தமிழகத்தில் மூடப்பட்டுள்ள மணல் குவாரிகளை விரைவில் திறக்க நடவடிக்கை ஓ.பன்னீர்செல்வம் பேட்டி

திருச்சி,

தமிழக துணை முதல்-அமைச்சர் ஓ.பன்னீர்செல்வம் நேற்று காலை சென்னையில் இருந்து விமானம் மூலம் திருச்சி வந்தார். அப்போது அவர் விமான நிலையத்தில் நிருபர்களிடம் கூறியதாவது:-

டெல்லியில் 4 மாநில தலைமை செயலாளர்கள் பங்கேற்ற கூட்டத்தில் தமிழக முதல்-அமைச்சரின் ஆலோசனைப்படி தமிழக தலைமை செயலாளர் கலந்து கொண்டார். உச்சநீதிமன்ற தீர்ப்பின்படி 6 வார காலத்துக்குள் காவிரி மேலாண்மை வாரியம் மற்றும் காவிரி நதிநீர் ஒழுங்காற்றுக்குழு அமைக்க வேண்டும் என்ற தமிழக அரசின் நிலைப்பாடு அந்த கூட்டத்தில் தெரிவிக்கப்பட்டுள்ளது.

எனவே 6 வாரத்தில் காவிரி மேலாண்மை வாரியம் அமைக்கப்படும். கோர்ட்டு உத்தரவுப்படி தமிழகத்தில் மூடப்பட்டுள்ள அரசு மணல் குவாரிகளை விரைவில் திறக்க நடவடிக்கை எடுக்கப்படும். மணல் குவாரிகளை தனியாரிடம் ஒப்படைக்க முடிவு செய்தால் அது பற்றி உங்களுக்கு தெரிவிக்கப்படும்.

இவ்வாறு அவர் கூறினார்.