தென்தாமரைகுளம் அருகே இளம்பெண் பாலியல் பலாத்காரம் சமையல் தொழிலாளி கைது

தென்தாமரைகுளம்,

வழுக்கம்பாறை அருகே உள்ள கிராமத்தை சேர்ந்த திருமணம் முடிந்து 3 ஆண்டுகள் ஆன ஒரு இளம் தம்பதியினர் வேலை சம்பந்தமாக தென்தாமரைகுளம் தேரிவிளை கிராமத்தில் வாடகைக்கு வீடு எடுத்து தங்கினர்.

அவர்களுக்கு குழந்தைகள் இல்லை. அந்த இளம்பெண்ணின் கணவர் கட்டிட வேலைக்கு சென்று வந்தார். காலையில் வேலைக்கு சென்றால் மாலையில் தான் வீடு திரும்புவார்.

இந்தநிலையில் நேற்று முன்தினம் கணவர் வேலைக்கு சென்ற பின் அந்த இளம்பெண் வீட்டில் மதியம் டி.வி. பார்த்துக் கொண்டிருந்தார். அப்போது அதே பகுதியை சேர்ந்த சமையல் தொழிலாளி செல்வராஜ் (வயது 54) என்பவர் அந்த வீட்டிற்குள் நுழைந்தார்.

இதனால் அதிர்ச்சி அடைந்த இளம்பெண் என்ன வேண்டும் என்று கேட்ட போது, செல்வராஜ் கத்தியை காட்டி மிரட்டி அவரை பாலியல் பலாத்காரம் செய்துவிட்டு தப்பிச்சென்றார்.

இதனால் பாதிக்கப்பட்ட அந்த இளம்பெண், வேலைக்கு சென்ற கணவர் திரும்பி வந்தவுடன் நடந்தவற்றை கூறி கண்ணீர் விட்டு கதறி அழுதார். பின்னர், இதுகுறித்து அவரது கணவர் தென்தாமரைகுளம் போலீசில் புகார் செய்தார். அதன்பேரில் போலீசார், செல்வராஜ் மீது வழக்குப்பதிவு செய்து அவரை கைது செய்தனர்.