கள்ளூர் கிராமத்தில் ஜல்லிக்கட்டு காளைகள் முட்டியதில் 14 பேர் காயம்

திருமானூர்,

அரியலூர் மாவட்டம், திருமானூர் அருகே கள்ளூர் கிராமத்தில் ஜல்லிக்கட்டு நேற்று நடைபெற்றது. இதையொட்டி கிராமத்தின் நடுவீதியில் வாடிவாசல் அமைக்கப்பட்டது. முதலில் காளைகளுக்கு மருத்துவ பரிசோதனை நடைபெற்றது. அதைத்தொடர்ந்து வாடி வாசலில் இருந்து அலங் கரிக்கப்பட்ட காளைகள் ஒவ்வொன்றாக அவிழ்த்து விடப்பட்டன. இதில் 150-க்கும் மேற்பட்ட மாடுபிடி வீரர்கள் கலந்து கொண்டு சீறிப்பாய்ந்து வந்த காளைகளை போட்டி போட்டு அடக்கினர். அப்போது பொதுமக்கள் கைத்தட்டி ஆரவாரம் செய்தனர். சில காளைகள் மாடுபிடி வீரர்களை தூக்கி வீசி பந்தாடியது. இதில் அரியலூர், தஞ்சாவூர், திருச்சி, பெரம்பலூர், ஜெயங்கொண்டம் உள்ளிட்ட இடங்களில் இருந்து வந்திருந்த 350-க்கும் மேற்பட்ட காளைகள் அவிழ்த்து விடப்பட்டன.

காளைகள் முட்டியதில் கீழகொளத்தூரை சேர்ந்த விக்னேஷ்ராஜ் (வயது 18), பொய்யூரை சேர்ந்த ராமையன் (35), கள்ளூரை சேர்ந்த சரத்குமார் (25), ஆண்டிபட்டாகாடு கிராமத்தை சேர்ந்த பிரகாஷ் (25), இலந்தை கூடத்தை சேர்ந்த பாண்டியன் (55) உள்பட 14 பேர் காயமடைந்தனர். அவர்களுக்கு அங்கிருந்த மருத்துவக்குழுவினரால் சிகிச்சை அளிக்கப் பட்டது.


ஜல்லிக்கட்டில் காளைகளை அடக்கிய வீரர் களுக்கும், வீரர்களிடம் பிடிபடாத காளைகளின் உரிமையாளர்களுக்கும் விழா குழுவினரால் வெள்ளி நாணயம், சைக்கிள், நாற்காலி, சில்வர் பாத்திரங்கள் போன்ற பரிசு பொருட்கள் வழங்கப்பட்டன.

ஜல்லிக்கட்டு போட்டியை காண அரியலூர், பெரம்பலூர், தஞ்சாவூர், திருச்சி, ஜெயங்கொண்டம், திருமானூர் உள்ளிட்ட பகுதிகளில் இருந்து திரளான பொதுமக்கள் கலந்து கொண்டு போட்டியை கண்டு களித்தனர். ஜல்லிக்கட்டு போட்டிக்கான ஏற்பாடுகளை விழாக்குழுவினர் மற்றும் கள்ளூர் கிராம பொதுமக்கள் செய்திருந்தனர்.