கமல்ஹாசன் அரசியலுக்கு வந்தால் மக்களுக்கு நல்லது செய்வார் நடிகை ஓவியா பேட்டி

கோவை,

பணம், புகழ் உள்ளதால் அரசியலை தவறாக பயன்படுத்த மாட்டார் என்றும் நடிகர் கமல்ஹாசன் அரசியலுக்கு வந்தால் நிச்சயமாக மக்களுக்கு நல்லது செய்வார் என்றும் கோவையில் நடிகை ஓவியா கூறினார்.

கோவை சிங்காநல்லூரில் உள்ள ஒரு தனியார் கல்லூரியில் நடந்த நிகழ்ச்சியில் பங்கேற்பதற்காக நேற்று கோவை வந்த நடிகை ஓவியா நிருபர்களிடம் கூறியதாவது:-

என்னை பற்றி தமிழக மக்கள் தெரிந்து இருந்தாலும் தனியார் டி.வி. நிகழ்ச்சி மூலம் மக்களிடம் பிரபலம் அடைந்தேன். இதனால் நான் யார்? எனது குணம் எப்படி? என்பதை அனைவரும் தெரிந்து கொண்டனர். இந்த நிகழ்ச்சிக்கு செல்ல எனது பெற்றோர் உறுதுணையாக இருந்தனர்.

என்னை ஏற்றுக்கொண்ட மக்களுக்கு ஏதாவது செய்ய விரும்புகிறேன். அதற்காக என்னை தயார் செய்து வருகிறேன். நல்லது செய்ய வேண்டும் என்பது எனது ஆத்ம திருப்திக்காகதான். மற்றவர்கள் என்னைப் பற்றி என்ன நினைப்பார்கள் என்று எப்போதும் நான் கவலைப்பட்டது இல்லை.

அரசியல் என்பது காமெடியான விஷயம் இல்லை. சேவை செய்ய அரசியல் ஒரு மிகப்பெரிய அடித் தளம். தற்போது பலர் புகழ் மற்றும் பணத்துக்காக அரசியலை தவறாக பயன்படுத்தி வருகிறார்கள். நடிகர் கமல்ஹாசன் எனக்கு மிகவும் பிடித்தவர் மட்டுமின்றி, மனிதாபிமானம் படைத்தவர். எனவே அவர் அரசியலுக்கு கண்டிப்பாக வர வேண்டும். ஏற்கனவே அவரிடம் பணம், புகழ் உள்ளதால் அரசியலுக்கு அவர் வந்தால் தவறாக பயன்படுத்த மாட்டார். நிச்சயமாக மக்களுக்கு நல்லது செய்வார். கமல்ஹாசன் அரசியலுக்கு வந்தால் என்னுடைய ஆதரவு அவருக்குதான். அவர் அரசியலுக்கு வர உள்ளதால் சினிமாவுக்கு ஓய்வு கொடுக்க மாட்டார் என்று நினைக்கிறேன். ஏனென்றால் சினிமாவில் கலைஞனுக்கு எப்போதுமே ஓய்வு கிடையாது.

சினிமா என்பது ஒரு பொழுதுபோக்கு. மக்கள் மனது வைத்தால் மட்டுமே சினிமாவில் நடிப்பவர்கள் அரசியலில் பிரவேசிக்க முடியும். அது யாராக இருந்தாலும் சரி. எனக்கு அரசியல் தெரியாது என்பதால் நான் இப்போதைக்கு அரசியலுக்கு வர மாட்டேன். சிறந்த படங்களில் நடிக்கவே நான் முழு கவனம் செலுத்தி வருகிறேன். தற்போது நான் ‘காஞ்சனா‘ என்ற படத்தில் நடிக்க ஒப்பந்தம் ஆகியுள்ளேன். நான் இதுவரை யாரை யும் போட்டியாக நினைத்தது இல்லை.

இவ்வாறு அவர் கூறினார்.