8-வது மாடியில் இருந்து தவறி விழுந்த தொழிலாளி சாவு

தாம்பரம்,

சென்னையை அடுத்த குரோம்பேட்டையில் பிரபல ஜவுளிக்கடைக்காக புதிதாக கட்டிடம் கட்டப்பட்டு வருகிறது. இங்கு ஏராளமான தொழிலாளர்கள் வேலை செய்து வருகிறார்கள்.

ஜார்கண்ட் மாநிலத்தை சேர்ந்தவர் முன்னா ஓரான் (வயது 37). இவர் அந்த கட்டிடத்தில் கட்டிட தொழிலாளியாக வேலை செய்துவந்தார். நேற்று காலை வழக்கம்போல அவர் கட்டிடத்தின் 8-வது மாடியில் வேலை செய்துகொண்டிருந்தார்.

அப்போது எதிர்பாராதவிதமாக நிலைதடுமாறி மாடியில் இருந்து கீழே விழுந்தார். உடனே மற்றவர்கள் விரைந்து சென்று பார்த்தனர். ஆனால் அவர் கீழே விழுந்த இடத்திலேயே உடல் நசுங்கி பரிதாபமாக இறந்தார்.

இதுகுறித்து தகவல் அறிந்த குரோம்பேட்டை போலீசார் சம்பவ இடத்திற்கு சென்று உடலை கைப்பற்றி குரோம்பேட்டை அரசு மருத்துவமனைக்கு பிரேத பரிசோதனைக்காக அனுப்பிவைத்தனர். இந்த சம்பவம் தொடர்பாக வழக்கு பதிவு செய்து விசாரணை நடத்தி வருகின்றனர்.