மோட்டார் சைக்கிள் - சரக்கு வேன் நேருக்கு நேர் மோதல்; வாலிபர் பலி

மணப்பாறை,

மணப்பாறையை அடுத்த புத்தாநத்தம் அருகே உள்ள ஆண்டியகவுண்டம்பட்டியை சேர்ந்தவர் தேவராஜ் (வயது 27). இவர் தனியார் கூரியர் நிறுவனத்தில் வேலை பார்த்து வந்தார். இந்நிலையில் நேற்று மதியம் புத்தாநத்தத்தில் இருந்து துவரங்குறிச்சி நோக்கி மோட்டார் சைக்கிளில் சென்று கொண்டிருந்தார். மணப்பாறை - துவரங்குறிச்சி சாலையில் புத்தாநத்தம் அருகே கருஞ்சோலைப்பட்டி என்ற இடத்தில் சென்றபோது எதிரே துவரங்குறிச்சியில் இருந்து மணப்பாறை நோக்கி சென்ற சரக்கு வேன் மோட்டார் சைக்கிள் மீது நேருக்கு நேர் மோதியது. இந்த விபத்தில் தேவராஜ் படுகாயமடைந்தார். அக்கம், பக்கத்தினர் அவரை மீட்டு சிகிச்சைக்காக துவரங்குறிச்சி அரசு மருத்துவமனைக்கு அனுப்பி வைத்தனர். ஆனால் மருத்துவமனையில் தேவராஜை பரிசோதனை செய்த டாக்டர்கள் அவர் இறந்து விட்டதாக கூறினர். இந்த சம்பவம் பற்றி தகவல் அறிந்த புத்தாநத்தம் போலீசார் தேவராஜின் உடலை கைப்பற்றி பிரேத பரிசோதனைக்காக மணப்பாறை அரசு மருத்துவமனைக்கு அனுப்பி வைத்தனர். மேலும் இந்த சம்பவம் தொடர்பாக வழக்குப்பதிவு செய்து விசாரணை மேற்கொண்டு வருகின்றனர்.