வருகிற 18-ந் தேதி பா.ஜனதா தேசிய தலைவர் அமித்ஷா மங்களூரு வருகை கடலோர மாவட்டங்களில் 3 நாட்கள் சுற்றுப்பயணம்

பெங்களூரு,

வருகிற 18-ந் தேதி பா.ஜனதா தேசிய தலைவர் அமித்ஷா மங்களூரு வருகிறார். அவர் கடலோர மாவட்டங்களில் 3 நாட்கள் சுற்றுப்பயணம் செய்கிறார்.

அமித்ஷா வருகை

கர்நாடக சட்டசபைக்கு வருகிற மே மாதம் தேர்தல் நடைபெற உள்ளது. இதையொட்டி காங்கிரஸ், பா.ஜனதா கட்சிகளின் தலைவர்கள் கர்நாடகத்திற்கு அடிக்கடி வருகை தருகிறார்கள். அகில இந்திய காங்கிரஸ் தலைவர் ராகுல் காந்தி நாளை(சனிக்கிழமை) முதல் 4 நாட்கள் கர்நாடகத்தில், குறிப்பாக வட கர்நாடகத்தில் சுற்றுப்பயணம் செய்கிறார். பிரதமர் மோடி கடந்த 4-ந் தேதி பெங்களூருவுக்கு வந்து பா.ஜனதா பொதுக்கூட்டத்தில் பேசினார்.

இந்த நிலையில் பா.ஜனதா தேசிய தலைவர் அமித்ஷா வருகிற 18-ந் தேதி முதல் மூன்று நாட்கள் சுற்றுப்பயணம் செய்ய முடிவு செய்ய உள்ளார். அவர் கடலோர மாவட்டங்களில் இந்த பயணத்தை மேற்கொள்கிறார். 19-ந் தேதி மங்களூரு விமான நிலையம் அருகே பா.ஜனதா பொதுக்கூட்டத்தில் அமித்ஷா கலந்து கொண்டு பேசுகிறார்.

கார்வார் மாவட்டத்தில்...

மறுநாள் 19-ந் தேதி குக்கே சுப்பிரமணிய கோவிலுக்கு சென்று சாமி தரிசனம் செய்கிறார். அதைத்தொடர்ந்து புத்தூர், பண்ட்வால் ஆகிய சட்டமன்ற தொகுதிகளில் நடைபெறும் கட்சி கூட்டங்களில் அவர் பங்கேற்கிறார். உடுப்பியில் உள்ள பெஜாவர் மடத்திற்கும் அவர் செல்கிறார். 20-ந் தேதி கார்வார் மாவட்டத்தில் சுற்றுப்பயணம் மேற்கொள்ளும் அமித்ஷா அங்கு கட்சி பொதுக்கூட்டத்தில் பங்கேற்று பேசுகிறார்.

அன்று காலை சிரசியில் உள்ள மாரிகாம்பா கோவிலுக்கு சென்று அவர் சாமி தரிசனம் செய்கிறார். அங்கு நடைபெறும் கட்சி கூட்டத்தில் பங்கேற்றுவிட்டு, ஹொன்னாவராவுக்கு செல்கிறார்.