குடும்ப தகராறில் தீவைத்து கொளுத்தியதில் காயம் அடைந்த பெண் சாவு; கணவர் கைது

சீர்காழி,

சீர்காழி அருகே எடமணல் பெரிய தெருவை சேர்ந்தவர் சுதாகர் (வயது 45) கூலித்தொழிலாளி. இவருடைய மனைவி மாலதி (38). இந்நிலையில் சுதாகர், தனது மனைவி மாலதியின் நடத்தையில் சந்தேகப்பட்டு அடிக்கடி தகராறு செய்து வந்ததாக கூறப்படுகிறது. நேற்று முன்தினம் கணவன்–மனைவி இடையே ஏற்பட்ட தகராறில் சுதாகர், மாலதி மீது மண்எண்ணெய்யை ஊற்றி தீ வைத்தார். இதில் பலத்த தீக்காயம் அடைந்த மாலதியை அக்கம் பக்கத்தினர் மீட்டு சிகிச்சைக்காக சீர்காழி அரசு மருத்துவமனையில் சேர்த்தனர். இதுகுறித்த புகாரின்பேரில் போலீசார் வழக்குப்பதிவு செய்து சுதாகரை தேடி வந்தனர். இந்தநிலையில் மருத்துவமனையில் சிகிச்சை பலனின்றி மாலதி பரிதாபமாக இறந்தார். இதைத்தொடர்ந்து போலீசார் இந்த வழக்கை கொலை வழக்காக மாற்றி சுதாகரை கைது செய்து விசாரணை நடத்தி வருகிறார்கள்.