மாரியம்மன் கோவிலில் கொடியேற்றம் இன்று நடக்கிறது

உடுமலை,

உடுமலையில் சக்திவாய்ந்த தெய்வமாக விளங்கும் மாரியம்மன் கோவில் தேர்த்திருவிழா கடந்த 20-ந்தேதி நோன்பு சாட்டுதல் நிகழ்ச்சியுடன் தொடங்கியது. கடந்த 27-ந்தேதி கம்பம் நடுதல் நிகழ்ச்சி நடந்தது.

இன்று(வெள்ளிக்கிழமை) தேர்த்திருவிழாவுக்கான கொடியேற்றம் பகல் 12.30 மணிக்கு நடக்கிறது. விழாவையொட்டி தினமும் இரவு 7 மணிக்கு மாரியம்மன் சிறப்பு மலர் அலங்காரத்தில் திருவீதி உலா வரும் நிகழ்ச்சி நடக் கிறது.

அதன்படி இன்று காமதேனு வாகனத்திலும், நாளை (சனிக்கிழமை) யானை வாகனத்திலும், நாளை மறுநாள் (ஞாயிற்றுக்கிழமை) ரிஷப வாகனத்திலும், 2-ந்தேதி அன்ன வாகனத்திலும், 3-ந் தேதி சிம்ம வாகனத்திலும் அம்மன் எழுந்தருளி திருவீதி உலா வருகிறார். 4-ந்தேதி மாலை 4 மணிக்கு திருக்கல்யாணமும், அன்று இரவு 8 மணிக்கு மயில் வாகனத்தில் திருவீதி உலா வரும் நிகழ்ச்சியும் நடக்கிறது. தேர்த்திருவிழாவின் முக்கிய நிகழ்ச்சியான தேரோட்டம் வருகிற 5-ந்தேதி மாலை 4.15 மணிக்கு நடக்கிறது.

இதைத்தொடர்ந்து 6-ந்தேதி காலை 8 மணிக்கு ஊஞ்சல் உற்சவமும், மாலை 4 மணிக்கு ஸ்ரீலலிதா திரிசதி அர்ச்சனையும், அன்று இரவு 8 மணிக்கு குதிரை வாகனத்தில் பரிவேட்டையும், இரவு 10 மணிக்கு குட்டைத்திடலில் வாணவேடிக்கை நிகழ்ச்சியும் நடக்கிறது. மறுநாள் 7-ந்தேதி காலை 10.30 மணிக்கு கொடியிறக்கப்படுகிறது. பின்னர் காலை 11 மணிக்கு மகா அபிஷேகமும், 12 மணிக்கு மஞ்சள் நீராட்டும், இரவு 7 மணிக்கு புஷ்பபல்லக்கில் அம்மன் திருவீதி உலாவும் நடக்கிறது.

இதற்கிடையே தேர்த்திருவிழாவை முன்னிட்டு தேரின் சக்கரங்களுக்கு வர்ணம் பூசும் பணி நேற்று நடந்தது. விழாவிற்கான ஏற்பாடுகளை கோவில் பரம்பரை அறங்காவலர் யு.எஸ்.எஸ்.ஸ்ரீதர், செயல் அலுவலர் ஆர்.சங்கரசுந்தரேஸ்வரன் மற்றும் கோவில் பணியாளர்கள், மண்டகப்படிதாரர்கள் செய்துவருகிறார்கள்.