கீரனூர் அருகே தென்னதிரையன்பட்டியில் ஜல்லிக்கட்டு 12 பேர் காயம்

கீரனூர்,

புதுக்கோட்டை மாவட்டம், கீரனூர் அருகே உள்ள தென்னதிரையன்பட்டியில் உள்ள ஆலடிக்கருப்பர் கோவில் விழாவையொட்டி ஜல்லிக்கட்டு நடத்த அனுமதி பெறப்பட்டு ஏற்பாடுகள் மேற்கொள்ளப்பட்டன. அவற்றை அதிகாரிகள் ஆய்வு செய்து ஜல்லிக்கட்டு நடத்த அனுமதி வழங்கினர். இதைத்தொடர்ந்து நேற்று ஜல்லிக்கட்டு நடைபெற்றது.

ஜல்லிக்கட்டில் கலந்து கொள்வதற்காக புதுக்கோட்டை, திண்டுக்கல், கரூர், சிவகங்கை, மதுரை உள்பட பல்வேறு பகுதிகளில் இருந்து 863 காளைகள் அழைத்து வரப்பட்டன. இந்த காளைகளை கால்நடை மருத்துவ குழுவினர் பரிசோதனை செய்தனர். இதேபோல் மாடுபிடி வீரர்களை டாக்டர் குழுவினர் பரிசோதனை செய்ததில் 243 வீரர்கள் ஜல்லிக்கட்டுக்கு தகுதி பெற்றனர்.

ஜல்லிக்கட்டை மாவட்ட கலெக்டர் கணேஷ், மாவட்ட வருவாய் அதிகாரி ராமசாமி ஆகியோர் கொடியசைத்து தொடங்கி வைத்தனர். முதலில் கோவில் காளைகள் அவிழ்த்து விடப்பட்டன. இதனை யாரும் பிடிக்கவில்லை. தொடர்ந்து வாடிவாசலில் இருந்து ஒவ்வொரு காளையாக அவிழ்த்து விடப்பட்டது. அந்த காளைகள் சீறிப்பாய்ந்து வந்தன. இதில் சில காளைகளை வீரர்கள் அடக்கினர். சில காளைகள் தன்னை பிடிக்க வந்த வீரர்களை கொம்பால் முட்டிதூக்கி வீசின. இதில் காளைகள் முட்டியதில் மாடுபிடி வீரர்கள் வீரமணி (வயது 26), தங்கராஜ் (33), பாஸ்கர் (26), தர்மதுரை (25), செல்வம் (21) உள்பட 12 பேர் காயம் அடைந்தனர். இதையடுத்து காயமடைந்தவர்களுக்கு மருத்துவ குழுவினர் முதலுதவி சிகிச்சை அளித்தனர். இதில் 4 பேர் மட்டும் மேல்சிகிச்சைக்காக திருச்சி அரசு மருத்துவமனைக்கு அனுப்பி வைக்கப்பட்டனர்.

ஜல்லிக்கட்டில் காளைகளை அடக்கிய வீரர்களுக்கும், பிடிபடாத காளைகளின் உரிமையாளர்களுக்கும் வெள்ளிகாசு, குத்துவிளக்கு, சைக்கிள், குக்கர், பீரோ, கட்டில், சில்வர் பாத்திரங்கள் உள்பட பல்வேறு பரிசுகள் வழங்கப்பட்டன. ஜல்லிக்கட்டை கீரனூர், குளத்தூர், தென்னதிரையன்பட்டி மற்றும் சுற்று வட்டார கிராமங்களை சேர்ந்த திரளான பொதுமக்கள், இளைஞர்கள் கண்டுகளித்தனர். பாதுகாப்பு ஏற்பாடுகளை மாவட்ட போலீஸ் சூப்பிரண்டு செல்வராஜ் உத்தரவின்பேரில், கூடுதல் துணை போலீஸ் சூப்பிரண்டு மந்திரமூர்த்தி, கீரனூர் துணை போலீஸ் சூப்பிரண்டு பாலகுரு தலைமையில் போலீசார் செய்திருந்தனர்.