அங்கிருந்து கலைந்து போக செய்யும் வகையில் போலீஸ் வாகனம் பல்கலைக்கழகத்தின் உள்ளே நுழைய முயன்றது. இந்நிலையில் அங்கு சாலையில் அமர்ந்திருந்த மாணவர்கள் வாகனத்தை தடுத்து நிறுத்தி முற்றுகையிட்டனர். இதையடுத்து போலீசார் அங்கிருந்து வாகனத்தை பின்னோக்கி எடுத்து சென்றனர்.

பின்னர் போராட்டத்தில் ஈடுபட்டவர்களிடம் போலீசார் பேச்சுவார்த்தை நடத்தினர். ஆனால் பேச்சுவார்த்தை தோல்வியில் முடிந்தது. இதனால் அவர்களது போராட்டம் தொடர்ந்து நீடித்தது. வெயிலின் தாக்கம் அதிகம் இருந்தும், அதை பொருட்படுத்திக்கொள்ளாமல் ஏராளமான மாணவ, மாணவிகள் போராட்டத்தில் கலந்து கொண்டனர். தொடர்ந்து அங்கு ஏதேனும் அசம்பாவித சம்பவங்கள் நிகழாமல் தடுக்கும் வகையில் போலீசார் குவிக்கப்பட்டு இருந்தனர்.

கடலூர் தேவனாம்பட்டினம் அரசு பெரியார் கல்லூரி மாணவர்கள் நேற்று வகுப்புகளை புறக்கணித்து விட்டு நுழைவு வாசலில் அமர்ந்து உள்ளிருப்பு போராட்டம் நடத்தினர். அப்போது மத்திய, மாநில அரசுகளுக்கு எதிராக கோ‌ஷமிட்டனர். மேலும் தமிழகத்தில் உள்ள ஏழை, எளிய மாணவ–மாணவிகளின் நலன் கருதி நீட் தேர்வை முழுமையாக ரத்து செய்ய வேண்டும் என்று கோ‌ஷங்களை எழுப்பினர். போராட்டம் நடத்திய மாணவர்களிடம் கல்லூரி நிர்வாகம் சார்பில் பேச்சுவார்த்தை நடத்தியும் தொடர்ந்து அவர்கள் போராட்டம் நடத்தினர். அதன்பிறகு சிறிது நேரம் கழித்து அவர்களாகவே அங்கிருந்து கலைந்து சென்றனர்.