பல்பொருள் அங்காடியில் பூட்டை உடைத்து திருட முயன்ற ஆட்டோ டிரைவர் கைது

சேத்துப்பட்டு, 

சேத்துப்பட்டு கண்ணனூர் பகுதியை சேர்ந்தவர் அண்ணாதுரை. இவர் ஜவுளி மற்றும் மளிகை பொருள் விற்பனை செய்யும் பல்பொருள் அங்காடி நடத்தி வருகிறார். கடந்த 25-ந் தேதி இரவு வேலைநேரம் முடிந்ததும் பல்பொருள் அங்காடியை ஊழியர்களுடன் பூட்டிவிட்டு அண்ணாதுரை வீட்டிற்கு சென்றார். இந்த நிலையில் நள்ளிரவு ஆட்டோவில் வந்த ஒருவர் பல்பொருள் அங்காடியின் பூட்டை உடைத்து திருடமுயன்றார். அப்போது அந்த வழியாக யாரோ வருவதைபார்த்து திருட முயன்றவர் ஆட்டோவில் ஏறி தப்பினார்.

மறுநாள் காலையில் பல்பொருள் அங்காடியை திறப்பதற்காக அண்ணாதுரை வந்தபோது கடையின் பூட்டு உடைக்கப்பட்டிருந்ததை கண்டு அதிர்ச்சியடைந்தார். அவர் கடையில் வைத்திருந்த கண்காணிப்பு கேமரா காட்சிகளை ஆய்வு செய்தபோது அம்மனந்தாங்கல் பகுதியை சேர்ந்த ஆட்டோ டிரைவர் விஜய் (வயது 19) பூட்டை உடைத்தது தெரியவந்தது.

இது குறித்து சேத்துப்பட்டு போலீஸ் நிலையத்தில் அண்ணாதுரை புகார் அளித்தார். அதன்பேரில் போலீசார் வழக்குப்பதிவு செய்து ஆட்டோ டிரைவர் விஜய்யை கைது செய்து ஆட்டோவையும் பறிமுதல் செய்தனர். அவரிடம் விசாரணை நடந்து வருகிறது. பல்பொருள் அங்காடியில் பூட்டை உடைத்து திருடியபோது ஆட்டோடிரைவர் கண்காணிப்பு கேமரா மூலம் அடையாளம் காணப்பட்டு கைது செய்யப்பட்டது ஆட்டோ டிரைவர்கள் மத்தியில் பரபரப்பை ஏற்படுத்தியது.