முதல்-அமைச்சர் மாநில இளைஞர் விருதுபெற வருகிற 30-ந் தேதிக்குள் விண்ணப்பிக்கலாம்

திருச்சி,

திருச்சி மாவட்ட கலெக்டர் ராஜாமணி வெளியிட்டுள்ள செய்திக்குறிப்பில் கூறியிருப்பதாவது:-

2014-15-ம் ஆண்டு சட்டமன்ற பேரவையில் விதி 110-ன் கீழ் வெளியிட்ட அறிவிப்பை தொடர்ந்து சமுதாய வளர்ச்சிக்கு சேவையாற்றும் இளைஞர்களின் பணியை அங்கீகரிக்கும் பொருட்டு 2015-ம் ஆண்டு முதல் ‘முதல்-அமைச்சர் மாநில இளைஞர் விருது’ ஒவ்வொரு ஆண்டும் சுதந்திர தினத்தன்று 15 முதல் 35 வயது வரை உள்ள 3 ஆண்கள் மற்றும் 3 பெண்களுக்கு வழங்கப்பட்டு வருகிறது. இந்த விருது ரூ.50 ஆயிரம் ரொக்கமும், பாராட்டு பத்திரமும் மற்றும் பதக்கத்தை உள்ளடக்கியதாக இருக்கும். அதன்படி 2018-ம் ஆண்டுக்கான முதல்-அமைச்சர் மாநில இளைஞர் விருது வருகிற ஆகஸ்டு மாதம் 15-ந் தேதி நடைபெறும் சுதந்திர தினவிழாவில் முதல்-அமைச்சரால் வழங்கப்பட உள்ளது.

30-ந் தேதிக்குள்

15 வயது முதல் 35 வயது வரையுள்ள ஆண், பெண் விண்ணப்பிக்கலாம். கடந்த நிதியாண்டில் (2017-2018) மேற்கொள்ளப்பட்ட சேவைகள் மட்டும் பரிசீலிக்கப் படும். விண்ணப்பதாரர்கள் சமுதாய நலனுக்காக தன்னார்வத்துடன் தொண்டாற்றியிருப்பவர்களாக இருக்க வேண்டும். மத்திய, மாநில அரசுகள், பொதுத்துறை நிறுவனங்கள், பல்கலைக்கழகங்கள்,கல்லூரிகள்,பள்ளிகளில் பணியாற்றுபவர்கள் இந்த விருதுக்கு விண்ணப்பிக்க இயலாது. இதற்கான விண்ணப்ப படிவங்களை மாவட்ட விளையாட்டு மற்றும் இளைஞர் நலன் அலுவலர் அலுவலகத்தில் பெற்று, பூர்த்தி செய்து 3 பாஸ்போர்ட் அளவு புகைப்படத்துடன் கருத்துருக்களை மாவட்ட விளையாட்டு மற்றும் இளைஞர் நலன் அலுவலர் அலுவலகத்தில் வருகிற 30-ந் தேதி மாலை 5 மணிக்குள் சமர்ப்பிக்க வேண்டும்.

இணையதளத்தில்

இது தொடர்பான விவரங்கள் மற்றும் விண்ணப்பங்கள் தமிழ்நாடு விளையாட்டு மேம்பாட்டு ஆணைய இணையதளமான www.sdat.tn.gov.in மூலம் பதிவிறக்கம் செய்து கொள்ளலாம். தகுதியான விண்ணப்பங்களை மாவட்ட கலெக்டர் தலைமையிலான குழு பரிசீலித்து மாநில அளவிலான குழுவுக்கு பரிந்துரைக்கும், மேலும் விவரங்களுக்கு, மாவட்ட விளையாட்டு மற்றும் இளைஞர் நலன் அலுவலர், அண்ணா விளையாட்டு மைதானம் திருச்சி என்ற முகவரியில் தொடர்பு கொள்ளலாம்.

இவ்வாறு அதில் அவர் கூறி உள்ளார்.