அ.தி.மு.க. முன்னாள் எம்.பி.யிடம் ரூ.22 லட்சம் வழிப்பறி: 12 பேர் கைது

வாணியம்பாடி,

கோவை எஸ்.எம்.பாளையம் பகுதியை சேர்ந்தவர் யூ.ஆர்.கிருஷ்ணன். அ.தி.மு.க.வை சேர்ந்த இவர் 1977–ம் ஆண்டு முதல் 1983–ம் ஆண்டு வரை மாநிலங்களவை உறுப்பினராக இருந்துள்ளார். இவர் கடந்த 27–ந்தேதி கோவையில் இருந்து தனது நண்பர்கள் 4 பேருடன் திருப்பதிக்கு காரில் சென்றார்.

அப்போது தமிழக–ஆந்திர எல்லையில் உள்ள நடுமீனூர் வனப்பகுதியில் சென்றபோது, 2 கார் மற்றும் மோட்டார் சைக்கிளில் வந்த 12 பேர் கொண்ட கும்பல் திடீரென காரை வழிமறித்து, ஆயுதங்களை காட்டி மிரட்டி கிருஷ்ணன் வைத்திருந்த ரூ.22 லட்சத்தை பறித்துச்சென்றனர்.

இதுதொடர்பாக குப்பம் போலீசார் வழக்குப்பதிவு செய்து 4 தனிப்படைகள் அமைத்து குற்றவாளிகளை தேடி வந்தனர். இந்தநிலையில் இந்த வழக்கு தொடர்பாக காஞ்சீபுரத்தை சேர்ந்த தரணிவினோத்பிரபு (46), கிருஷ்ணகிரியை சேர்ந்த அப்துல் (23) உள்பட 12 பேரை தனிப்படை போலீசார் கைது செய்தனர். அவர்களிடம் இருந்து ரூ.20 லட்சத்து 80 ஆயிரம், 5 செல்போன்கள், 2 கார்கள், அதில் இருந்த 5 கத்திகள் ஆகியவற்றை போலீசார் பறிமுதல் செய்தனர். பின்னர் 12 பேரையும் கோர்ட்டில் ஆஜர்படுத்தி சிறையில் அடைத்தனர்.