சென்னையில் வெவ்வேறு சம்பவங்களில் கல்லூரி மாணவர் உள்பட 3 பேர் சாவு

சென்னை, 

சென்னை தியாகராயநகர் பகுதியை சேர்ந்தவர் ராஜசேகர். எலக்டிரீசியன். இவரது மகன் விஷால் (வயது 24). இவர் அதே பகுதியில் உள்ள ஒரு தனியார் கல்லூரியில் படித்து வந்தார். இந்த நிலையில் நேற்று முன்தினம் கல்லூரிக்கு செல்லாமல் விஷால் வீட்டிலேயே இருந்தார். பின்னர் நேற்று முன்தினம் இரவு வீட்டில் யாருமில்லா நேரத்தில் வீட்டில் உள்ள அறையில் விஷால் தூக்குப்போட்டு தற்கொலை செய்து கொண்டார்.

தகவல் அறிந்து சம்பவ இடத்துக்கு விரைந்து வந்த மாம்பலம் போலீசார் கல்லூரி மாணவர் விஷாலின் உடலை மீட்டு, சென்னை அரசு பொது ஆஸ்பத்திரிக்கு அனுப்பி வைத்தனர். அவரது தற்கொலைக்கு காதல் பிரச்சினை காரணமா? அல்லது வேறு ஏதாவது பிரச்சினையா? என்பது குறித்து வழக்குப்பதிவு செய்து விசாரணை நடத்தி வருகின்றனர்.

மின்சார ரெயில் மோதி...

சென்னை பூங்கா- கோட்டை இடையே நேற்று தண்டவாளத்தை கடந்த வில்லிவாக்கம் சிட்கோ நகரை சேர்ந்தவர் சையது முகமது (60) எனும் முதியவர், அந்த வழியே சென்ற மின்சார ரெயில் மோதி உயிரிழந்தார். இந்த சம்பவம் தொடர்பாக எழும்பூர் ரெயில்வே போலீசார் விசாரணை நடத்தி வருகின்றனர்.

சென்னை மெரினா திருவள்ளுவர் சிலை அருகே நேற்று காலை சுமார் 45 வயது மதிக்கத்தக்க ஆண் உடல் கரை ஒதுங்கி கிடப்பதாக போலீசாருக்கு தகவல் கிடைத்தது. இதையடுத்து சம்பவ இடத்துக்கு சென்ற மெரினா போலீசார் உடலை மீட்டு ராயப்பேட்டை அரசு ஆஸ்பத்திரிக்கு அனுப்பி வைத்தனர். அவர் யார்? என்பது குறித்து விசாரணை நடந்து வருகிறது.