காஞ்சீபுரம் அரசு ஆஸ்பத்திரியில் டயாலிசிஸ் கருவிகள்

காஞ்சீபுரம், 

காஞ்சீபுரம் அரசு ஆஸ்பத்திரியில் டயாலிசிஸ் செய்வதற்கான 2 கருவிகளை அமைக்க ரூ.14 லட்சம் மாவட்ட கலெக்டரின் விருப்ப உரிமை நிதியில் இருந்து வழங்கப்பட்டது. அந்த 2 டயாலிசிஸ் கருவிகளும் காஞ்சீபுரம் அரசு ஆஸ்பத்திரியில் அமைக்கப்பட்டு அதன் தொடக்க விழா நடந்தது. காஞ்சீபுரம் மாவட்ட கலெக்டர் பொன்னையா இந்த டயாலிசிஸ் கருவிகளை தொடங்கி வைத்து பேசினார்.

அப்போது அவர் கூறுகையில்:-

காஞ்சீபுரம் அரசு ஆஸ்பத்திரியில் ஏற்கனவே 2 டயாலிசிஸ் கருவிகள் மூலம் சிகிச்சை அளிக்கப்படுகிறது. இதன் மூலம் 40-க்கும் மேற்பட்ட நோயாளிகள் சிகிச்சை பெற்று வருகின்றனர். மேலும் அதிக எண்ணிக்கையில் வரும் நோயாளிகளின் தேவையை கருத்தில் கொண்டு ரூ.14 லட்சம் மதிப்பீட்டில் மேலும் 2 கருவிகள் வழங்கப்பட்டுள்ளது.

இவ்வாறு அவர் கூறினார்.

இந்த நிகழ்ச்சியில் காஞ்சீபுரம் எம்.எல்.ஏ. எழிலரசன், மாவட்ட ஊரக வளர்ச்சி முகமை திட்ட இயக்குனர் ஜெயக்குமார், முன்னாள் எம்.எல்.ஏ.க்கள் வாலாஜாபாத் பா.கணேசன், வி.சோமசுந்தரம், ஆஸ்பத்திரி கண்காணிப்பாளர் டாக்டர் சசிகலா, டாக்டர் கல்பனா உள்ளிட்டோர் கலந்துகொண்டனர்.