ராஜபாளையம் அருகே சித்தப்பாவை வெட்டிக்கொன்றவர் கைது

ராஜபாளையம்,

ராஜபாளையம் அருகே சொக்கநாதன்புத்தூர் அடுத்த மேலூர் துரைச்சாமிபுரத்தை சேர்ந்தவர் மாரியப்பன் (வயது40) இவருக்கும் அண்ணன் கருப்பசாமியின் மகன் செல்வத்துக்கும் (32) நிலத்தகராறு இருந்து வந்துள்ளது.

இந்த நிலையில் நேற்று முன்தினம் இரவில் மாரியப்பனின் வீட்டிற்கு சென்ற செல்வம் அவரிடம் தகராறு செய்துள்ளார். தகராறு முற்றிய நிலையில் தான் மறைத்து வைத்திருந்த அரிவாளால் சித்தப்பா மாரியப்பனின் தலையில் வெட்டியுள்ளார். இதில் பலத்த காயமடைந்த அவர் அரசு மருத்துவமனைக்கு கொண்டு செல்லும் வழியில் உயிரிழந்தார்.

கணவரை காப்பாற்ற முயன்ற மாரியப்பனின் மனைவி ராமலட்சுமிக்கும் கையில் அரிவாள் வெட்டு விழுந்தது. அவர் ராஜபாளையம் மருத்துவமனையில் அனுமதிக்கப்பட்டு சிகிச்சை பெற்று வருகிறார். சம்பவம் தொடர்பாக தளவாய்புரம் போலீஸ் இன்ஸ்பெக்டர் முத்துகுமார் வழக்கு பதிவு செய்து செல்வத்தை கைது செய்தார்.