வீட்டின் பூட்டை உடைத்து நகை–பணம் திருட்டு மர்மநபர்களுக்கு போலீசார் வலைவீச்சு

மணமேல்குடி,

புதுக்கோட்டை மாவட்டம், மணமேல்குடி செங்குந்தர்புரம் பகுதியை சேர்ந்தவர் வடுகநாதன் (வயது 60). ஓய்வு பெற்ற தபால்காரர். இவர் நேற்று மதியம் தனது உறவினர் திருமணத்திற்காக வீட்டை பூட்டி விட்டு குடும்பத்தோடு சென்று விட்டார். பின்னர் திருமண நிகழ்ச்சி முடிந்து நேற்று மதியம் வீட்டிற்கு வந்தார். அப்போது வீட்டின் பின்பக்க கதவு உடைக்கப்பட்டு கிடந்தது. இதனால் அதிர்ச்சியடைந்த அவர் வீட்டின் உள்ளே சென்று பார்த்தார்.

அப்போது வீட்டின் உள்ளே இருந்த பீரோவை மர்மநபர்கள் உடைத்து, அதில் இருந்த 6 பவுன் தங்கநகை, ரூ.45 ஆயிரத்தை திருடி சென்றது தெரியவந்தது. இதையடுத்து வடுகநாதன் மணமேல்குடி போலீசாருக்கு தகவல் தெரிவித்தார். தகவலின்பேரில் மணமேல்குடி போலீஸ் இன்ஸ்பெக்டர் பாலாஜி தலைமையிலான போலீசார் சம்பவ இடத்திற்கு வந்து விசாரணை நடத்தினர். இதுகுறித்து வடுகாநாதன் கொடுத்த புகாரின்பேரில் போலீசார் நகை–பணத்தை திருடி சென்ற மர்மநபர்களை வலைவீசி தேடி வருகின்றனர். பட்டபகலில் ஓய்வு பெற்ற தபால்காரர் வீட்டில் நகை–பணம் திருடப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.