விருத்தாசலம் அருகே 2 வீடுகளில் ரூ.8 லட்சம் நகை–பணம் கொள்ளை

விருத்தாசலம்,

கடலூர் மாவட்டம் விருத்தாசலம் அடுத்த மங்கலம்பேட்டை அருகே பூவனூரை சேர்ந்தவர் பாலகிருஷ்ணன்(வயது 40). இவர் வெளிநாட்டில் வேலைபார்த்து வருகிறார். வீட்டில் இவருடைய மனைவி சுகுணா(31), மாமியார் தனக்கொடியுடன் வசித்து வருகிறார். இந்த நிலையில் நேற்று முன்தினம் இரவு சுகுணா, தனக்கொடி ஆகியோர் கதவை பூட்டி விட்டு வெளியில் உள்ள வரண்டாவில் படுத்து தூங்கினர்.

பின்னர் நேற்று காலையில் சுகுணா எழுந்து பார்த்த போது, வீட்டின் பின்பக்க கதவு உடைக்கப்பட்டு கிடந்தது. இதனால் அதிர்ச்சியடைந்த சுகுணா மற்றும் தனக்கொடி வீட்டுக்குள் சென்று பார்த்தனர். அப்போது பீரோவில் வைத்திருந்த 30 பவுன் நகைகள், ரூ.1 லட்சம் ஆகியவற்றை காணவில்லை.

இதுகுறித்து அவர்கள் மங்கலம்பேட்டை போலீசாருக்கு தகவல் தெரிவித்தனர். அதன்பேரில் போலீசார் சம்பவ இடத்துக்கு விரைந்து வந்து கொள்ளை நடந்த வீட்டை பார்வையிட்டு விசாரணை நடத்தினர். விசாரணையில் நள்ளிரவில் வீட்டின் பின்பக்க கதவை உடைத்த மர்மநபர்கள் வீட்டுக்குள் புகுந்து பீரோவில் வைத்திருந்த நகை–பணத்தை கொள்ளையடித்து சென்றிருப்பது தெரியவந்தது. மேலும் இதேபோல் அதே பகுதியை சேர்ந்த வேணுகோபால் மனைவி பத்மாவதி(38) என்பவரது வீட்டிலும், பின்பக்க கதவை உடைத்த மர்மநபர்கள், பீரோவில் இருந்த 2 பவுன் நகை, ஆயிரம் ரூபாய் ஆகியவற்றையும் கொள்ளையடித்து சென்றிருப்பது தெரியவந்தது. கொள்ளை போன நகை–பணத்தின் மொத்த மதிப்பு ரூ.8 லட்சம் இருக்கும் என்று கூறப்படுகிறது.

இதுபற்றி அறிந்த விருத்தாசலம் உதவி போலீஸ் சூப்பிரண்டு தீபாசத்தியன் சம்பவ இடத்துக்கு வந்து கொள்ளை நடந்த வீடுகளை பார்வையிட்டு விசாரணை நடத்தினார். மேலும் கடலூரில் இருந்து மோப்பநாய் புருனே வரவழைக்கப்பட்டது. அது கொள்ளை நடந்த வீடுகளில் இருந்து மோப்பம் பிடித்த படி சிறிது தூரம் ஓடிச்சென்று நின்றது. ஆனால் யாரையும் கவ்விப்பிடிக்கவில்லை. விழுப்புரத்தில் இருந்து தடயவியல் நிபுணர்கள் வரவழைக்கப்பட்டு, வீடுகளில் பதிவாகியிருந்த மர்மநபர்களின் கைரேகைகள், தடயங்களை சேகரித்து சென்றனர்.

இதுகுறித்த புகாரின் பேரில் போலீசார் வழக்குப்பதிவு செய்து நகை–பணத்தை கொள்ளையடித்து சென்ற மர்மநபர்களை வலைவீசி தேடி வருகின்றனர். மங்கலம்பேட்டை பகுதியில் 2 வீடுகளில் நகை–பணம் கொள்ளையடிக்கப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.