தளி அருகே கர்நாடக எல்லையில் பெண் குத்திக்கொலை கணவர் கைது

தேன்கனிக்கோட்டை,

கிருஷ்ணகிரி மாவட்டம் தளி அருகே உள்ள பி.பி.பாளையம் கிராமத்தை சேர்ந்தவர் மோடப்பா (வயது 27). தொழிலாளி. இவருக்கும், தமிழக, கர்நாடக எல்லையில் உள்ள ஆனேக்கல்லை சேர்ந்த ரேணுகா என்பவருக்கும் கடந்த சில ஆண்டுகளுக்கு முன்பு திருமணம் நடைபெற்றது.

கணவன், மனைவிக்கிடையே அடிக்கடி குடும்ப தகராறு ஏற்பட்டு வந்துள்ளது. இதனால் ரேணுகா கோபித்துக்கொண்டு ஆனேக்கல்லில் உள்ள தாய் வீட்டிற்கு சென்று விட்டார்.

இந்த நிலையில் அங்கு சென்ற மோடப்பா மனைவியை தன்னுடன் குடும்பம் நடத்த வருமாறு அழைத்துள்ளார். அப்போது அவர் வர மறுத்துள்ளார். இதனால் ஆத்திரமடைந்த மோடப்பா தான் மறைத்து வைத்திருந்த கத்தியால் ரேணுகாவை சரமாரியாக குத்தினார். இதில் பலத்த காயம் அடைந்த அவர் சம்பவ இடத்திலேயே பரிதாபமாக உயிரிழந்தார்.

இதற்கிடையே மோடப்பா அங்கிருந்து தப்பி பி.பி.பாளையம் கிராமத்திற்கு வந்து விட்டார். பின்னர் அவர் தளி அருகே உள்ள தொட்ட உப்பனூர் ஏரியில் பதுங்கி இருந்தார். இது குறித்து தகவல் அறிந்த ஆனேக்கல் போலீசார் அங்கு விரைந்து சென்று மோடப்பாவை கைது செய்தனர்.