வங்கி ஊழியரின் மோட்டார்சைக்கிளை திருடிய வாலிபர் கைது

ஒரத்தநாடு,

தஞ்சை மாவட்டம் ஊரணிபுரத்தில் உள்ள ஒரு தேசியமாக்கப்பட்ட வங்கியின் ஊழியர் ஜெயம்கார்த்திகேயன். சம்பவத்தன்று இவர் வங்கிக்கு அருகில் தனது மோட்டார்சைக்கிளை நிறுத்தி இருந்தார். வங்கியில் பணி முடிந்ததும் திரும்ப வந்து பார்த்தபோது மோட்டார்சைக்கிளை காணவில்லை. இதனால் அதிர்ச்சி அடைந்த அவர், திருவோணம் போலீசில் புகார் செய்தார். இதன்பேரில் போலீசார் வழக்குப் பதிவு செய்து விசாரணை நடத்தி வந்தனர்.

இந்த நிலையில் நேற்றுமுன்தினம் திருவோணம் போலீஸ் சப்-இன்ஸ்பெக்டர் மகேந்திரன் மற்றும் போலீசார் ஊரணிபுரத்தில் வாகன சோதனையில் ஈடுபட்டனர். அப்போது மோட்டார்சைக்கிளில் வந்த வாலிபர் ஒருவரை வழிமறித்து போலீசார் விசாரணை நடத்தினர். விசாரணையில் அவர், தஞ்சை பூக்கார தெருவை சேர்ந்த அரவிந்த் (வயது25) என்பதும், அவர் ஓட்டி வந்த மோட்டார்சைக்கிள் வங்கி ஊழியர் ஜெயம்கார்த்திகேயனுக்கு சொந்தமானது என்பது தெரியவந்தது.

அதை அரவிந்த் திருடியதும் தெரியவந்தது. இதையடுத்து அரவிந்தை போலீசார் கைது செய்தனர். அவரிடம் இருந்து மோட்டார் சைக்கிள் பறிமுதல் செய்யப்பட்டது. போலீசாரால் கைது செய்யப்பட்டுள்ள அரவிந்த் மீது தஞ்சை கிழக்கு போலீஸ் நிலையத்தில் கொலை வழக்கு உள்ளது என்பது குறிப்பிடத்தக்கது.